Ƀơi ƀut plơi Ƀon Đưng 1, phương Lang Biang-Đà Lạt, ơi Păng Ting Sin, mơnuih djuai ania K’ho tui djuai Lạch, hơdôm thun laih ăt gir run pơtô glăi čing hơgor, tơlơi adôh, tơlơi ayun suang hăng djop djuai gông brô̆ gru grua djuai ania. Ñu lĕ sa čô khua git gai Ping gah, laih dong lĕ pô ngă akŏ grup atông čing Ƀon Đưng hăng 15 čô ding kơna, ñu lêng kơ lăng bruă djă pioh gru grua lĕ tơlơi glăm ba mơng ñu pô hăng ană plơi pla.  “Tơdah ƀing gơmơi ƀu djă pioh hăng tŏ tui gru grua djuai ania, ñu amra rơngiă gru grua yôm phara. Hăng mơnuih djuai ania ƀiă dŏ hơdip ƀơi tơkai čư̆ Lang Biang, ƀing gơmơi kiăng pơtô glăi ană tơčô mô yâo, sit biă ñu lĕ gru grua čing hơgor, tơlơi adôh, tơlơi ayun suang. Djă pioh hăng tŏ tui gru grua mơnuih djuai ania gơmơi, hăng pơtô brơi rơnuk tơdơi dong.”

Mơng ƀing kơhnâo kơhnăk dŏ amăng hơdôm boh plơi pla amăng tơring čar Lâm Đồng, pran khăp kơ gru grua glăk hơmâo pơjao glăi rơnuk tơdơi dong. Tŭ mă tơlơi pơtô hrăm mơng ƀing kơhnâo kơhnâo, ƀing hlăk ai ră anai ăt glăk tŏ tui bruă djă pioh gru grua. Ayong Kră Jăn Jun Guy, mơnuih djuai ania K’ho tui djuai Lạch dŏ amăng ƀut plơi Dang Ja, phương Lang Biang-Đà Lạt lĕ ding kơna amăng grup mơnuih kơhnâo hơmâo 22 čô ding kơna. Hăng ñu pô, rĭm wŏt hyu atông čing ƀu djơ̆ kơnong kiăng lăi pơthâo gru grua đôč ôh mơ̆ ăt kiăng rơnuk hlăk ai čơđai pơ-ư ang dong kơ gru grua djuai ania. Ayong Kră Jăn Jun Guy brơi thâo: “Hơdôm tơlơi mơ̆ ơi yă ƀing ta pioh glăi anun lĕ tơlơi adôh, đing ayŭp, hơdôm tơlơi ayun suang …kiăng tŏ tui djă pioh hăng pơtô brơi rơnuk ană tơčô mô yâo. Ƀing ta anăm rơngiă hĭ hơdôm gru grua yôm phara mơng djuai ania pô”.

Ƀơi kual plơi pla ƀơi tơkai čư̆ Lang Biang, jua čing hơgor ăt dŏ hmư̆ bang rĭm wŏt plơi pla ngui ngă yang. Amăng khuông mơñam mrai, ƀing amĭ, ƀing amai ăt glăk dŏ hơngah abăn ao hăng lu rup rap hiam pioh glăi mơng djop rơnuk. Yă Bon Jô Liên, kơ-iăng Khua Jơnum min djop djuai ania mơnuih mơnam Việt Nam, Khua khul pơlir hơbit đah kơmơi phương Lang Biang-Đà Lạt pơsit tong: “Ƀing mơnuih arăng đăo gơnang ƀơi phương Lang Biang-Đà Lạt lĕ ƀing gơgrong phun. Ƀing gơmơi lĕ mơnuih tơkuh nao rai kơplah wah Ping gah hăng mơnuih ƀôn sang kơ hơdôm tơlơi črâo trun, hơdră bruă mơng Ping gah, tơlơi phiăn mơng Kơnuk kơna kiăng mơng anun mơnuih ƀôn sang jê̆ giăm Ping gah ƀiă, giăm hăng Kơnuk kơna. Blung hlâo ƀing gơñu lĕ mơnuih ba gru, tơdơi anun ƀing gơñu pơtô pơblang brơi rĭm boh sang anŏ hăng plơi pla gum hrŏm ngă tui tơlơi črâo trun mơng Ping gah, hơdră bruă, tơlơi phiăn mơng Kơnuk kơna brơi klă hloh”.

Ƀơi să Đơn Dương, anih mơnuih djuai ania ƀiă hơmâo giăm 40% mrô mơnuih, lu plơi pla pơkra gơnam sô hơđăp hăng hơdôm grup atông čing ăt tŏ tui na nao yua hơmâo tơlơi mut hrŏm mơng mơnuih arăng đăo gơnang. Yă Lê Thị Hồng Nhung, kơ-iăng Khua anom bruă gru grua-mơnuih mơnam să Đơn Dương brơi thâo: “Să Đơn Dương hơmâo sa boh plơi pla pơkra bưn ia kông ƀơi plơi Ha Wai, laih anun mơñam rêu rô ƀơi plơi Đa Hoa, hăng hơmâo sa grup atông čing. Ƀing mơnuih arăng đăo gơnang gum hrŏm pơtô pơblang tơlơi črâo trun, hơdră bruă mơng Ping gah kah hăng pơblang brơi bruă tŏ tui gru grua pơkra gơnam sô hơđăp amăng plơi pla. Ƀing gơñu gum hrŏm hăng khua plơi, Khua git gai Ping gah kah hăng hơdôm gơnong bruă, sang bruă, khul grup, tơring đăo gum hrŏm hăng ƀon lan amăng bruă djă pioh phiăn juăt amăng plơi pla”.

Mơng hơdôm khuông mơñam mrai ƀơi Dă Huoai, Cát Tiên truh pơ jua čing hơgor hmư̆ bang amăng kual glai čư̆ Lang Biang, ƀing ta amra ƀuh gru grua glăk hơmâo ngă mơdưh mơng tơkai tơngan ană plơi pla. Gru grua hơmâo djă pioh, pơtô glăi hăng pơlir hăng bruă pơđĭ kyar tuai čuă ngui ăt lĕ hơdră bruă kiăng pơjing anŏ yôm gru grua jing bruă pơtrut pơđĭ kyar bơwih ƀong huă, pơjing Lâm Đồng pơđĭ kyar tañ, hơđong kjăp./.