VOV4.Jarai - Tlam tom brơi lơ 21/5, Khul wai lăng bruă ruah khua hơmâo jơnum mă tơlơi pơhing, lăi pơthâo dong kơ bruă prăp rơmet hrơi ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl rơwang thun 2021-2026. Ƀơi mông jơnum, khua pơ ala kơ Khul wai lăng bruă ruah khua brơi thâo, truh mông anai, bruă prăp rơmet kơ hrơi plĕ hră hơmâo ngă giong laih, djơ̆ hrơi pơkă, dŏ tơguăn truh hrơi plĕ hră đôč yơh. Ƀơi 16 boh tơring čar, plơi prong amăng dêh čar hơmâo pơphun plĕ hră tañ, bruă ruah khua hơmâo pơphun rơnuk rơnua, djơ̆ tơlơi phiăn. Khua pơ ala khul wai lăng bruă ruah khua ăt brơi thâo mơn, dêh čar ta amra hơmâo rơbêh 69 klăk čô mơnuih ƀon sang nao plĕ hră giăm 85.000 anih plĕ hră. Ră anai, djŏp bruă hơmâo prăp lui klă kiăng mông ruah khua truh kih, pơhlôm tơlơi dưi mơng mơnuih nao plĕ hră, biă ñu ƀơi hơdôm anih glăk tơnap yua tơlơi truh lŏn adai ngă, klin kheng, hơmâo lu mơnuih dŏ pơčlah ăt hơmâo prăp lui klă mơn.

Siu H’Mai: Pơblang