VOV4.Jarai - Bơdjơ̆ nao bruă pơđĭ nua măi kit pơčrang kman Covid-19 mơng Kông ti pơčruh ngăn Công nghệ Việt Á (Kông ti Việt Á), mơguah lơ 21/12, ơi Nay Phi la, khua gơnong bruă ia jrao tơring Dak Lăk pơsit, tơring čar hơmâo blơi rơbêh 20 rơbâo boh măi kit pơčrang Covid-19 mơng Kông ti anai, hăng nua lĕ 370 rơbâo prăk lơ̆m sa boh măi. Bruă blơi hơmâo ngă hră pơ-ar tŏng ten, ƀu hơmâo tơlơi soh glăi hơget ôh. Kơ bruă ngă hră blơi măi, ơi Nay Phi La lăi: bruă blơi kit pơčrang kman Covid-19 ƀơi tơring čar hơmâo CDC čih pơkra. Giong anun anom bruă pơdah pơƀuh pơ Gơnong bruă ia jrao giong anun gơnong bruă ia jrao pơdah pơƀuh kơ Jơnum min mơnuih ƀon sang tơring čar kĭ hră. Tơdơi kơ anun CDC Dak Lăk apah anom bruă sem lăng pơsit nua blơi măi giong anun pơdah pơƀuh kơ Gơnong bruă prăk sem hăng hăng pơsit brơi. Giong anun, hră pơ-ar hơmâo ba nao pơ Gơnong bruă čih pơkra akŏ bruă hăng tuh pơ plai lăng glăi dong, giong anun kah CDC mơng blơi. Bruă blơi gơnam hơmâo ngă djơ̆ akŏ tlôn, kiăo tui tơlơi phiăn laih.

Siu H’Mai: Pơblang