Tal pơplông anai hơmâo 79 grup nao lông hrŏm hăng 158 čô mơnuih mơgăt rơdêh dêh čar ta, 1 grup ƀing mơgăt rơdêh mơ̆ng jar kmar, nao pơplông hrŏm hơmâo lu anom bruă pơkra rơdêh hăng anăn djuai rơdêh ôtô phrâo. Rơnoh prăk apah bơni kơ hlơi mă pri mrô sa lĕ 500 klăk prăk, tal pơplông anai pơpha jing lu hnơ̆ng apah bơni, kah hăng, khin mut hyu amăng glai, kơdâo amăng dơnao, ia čroh hnoh, ƀing kơhnâo rơgơi, beč bal  amăng anih hŭi rơhyưt. Pơplông anai pơphun ƀơi plơi prong Gia Nghĩa hăng amăng kual glai klô Nâm Nung, să Nâm N’Jang, tơring glông Dak Song.

Khul khua mua pơphun tal pơplông hơmâo pơčrâo brơi 25 arăt jơlan či pơplông hăng anih pioh kơ mơnuih ƀôn sang nao ĕp lăng. Ơi Hồ Anh Tuấn, Kơ-iăng Khua grup pô rơdêh đĭ čư̆ čan Sài Gòn, Khua khul pơphun tal pơplông anai lăi, tal pơplông anai kiăng pơtrut pran jua hor kơ bruă pơkjăp drơi jăn hăng mơgăt rơdêh đĭ čư̆ čan tơpă đôč amăng dêh čar. Tal pơplông ƀu kơnong ba brơi tơlơi thâo thăi, găn rơgao tơlơi hŭi rơhyưt kơ mơnuih hor đĭ rơdêh hmar, hyu amăng glai klô đôč ôh, anai dŏ jing mông gêh găl kiăng ĕp ƀuh mơnuih rơgơi kơhnâo, khin hơtai hơmâo pran jua kơtang pơplông laih anun lăi pơthâo anih anom glai klô pioh pơtrut tuai hyu ngui amăng tơring čar Dak Nông.