Ơi Liêng Hót Ha Chong (djuai ania K’Ho), thun anai rơbêh 95 thun laih, dŏ pơ plơi Dạ Kao 2, să Dam Rông 4, tơring čar Lâm Đồng ră ruai glăi, ơi yă ñu đưm mơ̆ng tơring čar Dak Lăk nao dŏ pơ Lâm Đồng, ĕp anih pơdong plơi mơ̆ng rơbêh kơ sa rơnuk thun hlâo laih. Yua jê̆ giăm, pơbưp nao rai re se mơn, anun jing mơnuih ƀôn sang pơ anai thâo pơhiăp 3 tơlơi mơtăm: Êđê, K’Ho hăng Mnông. Kiăo tui tơlơi pơtrun mơ̆ng Ping gah hăng Kơnuk kơna, djuai ania K’ho Cil huăi đuăi plơi dong tah. Rim boh sang anŏ, kơnung djuai thâo ruah mă lŏn tơnah či pơdong sang, dŏ hơdip mơda, ngă hmua pla pơjing. Lơ̆m ĕp ƀuh anih pơdong sang hiam, sang anŏ iâu lăi kơ yang mơtăm yơh: “Ơ yang lŏn, yang angin hơjan, yang ia glăi lăng hăng pap brơi kơ lŏn kual lŏn anai hơmâo pơdai jor kơtor lu, rơkâo brơi kơ lŏn anai rơnuk rơnua, yâo mơak, plơi pla huăi djơ̆ djuam duam ruă, huăi djơ̆ klin rin rơpa, brơi abih bang hiam drơi jăn pran jua...”

Hlâo či pơdong sang, pô sang prăp lui gơnam ngă yang hơmâo sa čeh tơpai drơi mơnŭ, iâu yang lŏn. Yă Bon Krong K’Ang ƀơi plơi Dạ Nhim 1, să Dam Rông 4 brơi thâo, tơlơi ngă yang rơbang mơ̆ng djuai ania K’ho leng kơ hơmâo yang rơbang soh yơh lăng ba, bruă pơdong sang jing bruă prong anun ta khŏm hơduah kơ yang lŏn: “Iâu yang čư̆, yang glai, yang lŏn, yang plơi pla glăi lăng brơi pô sang hrơi anai rơkâo pơdong sang pơ anai. Anai jing tơlơi phai yang đĭ sang phrâo mơ̆ng ơi yă gơmơi mơ̆ng đưm laih, ƀu dưi lui ôh, laih anun ană tơčô mô yâo khŏm djă pioh yơh tơlơi phiăn hiam  anai”.

Tơdơi kơ pơkra sang giong, pô sang ngă yang đĭ sang phrâo, ngă mă amăng sang anŏ đôč. Gơnam ngă yang tui hăng tơlơi phiăn đưm lĕ sa drơi asâo hăng sa drơi bip. Drah asâo hăng drah bip hơmâo hơprah jum dar sang, puh đuăi drĭ driang, rơhung atâo jrao gun, klin mơ̆ng ngŏ pŏ mơ̆ng yŭ, iâu ơi yă đưm lăng ba brơi atur sang kjăp, bưng bôt, tơphă tơphai.

Lơ̆m ngă yang giong, sang phrâo hmư̆ jua mơñi dik dak ok or yơh. Pô sang atông čing lăi pơthâo brơi djŏp plơi pla. Hmư̆ jua čing mơñi, neh met wa nao ngui tom. Ngă yang đĭ sang mơ̆ng djuai ania K’Ho đưm adih mơak biă, hơmâo pơtum lu mơnuih biă mă. Hrơi mơak anai ƀu djơ̆ ƀong huă mơñum tơpai đôč ôh, anun lĕ anŏ gum pơgôp, jê̆ giăm: mơ̆ng ƀing tha truh kơ čơđai, tơdăm dra apăn tơngan ayun suang. Hơdor glăi kơ tơlơi ngă yang anai, yă Rơ Yam K’Jang pơ plơi Dà Nhinh 1, să Dam Rông 4 lăi: “Amăng hrơi ngui mơak djơh anai, ăt kar hăng hrơi ngui bơyan pơdai, huă asơi hle, gơmơi adoh tong, adoh pơ̆t mơak hrŏm hăng sang anŏ, sang anŏ hlơi hơmâo kơbao lĕ ƀong kơbao, hơmâo rơmô ƀong rơmô...tha, čơđai, tơdăm dra ƀong huă, mơñum tơpai, adoh akhan, apăn tơngan suang mơak biă....anun jing gru hiam mơ̆ng ơi yă gơmơi đưm pioh glăi, ƀu dưi lui ôh, ta khŏm djă pioh yơh”.

Ngă yang pơdong sang hăng đĭ sang phrâo mơ̆ng djuai ania K’Ho Cil ƀơi Lâm Đồng ƀu kơnong bruă hyu ĕp anih dŏ đôč ôh, ăt pơ ala brơi tơlơi hơdip pơtruh plơi pla hăng pơpŭ kơ lŏn dap kơdư, ơi yă ta đưm. Anun jing glông phun gru grua, jing anŏ hiam amăng tơlơi ngă yang, tơlơi khăp ƀu-eng plơi pla, kơnung djuai, phung wang, djru gru grua mơ̆ng djuai ania K’Ho Cil dŏ hơdip na nao truh rơnuk tơdơi./.