VOV4.Jarai - Ngă tui Kơčăo bruă mơng Kơnuk kơna kơ pơtrut pơtô pơblang tơlơi phiăn kơ ƀing apăn bruă, mơnuih ƀon sang ƀơi guai lŏn ia, bul pơtâo ia rơsĭ rơwang thun 2017-2021, hrơi blan rơgao, ling tơhan pơgang guai, kông an hăng lu anom bruă kơnuk kơna hơmâo pơtrut tui bruă pơtô pơblang kiăng ƀing apăn bruă, khua mua, mơnuih ƀon sang ƀơi guai lŏn ia thâo hluh hăng ngă tui tơlơi phiăn. Biă ñu, hrơi mông anai, kơčăo bruă glăk gơñăm nao pơtô pơblang kiăng thâo hluh ngă tui tơlơi phiăn mut tơbiă amăng dêh čar tui hơdră pơhlôm pơgang klin Covid-19.

Ia H’Drai lĕ sa boh tơring glông gah guai lŏn ia mơng tơring čar Kon Tum, hơmâo giăm 80 km jơlan guai hrŏm hăng dêh čar Kur. Dong mơng hrơi hơmâo klin Covid-19 lar hyu ƀơi djop anih, tơring čar Rattanakiri mơng dêh čar ngă gơyut ha mơguai hăng tơring čar Kon Tum ăt hnun mơn. Yua hnun bruă hyu tir, wai pơgang hăng pơtô pơblang mơnuih ƀon sang ngă tui djơ̆ bruă pơgang klin Covid-19 lêng kơ hơmâo abih bang anom bruă čar tơring glông Ia H’Drai hăng tơhan pơgang guai ngă hrŏm bơbruai. Anai lĕ tơlơi dưi ngă mơng bruă lăng yôm pơtô pơblang tơlơi phiăn kơ mơnuih ƀon sang djuai ƀiă ƀơi guai dêh čar.

Ƀơi tơring glông Ia H’Drai, hrơi blan rơgao, ling tơhan kah hăng Tơhan pơgang guai, tơhan kông ang, Anom bruă git gai tơhan tơring glông hăng hơdôm khul grup pơtrut ngă hrŏm hyu pơtô pơblang tơlơi phiăn kiăng ƀing khua, mơnuih apăn bruă, mơnuih ƀon sang ƀơi guai lŏn ia thâo hluh ngă tui tơlơi phiăn. Klin kheng Covid-19 ăt dŏ kơtang na nao, ngă tui tơlơi pơtrun ƀu brơi tum pơƀut lu mơnuih, tơhan pơgang guai mơng puih kơđông tơhan Hồ Le hăng Kông an să Ia Đan ngă hrŏm pơtô ba phara ƀơi thôn 6 lơ̆m yang hrơi mlăm. Ƀơi thôn 6, lu mơnuih lĕ kông ñơn mơng hơdôm boh kông ti kơsu, juăt mă bruă mơng 1 truh 2 mông mơguah, yua hnun juăt pơdơi tañ mơn. Thâo rơđah tơlơi anai, ling tơhan hyu pơtô pơblang mơng 6h30 mơnit tlam mơmot truh kơ 8 mông mơmot. Thiếu tá Võ Anh Hoàng, khua kông an să Ia Đan brơi thâo:

“Kông an să ăt ngă hrŏm hăng ƀing gŏp tơhan apăn bruă pơkŏn hyu pơtô pơblang tơlơi phiăn kah hăng Tơlơi phiăn dŏ amăng plơi pla, Tơlơi phiăn rơnuk rơnua plang internet, tơlơi phiăn bruă ngă soh sat răm ƀăm, hơdôm bruă bơdjơ̆ nao pơkơdong glăi ƀing ngă soh, biă ñu lĕ tơlơi phiăn ma tuý, tui anun hăng bruă pơtô pơblang, mơnuih ƀon sang ăt thâo rơđah mơn hăng thâo hluh, gơgrong bruă hloh amăng bruă pơhlôm pơgang, lăi pơthâo mơnuih ngă soh hăng anom bruă kơnuk kơna”.

Kiăng ngă tŭ yua hơdôm kơčăo bruă anai, anom bruă git gai kơčăo bruă lĕ Anom bruă tơhan pơgang guai tơring čar Kon Tum ječ ameč čih pơkra hră pơ-ar pơtô pơblang glăi tơlơi phiăn lăp djơ̆ hăng tơlơi hơmâo sit ră anai ƀơi kual plơi pla. Amăng thun 2021, ling tơhan pơƀut pơtô lăi hơdôm tơlơi arăng kŏm amăng bruă wai lăng, mă yua phao kơtuang, mơnong pơtuh, mơnong ngă sat kơ ană mơnuih, tơlơi phiăn kơ bruă hyu hmư̆ sŭ amăng plang internet, dŏp mă tơlơi hơgŏm amăng kơnuk kơna, tơlơi hơgŏm amăng bruă mă, tơlơi hơgŏm bruă sĭ mơdrô, tơlơi hơgŏm hơjăn pô, sang anŏ hăng tơlơi hơdip hơjăn mơng pô hlơi drơi hơpă ƀơi plang internet, hơdôm bruă arăng kŏm gah internet. Biă ñu amăng hrơi mông anai, Kơčăo bruă pơƀut lăi nao pơsir kơđi tơlơi mut nao rai amăng dêh čar ča čot, tơlơi pơkôl mơng tơlơi phiăn bơdjơ̆ nao bruă pơgang klin Covid-19 hăng tơlơi bơtơhmal. Tui hăng trung uý Vũ Văn Phúc, khua iâu pơthưr pơtô ba mơnuih ƀon sang puih kơđông pơgang guai Hồ Le lăi:

“Tơhnal gal lĕ abih bang ană plơi pla thâo hluh djŏp laih, thâo hluh rơđah kơ hơdôm tơlơi hơmâo mơng puih kơđông čih pơkra hăng pơtô pơblang brơi abih bang mơnuih ƀon sang hmư̆ laih. Samơ̆ amăng mông pơtô pơblang kơ neh met wa lĕ ăt dŏ hơmâo mơn hơdôm tơlơi aka ƀu amuñ lĕ hrơi mông neh met wa nao mă bruă sui biă, ta khŏm kiăo tui hrơi mông hơpă, nao pơ pă mơng pơtô ba. Lu wơ̆t lơ̆m pơtô pơblang brơi sa boh sang anŏ, gơnang kơ sang anŏ anun hlao lăi glăi pơ sang anŏ pơkŏn dong”.

Rơngiao kơ anun bruă hyu pơtô pơblang mơmot mlăm, mơnuih apăn bruă ăt ngă hrŏm pơtô ba, pôr amăng loa dưi hyu amăng plơi pla. Hrơi hyu pôr pơhing lĕ mơng mơguah, yang hrơi dong hăng tlam mơmot. Tơlơi ră ruai mơng ayong Nguyễn Văn Hiền, mơnuih dŏ ƀơi thôn 6 să Ia Đan:

“Kâo mơng hlâo adih ngă bruă pơgang ba gŏng guai čar ta, puih kơđông tơhan ăt bơni mơn kơ kâo, hơmâo mơnuih mơng ataih mut rai, ta ƀu thâo krăn pô hlơi lĕ lăi pơhmư̆ kơ kông an, ling tơhan”.

Ayong Lê Văn Thắng, mơnuih dŏ ƀơi thôn 6 să Ia Đan brơi thâo:

“Lơ̆m tơbiă mơng sang lĕ ta khŏm truă khăn gôm ƀô̆ mơn, ƀu dưi dŏ pơƀut lu mơnuih ôh, ƀơi guai dêh čar lĕ ƀing tơhan kông an, tơhan pơgang guai ăt pơtô lăi na nao yơh, rim hrơi lêng ƀuh ƀing gơñu rai soh”.

Thun blan rơgao, ngă tui kơčăo bruă pơtrut hyu pơtô pơblang tơlơi phiăn kơ ƀing khua, mơnuih ƀon sang ƀơi guai dêh čar, bul pơtâo ia rơsĭ rơwang thun 2017-2021, bruă hyu pơtô pơblang tơlơi phiăn hơmâo lu tơlơi dưi ngă. Bruă pơphun pơtô lăi, pôr pơthâo tơlơi phiăn hơmâo ngă dưm kơnar ƀơi abih bang, mơng anun pơđĭ tui tơlơi thâo hluh mơng djŏp anom bruă, khul grup hăng mơnuih ƀon sang kơ tơlơi gơgrong bruă, tơlơi yôm mơng bruă hyu pơtô pơblang tơlơi phiăn hăng tơlơi pơmin ngă tui tơlơi phiăn ƀơi guai dêh čar. Đại uý Nguyễn Hữu Cường, mơnuih apăn bruă čar, kơ-iăng khua puih kơđông tơhan pơgang guai Hồ Le brơi thâo:

“Kâo juăt pơđĭ tui na nao laih bruă hyu pơtô pơblang tơlơi phiăn lĕ pơbuă tui tơlơi rơgơi, tơlơi apăn bruă kơ ƀing gơgrong bruă anai, tal 2 lĕ pơtrut tui tơlơi gơgrong bruă mơng mơnuih ană plơi đăo gơnang, tha plơi, khua plơi laih anun ƀu pơdơi pơplih phrâo bruă hyu pơtô ôh....Mơng bruă ngă dưm kơnar abih bang bruă pơtô pơblang, mơnuih ƀon sang jai hrơi thâo hluh tui, gum hrŏm hăng tơhan pơgang guai amăng bruă hyu tir, wai pơgang, ƀuh mơnuih ngă soh, lăi pơthâo glăi tañ kơ puih kơđông tơhan hăng hơdôm anom apăn bruă đah mơng pơsir hĭ hơdôm bruă bơdjơ̆ nao tơlơi pơkôl pơkă rơnuk rơnua plơi pla, mơng anun ngă hiam, ngă hơđong plơi pla”.

Mơng bruă pơphun ngă “Kơčăo bruă pơtrut pơtô pơblang tơlơi phiăn kơ ƀing khua, mơnuih apăn bruă mơnuih ƀon sang ƀơi guai dêh čar, bul pơtâo ia rơsĭ thun 2017-2021” ƀơi tơring glông Ia H’Drai, ta dưi pơsit, kơčăo bruă anai ngă pơplih tơlơi pơmin, tơlơi thâo hluh mơng mơnuih ƀon sang, plai ƀiă hơmâo mơnuih ngă soh tơlơi phiăn, djru mơnuih ƀon sang hơđong pran jua dŏ kơtă huă kơtit ƀơi kual giăm guai Dêh čar.

Siu H’Mai: Pơblang