Pơ bah dơnao pơkŏng ia Mỹ Lâm, să Hòa Thịnh, rĭm tlam mơmŏt hrơi năm rĭm wŏt hrơi tơjuh, amra hmư̆ arăng pĕ gông hrŏm hăng hơdôm tơlơi adôh yŭ rơnang mơ-ak… pơmut hrŏm hăng jua angĭn, čim ur…ƀơi anai ƀu djơ̆ anih ngui pơprong lič lač. Ƀơi anai lăng hyu jum dar rơk mơtah mơda hrŏm hăng ƀing mơnuih rơhmač, jê̆ giăm kar hăng plơi pla Hòa Thịnh. Ƀơi anai, tơlơi adôh suang pơčeh rai mơng ƀing mơnuih hor pĕ gông, hăng amra abih pran jua yua tơlơi ngui adôh, pĕ gông brô̆ brơi tuai rơnguai. Mơng tơlơi anun, ƀơi anai jing anih ƀuăn pơbưp hăng lu mơnuih. Ƀing ta amra hmư̆ tơlơi bơră ruai mơng mơnuih ƀôn sang hăng tuai rơnguai lơm rai pơ anai:“Ăt kơtuă mơn, ƀuh mơ-ak biă mă! Lăng hyu jum dar hiam dong, hiam biă mă! Lăng tui anai ƀuh mơ-ak mơ̆ ngă lăp djơ̆ biă”-“Neh met wa hur har mơ-ak biă. Ñu ba glăi sa anih ngui ngor kiăng neh met wa dưi pơmut hrŏm amăng rĭm tlam hrơi tơjuh, ngă tui anai lăng mơ-ak biă”.

Bruă ngă amuñ amĕ tui anai samơ̆ glăk ba glăi tơlơi pơplih phrâo brơi tơlơi hơdip gru grua ƀơi kual plơi pla Hòa Thịnh-Anih glăk hơkrŭ glăi kơtang tĭt tơdơi kơ tal ia ling dăo blan 11 thun hlâo. Ayong Nguyễn Hữu Đồng, sa čô mơnuih dŏ hơdip amăng plơi Hòa Thịnh, sa čô mơnuih juăt djru ba hyu ƀing mơnuih čơmah nao djru brơi neh met wa rŭ pơdong glăi anŏ răm rai tơdơi kơ tal ia ling dăo. Hơdôm hrơi anai, ñu juă ƀuh ƀô̆ mơta amăng hơdôm mông pơbưp ƀơi Mỹ Lâm kiăng adôh hơdôm tơlơi adôh ñu hor brơi kơ neh met wa, gơyut gơyâo hmư̆. Hăng ñu pô dưi ngui hrŏm lĕ tơlơi ngă ñu mơ-ak, yâo mơ-ak biă. “Kâo kah hăng ƀing adơi ayong lêng kơ dong yua jơlan hơdră ngui tui anai. Tơdơi kơ khua mua pơphun ngă tui tơlơi anai, kâo ƀuh plơi pla jai hrơi mơ-ak klă; neh met wa hơmâo bruă mă, tơlơi hơdip ăt hiam tui mơn.”

Găn rơgao 4 wŏt hrơi tơjuh pơphun, jơlan hơdră ngui adôh suang ƀơi anih pơbưp Mỹ Lâm lêng kơ ƀuh pô pĕ gông brô̆ 70 thun mơ̆ tơngan ñu ăt rơmuăn mơn-anun lĕ ơi Phạm Duy Binh dŏ amăng phương Tuy Hòa. Hrơi năm rĭm wŏt hrơi tơjuh ñu mơng Tuy Hòa găn rơngai hơdôm hơpluh km nao pơ Hòa Thịnh kiăng kơ pĕ gông brô̆ brơi kơ arăng hmư̆. Ơi Binh brơi thâo: “Lơm hmư̆ hing Hòa Thịnh pơphun ngui pĕ gông brô̆ giăm dơnao ia Mỹ Lâm, kâo lĕ sa čô mơnuih thâo pĕ guitar hăng thâo adôh-ăt ƀuh anai lĕ anih ngui phara biă mă. Ƀing gơmơi amra mut hrŏm hăng abih pran jua. Kâo ƀuh tơlơi anai yôm biă mă.”

Hrŏm hăng anih pơbưp Mỹ Lâm, rĭm tlam mơmŏt ăt pơphun ƀơi sa, dua bit anih rôk tui jơlan găn nao hmua pơ hmua ia. Jơlan hơdră anai hơmâo tơlơi mut hrŏm mơng ƀing hlăk ai čơđai čang rơmang dưi pok prong anih ngui gru grua brơi mơnuih ƀôn sang amăng kual plơi pla să Hòa Thịnh. Tơlơi ngui adôh suang amăng plơi pla anai yua ơi Phương Văn Lành, Khua git gai Ping gah să Hòa Thịnh pơphun hăng hơmâo pok pơhai hluai tui pran hor. Ƀu sĭ wĕ hăng hơmâo pơphun amăng tlam mơmŏt hrơi năm rĭm wŏt hrơi tơjuh. Mơnuih thâo pĕ gông brô nao pĕ gông brô̆, thâo adôh nao adôh. Hăng hlơi pô kiăng bơră ruai kơtuai akhan ăt dưi mut hrŏm. Ơi Phương Văn Lành brơi thâo, tơdơi kơ hrơi blan pơphun, anih ngui “Pơbưp ƀơi Mỹ Lâm”, glăk pơhưč lu mơnuih: “Anŏ ba glăi blung a lơm ƀing gơmơi pơphun amăng hrơi blan rơgao, anun lĕ dưi pơhưč lu tuai rơnguai amăng să hăng mơng pơkŏn dong, đa rai mơng tơring čar pơkŏn, rai ngui hrŏm mơnuih ƀôn sang ƀơi anai. Anai lĕ bruă mă kiăng ƀing gơmơi lăi pơthâo rup rap plơi pla tơl gơyut gơyâo hăng tuai amăng să hăng mơng pơkŏn kah hăng mơng hơdôm boh tơring čar ataih giăm.”

Mơng dơnao ia Mỹ Lâm, truh pơ glai ia dăo Bầu Đá, mơng plơi Làng Sen truh pơ Suối Lạnh hăng hơdôm kual hmua pơdai găn nao hơdôm boh plơi pla hơđong mơ-ak…pơjing rai rup rap plơi Hoà Thịnh hơđong mơ-ak, jai pơhưč lu mơnuih tui nao ĕp lăng./.