VOV4.Jarai - Ƀing apăn bruă, ƀing mă tơlơi pơhing phrâo mơng Gong phun jua pơhiăp dêh čar Việt Nam hơmâo pơpơhun hrơi nao djru bruă ƀơi hơdôm tơring čar kual Dơnung amăng hơdôm hrơi kual Dơnung glăk gơgrong pơgang klin. Ƀu djơ̆ kơnong lĕ bruă jao đôč ôh mơ̆ hăng rĭm čô mơnuih mă tơlơi pơhing phrâo nao djru bruă ăt djă ba tơlơi gơgrong amăng bruă mă, amra nao tơl djop anih kiăng kơ mă tơlơi pơhing pôr brơi mơnuih ƀon sang thâo hơdôm bruă amăng lŏn ia hăng pran hur har mơng ƀing mă tơlơi pơhing phrâo:

Ƀing apăn bruă, ƀing mă tơlơi pơhing phrâo nao djru bruă tal anai hơmâo 12 čô, tal nao djru bruă pơ ƀôn prong Hồ Chí Minh hăng hơdôm tơring čar kual Dơnung yua kơ ơi Phạm Mạnh Hùng, Kơ-iăng khua Gong phun jua pơhiăp dêh čar Việt Nam ba jơlan hlâo. Grup hyu mă bruă amra kơtưn amăng bruă git gai, pôr pơhing, pơtô pơblang kơ bruă pơgang klin Covid-19 hăng sa, dua boh tơhnal amăng plang pôr pơhing mơng Gong phun jua pơhiăp dêh čar Việt Nam.

Nao pơ alum pran jua ƀing apăn bruă, ƀing mă tơlơi pơhing phrâo prap nao djru bruă ƀơi hơdôm tơring čar kual Dơnung, Khua Gong phun jua pơhiăp dêh čar Việt Nam ơi Đỗ Tiến Sỹ čang rơmang ƀing mă tơlơi pơhing phrâo, ƀing dăp hơdră amra găn rơgao tơnap tap yua kơ ataih mơng sang anŏ, plơi pla hrŏm hăng djop khul grup djru pơgang klin, djru kiăng kơ găn rơgao hơdôm tơlơi tơnap tap mơ̆ mơnuih ƀon sang glăk bưp, ƀing djru bruă kiăng kơ pơgôp dưi ngă pơgiong hơnong pơkă prong hloh kiăng pơgang hĭ klin.

Khua Gong phun jua pơhiăp dêh čar Việt Nam ăt pơdah tơlơi pơ-ư pơ-ang hăng ƀing apăn bruă, ƀing mă tơlơi pơhing phrâo, čang rơmang ƀing mă tơlơi pơhing phrâo ƀu djơ̆ kơnong hơmâo tơlơi čih kiăng kơ lăi pơthâo ƀing mơnuih tuh rơyuh pran jua, tơlơi gir run mơng mơnuih ƀon sang, ƀing ling tơhan, nai ia jrao, ơi ia jrao, kông ang tơhrơi kah mlăm glăk gơgrong abih pran jua djru amăng bruă pơgang klin đôč ôh mơ̆ ăt ba glăi tơlơi găn rơgao yôm phăn kiăng kơ hơmâo hơdôm tơlơi čih lăp djơ̆ hăng tơlơi sit nik amăng lŏn ia ta ră anai:

“Grup hyu mă bruă amra ngă tui tơlơi pơtrun mơng Ping gah Gong phun jua pơhiăp, anai lĕ tơlơi yôm phăn pơdah pran gir run mơng Khua mua Gong phun jua pơhiăp. Ăt čang rơmang ƀing mă tơlơi pơhing phrâo amra tañ hơmâo hơdôm tơlơi čih djơ̆ hăng tơlơi sit nik hloh. Kâo čang rơmang lơ̆m nao djru bruă, ƀing mă tơlơi pơhing phrâo amra hơdôm lu tơlơi găn rơgao yôm phăn amăng bruă mă tơlơi pơhing phrâo, pơdah djop mơta amăng tơlơi hơdip mơda, hơdôm tơlơi čih pôr pơhing mơng Gong phun jua pơhiăp dêh čar Việt Nam hrŏm hăng anom bruă phun amăng pôr pơhing hơmâo lu dong tơlơi pơhing yôm phăn”.

Amăng mông pơphun hlâo kơ nao mă bruă, ƀing mă tơlơi pơhing phrâo mơng Gong phun jua pơhiăp dêh čar Việt Nam lêng pơdah pran gum hrŏm hăng hơdôm khul grup djru pơgang klin, gir run pơtô pơblang kơ bruă pơgang klin. Čang rơmang hơmâo lu tơlơi pơhing, sem lăng bruă brơi lăp djơ̆, djop mơta amăng pơgang klin amăng lŏn ia ta. Pô mă tơlơi pơhing phrâo Thành Lương, Anom bruă gru grua, mơnuih mơnam (VOV2) brơi thâo:

“Tơlơi kâo čang rơmang hloh lĕ hăng ƀing mơnuih hmư̆ brô̆ pôr pơhing mơng Gong phun jua pơhiăp dêh čar Việt Nam, amra hmư̆ hơdôm tơlơi čih mơng ƀing gơmơi. Ƀuh hơdôm rup rap ƀing gơmơi pơdah, mă mơng kual hơmâo klin mơng anun ba glăi tơlơi đăo gơnang nao tơlơi hiam klă amăng pơgi kơdih”.

Tŏ tui lĕ tơlơi lăi pơthâo mơng pô mă tơlơi pơhing phrâo Thi Uyên, mơng Hră pơhing điện tử mơng Gong phun jua pơhiăp dêh čar Việt Nam (VOV.VN):

“Kâo čang rơmang kâo amra hyu mă hơdôm rup rap sit nik hloh amăng sa boh plơi prong kơ mơnuih ƀon sang glăk hơdip hăng pơgang klin. Kâo prap lui kar hăng rơnuk blah wang đưm hlâo. Čang rơmang kâo pô amra găn rơgao tơlơi tơnap tap anai hăng jing tơlơi hing ang amăng lŏn ia”.

Lại Hoa: Čih

Siu Đoan: Pơblang