Jơlan hơdră pok anih pơtô hrăm pah hơgor mơdua, atông čing ania tlâo, hơmâo rơma boh čing hlai kiăng lăi, hơgor dua boh dua čô pah atông, čing ania hơmâo klâo boh čing ania, bung či hăng rơma boh čing hlai kiăo tui klôn. Bruă ngă anai, dŏ amăng črăn kơčăo bruă mrô 6 Jơlan hơdră mơ̆ng dêh čar djru pơtrut pơđĭ kyar bơwih ƀong huă-mơnuih mơnam kual plơi pla djuai ƀiă hăng čư siăng brơi “Djă pioh, ba yua rơnoh yom gru grua hiam đưm mơ̆ng djop djuai ania ƀiă lir hơbit hăng bruă pơđĭ kyar čơkă tuai hyu ngui” yua Gơnong bruă Gru grua, Pơrơguăt drơi hăng Tuai čuă ngui Dak Lak pô ngă.

Amăng 2 blan hrăm, ƀing čơđai sang hră ƀơi sang hră Đinh Nup, să Phú Mỡ hăng ƀing tơdăm ngek dra muai să Xuân Lãnh dưi hơmâo ƀing kơhnâo kơhnăk bruă atông čing, pah hơgor pơtô glăi hơdră pah hơgor mơdua, atông tlâo boh čing ania (bung či) hăng rơma čing hlai kiăng thâo hruaih; laih anun pơtô djop mơta yŭ ayun suang kiăo tui jua čing, hơgor hơmâo pơtô brơi anun.

Yă Nguyễn Thụy Phương Hiếu, Kơ-iăng khua Gơnong bruă Gru grua, Pơrơguăt drơi jăn hăng Tuai čuă ngui tơring čar Dak Lak brơi thâo, găn rơgao hơdôm hrơi blan hơmâo ƀing kơhnâo kơhnăk pơtô glăi hơdră pơdah bruă pah hơgor mơdua, atông čing mung čing mai, čing hlai mơak, ƀing čơđai sang hră hăng khul tơdăm ngek dra muai pơ anun thâo tong ten hăng hor biă mă kơ gru grua hiam đưm djuai ania pô. Giong hrăm anih hrăm anai, pơtrut pran jua ƀing čơđai hor djă pioh ba yua gru grua hiam amăng mông ngă yang plơi, tơlơi ngui ngor prong amăng mơnuih ƀôn sang, tŏ tui djă pioh atông čing ring hơgor djă pioh na nao gru grua hiam mơ̆ng djuai ania pô

“Ƀing ană amôn čơđai sang hră hrăm tañ thâo biă mă. Yua hơmâo ƀing kơhnăk gru grua pơtô glăi, ƀing gơñu thâo tong ten hăng atông čing hruaih biă mă wơ̆t hăng yŭ ayun suang hai. Anai lĕ yak ngă bruă hnang blung gêh găl. Gơnong bruă čang rơmang gah sang hră ăt dăp hơdră, akŏ pơjing khul čơđai sang hră anai jing khul atông čing phun pioh hyu pơdah amăng hrơi blan pơ anăp. Mơ̆ng anun, ƀing adơi đeh hơmâo lu anŏ gêh găl pơplông, pơdah thâo arăng lăng amăng plơi pla, amăng djop sang hră kơnuk kơna čem rông amăng tơring čar, kiăng hrăm nao rai tơdruă, djru djă pioh gru ama grua amĭ djuai ania pô”.

Anŏ hiam gru grua pah hơgor mơdua, kơnuă čing klâo, atông čing rơma anŏ hiam mơak mut tơma hrŏm jua hơgor pah  pơđưh nao rai anŏ či lăi nao, atông hrŏm klaoa boh čing ania, hơmâo bung či, bêt, bơt hăng rơma boh čing hlai amăng yŭ ayun suang, jua čing mơñi mơak biă mă. Jua hơgor, jua čing pơjing rua ruăi dơnai jua mơñi hrŏm, djă ba rơnoh yom tơlơi mơak pơhưč pran jua biă mă hrŏm hăng lu ia iom hơbô̆ eng ao đưm. Yua kơ anŏ hiam mơak, rơnoh yom phara anun, thun 2015, anŏ hiam pơdah tơlơi pah hơgor mơdua, kơnua čing klâo, iâu čing rơma dưi hơmâo Ding jum Gru grua, Pơrơguăt drơi jăn hăng Tuai čuă ngui pơsit tŭ yap jing kông ngăn bơngăt jua gưl dêh čar. Bruă pơphun tơlơi ngui ngor mơak, ngă yang plơi akŏ bơyan phang thun phrâo ƀu kơnong jing bruă ngă djă pioh ba yua tơlơi thâo gru grua hiam đưm amăng plơi pla đôč ôh, dŏ jing bruă ngă djă pioh sit nik hăng pơđĭ tui rơnoh yom amăng gru grua. Ơi La Văn Hãng, Khua anom bruă Gru grua-Mơnuih mơnam să Xuân Lãnh, tơring čar Dak Lak brơi thâo:

 “Mơ̆ng thun 2016 truh ră anai, să hơmâo pơphun djă pioh na nao tơlơi ngui ngor gru grua anai mơ̆ng djop djuai ania ƀiă ƀơi Xí Thoại hăng Xuân Lãnh lăi pha. Ƀing gơmơi gir run khut khăt mah tơlơi hơdip mơda dŏ tơnap tap hai, tơdơi kơ gong gai plơi pla pơmut glăi, ăt pơphun brơi kơ ană plơi pla djuai ƀiă ngui ngor bưp nao rai, hrăm tơdruă tơlơi thâo thăi hăng djă pioh, ba yua pơđĭ tui tơlơi thâo gru grua hiam klă đưm djuai ania pô”.

Hơgor mơdua, čing ania klâo, čing hlai rơma lĕ gru grua hiam phara biă mă mơ̆ng djuai ania Bahnar hăng Čăm, juăt lăi Čăm hruai, hơmâo djă pioh na nao mơ̆ng rơnuk đưm truh ră anai. Mơ̆ng tơlơi ngă yang ngui ngor amăng plơi pla truh jua čing hơgor ăt tơ-ua đĭ, kiăng pơtruh brơi ƀing tơdăm dra djop plơi pla nao giăm hloh gru ama grua amĭ djuai ania pô. Bruă djop sang bruă gong gai kơnuk kơna tơring čar Dak Lak pơphun anih pơtô glăi ƀing čơđai sang hră ƀu kơnong kiăng djă pioh kông ngăn gru grua hiam yom pơphăn đôč ôh, dŏ ngă brơi djă pioh, pơtrut asar pơjeh čơđai ngă jă na nao gru grua hiam anun hăng ba hyu ngă bang bơngač amăng tơlơi hơdip mơda rơnuk anai.