VOV4.Jarai - Hrơi anai (7/7), giăm hmâo sa klăk čô čơđai sang hră amăng đơ đam dêh čar ta sit nik pơphun hrơi blung a pơplông mă ƀăng gưl 3 thun 2021 tal sa, hăng 2 mơta tơlơi pơplông lĕ Ngữ văn hăng Toán. Mơguah, 7 mông 30 mơnit čơđai amra ngă tơlơi pơplông Ngữ văn, tui hơdră čih pơblang, mông pơkă 120 mơnit pioh ngă tơlơi pơplông. Čơtlăm pơplông Toán, tui hơdră trắc nghiệm, mông ngă tơlơi pơplông 90 mơnit. Hlâo kơ anun amăng čơtlăm tom brơi, ƀing čơđai hmâo nao laih pơ̆ hơdôm anih anom pơplông pioh ngă hră pơ-ar pơplông, ngă tui bruă pel ĕp glăi huĭ hmâo tơlơi soh amăng hră pơ-ar (tơdah hmâo), hmư̆ lăi pơthâo tơlơi pơkă pơplông, hrơi mông pơplông.

Test tañ Sars-CoV-2 kơ čơđai sang hră ƀơi Daklak

Yua kơ klin Covid-19 ngă tơnap, anun abih bang hơdôm anih anom pơplông leng kơ pơphun pơhrăm hơdôm bruă pơgang, pơgăn klin tum djop mrô jrao, gơnam mă yua pơgang pơgăn klin, kah hăng: bơnal gôm adung mơbah, jrao pơdjai kơman, đing ia hăng ƀlir hră lăi pơthâo kơ pơgang pơgăn klin... Kiăng tal pơplông pơphun tơpă hăng pơhlôm, Kơ-iăng Khua Ding jum pơtô pơhrăm dêh čar ta ơi Nguyễn Hữu Độ - Khua Grŭp črâo ba gưl lŏn ia tal pơplông mă ƀăng gưl 3 thun 2021 pơtă: hơdôm anih anom pơplông khom lăi pơthâo truh mơnuih apăn bruă, mơnuih lăng čơđai pơplông khom gơgrong prong amăng abih bang hơdôm hrơi pơplông kiăng pơhlôm huăi hmâo tơlơi ngă soh glăi lăp jăm ƀuah./.

Siu H’ Prăk: Pô pơblang

Amăng dua hrơi lơ 5 hăng lơ 6/7, Gơnong bruă ia jrao tơring čar Dak Lak pơphun ĕp kman hơdră ngă hmar test lăng tañ ĕp kman sars-cov-2 kơ 150 čô nai pơtô, ƀing ĕp lăng bruă pơplông laih anun ƀing krăo lăng hăng ƀing bơwih brơi kơ bruă pơplông abih anih 12 gưl dêh čar hăng ĕp lăng 500 čô čơđai pơplông pơ tơring glông Lak, tơring kual Liên Sơn, tơring glông Lak.

Anai lĕ, tơring glông hơmâo mơnuih ƀă Covid 19 yua glăi mơ̆ng ƀôn prong Hồ Chí Minh hăng brơi dŏ pơčlah laih. Truh mông anai, abih bang tơhnal gru ĕp kman ƀu ƀuh klin ôh. Samơ̆ kiăng pơgang bruă pơplông hơđong gơnong bruă ia jrao tơring čar Dak Lak jao kơ anom bruă ia jrao tơring glông Lak ngă hrom pok pơhai bruă pơhlôm, pơgang klin Covid 19 tong ten amăng hơdôm hrơi pơphun bruă pơplông abih anih 12 amăng tơring glông.

Nay Jek: Pơblang