Akŏ blan 7 phrâo rơgao, Pri pơtaih tui gru đưm hơdôm Anih pơtô hrăm taih Bình Định mă Cup Ơi pơtao Quang Trung tal 8 thun 2026 hơmâo pơphun laih, hơmâo rơbêh 700 nai pơtô taih, mơnuih hrăm taih mơ̆ng 75 anih pơtô hrăm taih hăng grup hrăm taih amăng hăng gah rơngiao tơring čar. Ơi Bùi Trung Hiếu, Kơ-iăng khua Gơnong bruă gru grua, bơkjăp drơi jăn hăng tuai čuă ngui tơring čar Gia Lai pơ-ư pơ-ang, tơlơi pơtaih đưm Bình Định jing gru yom hơmâo djă pioh mơ̆ng rơnuk akŏ pơdong, pơgang lŏn ia mơ̆ng djuai ania ta: “Kơnôl 31/3/2025, Khua dêh čar tŭ ư mơit hră kơ UNESCO sem lăng tŭ yap Tơlơi pơtaih đưm Bình Định amăng Hră gru grua yom mơ̆ng ană mơnuih ta. Anai jing tơlơi hok mơak biă hăng bruă Pơtaih gru Bình Định, ƀu kơnong jing tơlơi pơ-ư pơ-ang ba anŏ yom mơ̆ng dêh čar truh pơ jar kmar đôč ôh, ăt pơđĭ tui tơlơi pơmin, tơlơi gơgrong mơ̆ng mơnuih ƀôn sang amăng bruă djă pioh, răk lui anŏ yom gru ama grua amĭ”.

Mơ̆ng kơnôl 26/7 truh 2/8 pơ anăp, Pri pơtaih gru đưm djŏp grup mơ̆ng jar kmar hơmâo pơphun ƀơi Quy Nhơn - Gia Lai, hăng năng ai 650 čô mơnuih hrăm taih, mơnuih rơguăt bruă pơtaih pơplông wŏ đă hiam hăng pơbơtaih nao rai. Rơngiao kơ pơplông, khul ăt brơi grup mơ̆ng jar kmar nao lăng An Khê Trường, pra yang Long Phước hăng pra yang Bánh Ít či sem lăng gru grua, tơlơi hơdip đưm hăng anŏ yom mơ̆ng kual lŏn Gia Lai.

Giong anun dong, mơ̆ng kơnôl 2 truh kơnôl 5/8, Jơnum ngui Jar kmar Pơtaih tui gru đưm Việt Nam tal 9 - Gia Lai 2026 hơmâo pơphun ƀơi Quy Nhơn hăng hơdôm boh tơring ieo gah anăn “Tơlơi pơtaih đưm Việt Nam - Anŏ yom bang bơngač”. Bruă anai hơmâo 16 grup mơ̆ng jar kmar rai mơ̆ng 9 boh dêh čar, hrŏm hăng 43 grup mơ̆ng čar ta laih anun 11 grup hrăm taih mơ̆ng tơring.

Tơlơi ngă pơhưč lĕ bruă pơƀuh anŏ hiam mơ̆ng tơlơi pơtaih, rơbêh 1.000 čô nai pơtô taih, čơđai hrăm taih wo, đă công pháp hăng Hùng kê quyền - tơlơi taih hmư̆ hing biă mơ̆ng kual lŏn Tây Sơn, pơdah pran jua lăng yom kơ tơlơi thâo taih hăng anŏ hiam gru grua mơ̆ng tơlơi pơtaih tui gru Bình Định. Tơlơi phrâo hơmâo mơ̆ng jơnum ngui thun anai jing bruă wo đă, taih hơmâo lu mơnuih biă, abih bang nao pơtrui mơtăm, đă wo hrŏm ha amăng plĕ lăng hiam biă mă, jing ngă giong hĭ hră rơkâo Tơlơi pơtaih đưm Bình Định dưi hơmâo UNESCO tŭ yap jing Gru grua bơngăt jua mơ̆ng ană mơnuih ta.

Tui hăng yă Nguyễn Thị Thanh Lịch, Kơ-iăng khua Jơnum min mơnuih ƀôn sang tơring čar Gia Lai, tơring čar ƀơ ƀrư̆ pơđĭ tui hơbô̆ bruă “bơwih ƀong kơnang kơ gru yom mơ̆ng đưm”, amăng anun hơmâo tơlơi pơtaih đưm jing sa amăng hơdôm anŏ yom akŏ phun đah mơ̆ng čơkă tuai hyu ngui, gru grua, hăng pơbưp nao rai jar kmar kơtang hloh. Mơ̆ng rim wơ̆t jơnum ngui, hơdôm khul grup thâo taih amăng čar ta hăng čar rơngiao dưi pơbưp, hrăm nao rai, huăi hŭi kơ phara pơ tơlơi pơhiăp ôh, abih bang mut hrŏm hăng tơlơi pơtaih, mơ̆ng anun ngă kjăp tui tơlơi rô nao rai, jê̆ giăm, bang hyu pran jua hor hrăm taih mơ̆ng Việt Nam: “Tơlơi gơmơi kiăng mơ̆ng hơdôm mông jơnum ngui lĕ, khul grup thâo taih amăng dêh čar ta dưi hrăm, pơbưp nao rai, yom hloh dong pơbưp hăng mơnuih čar rơngiao, pơƀuh hyu anŏ hiam yom hloh mơ̆ng tơlơi thâo taih mơ̆ng Việt Nam. Hơmâo mơn anŏ phara gru grua, tơlơi pơhiăp samơ̆ hăng hơdôm tơlơi taih, bơpơtaih nao rai jing ngă kjăp tui tơlơi khăp ƀu-eng. Laih anun lu thun rơgao, tơlơi pơtaih đưm mơ̆ng tơring čar hơmâo lu tơlơi lăp đing nao prong biă mơ̆ng djŏp khul grup thâo taih ƀơi rŏng lŏn tơnah. Mơ̆ng 9 wơ̆t pơphun, jing hơmâo tơlơi khăp, thâo lăp đing nao prong biă hăng ƀing tuai mơ̆ng čar rơngiao”.

Mơ̆ng hơdôm wơ̆t bơpơtaih truh kơ bruă pơƀuh anŏ hiam wŏ, đă, taih mơ̆ng hơdôm rơbâo čô mơnuih, mơ̆ng pơbưp gah gru grua truh kơ čang rơmang ba gru yom mơ̆ng Việt Nam hrưn đĭ pơ jar kmar, bruă pơplông pơtaih gru đưm ƀơi Gia Lai glăk brơi ƀuh tơlơi hơdip kjăp khŏm mơ̆ng sa djuai gru yom đưm hlâo ƀu kơnong djă pioh amăng tơlơi hrăm taih đôč ôh, ăt hơmâo tŏ tui hăng tơlơi khăp, tơlơi pơ-ư pơ-ang, hăng tơlơi glăm ba mơ̆ng rơnuk anai./.