-Ơ yă Nguyễn Thuỵ Phương Hiếu, bruă tuai čuă ngui ƀơi tơring čar Dak Lak hơmâo djă jă gru hiam djop djuai ania, djă pioh lŏn mơnai glai klô, anăp nao ngă bruă pơđĭ kyar bruă tuai čuă ngui hơđong kjăp. Tơlơi anai, dưi hơmâo mơ̆ng anăp pơđĭ kyar kơ tơring čar hiư̆m lĕ ?

-Yă Nguyễn Thuỵ Phương Hiếu : Tơring čar Dak Lak hơmâo pơtong rơđah anŏ gêh găl mơ̆ng pô lĕ pơđĭ kyar bruă tuai hyu ngui lăng glai klô kyâo pơtâo, gru grua hiam amăng plơi pla. Hăng 49 djuai ania dŏ hrŏm ăt sa tơlơi gêh găl bruă mă kơtang mơ̆n hăng Dak Lak, pơkă hăng lu tơring čar pơkŏn, pơjing rai gơnam tam pơhưč lu tuai rơnguai rai pơ tơring čar.

Ping gah tơring čar hơmâo ngă hră akŏ bruă pơđĭ kyar bruă tuai hyu ngui, anai lĕ atur pioh kơ djop anom bruă, djop tơring glông, plơi prong pơtum pok pơhai 3 mơta bruă mă phun kơ tuai hyu ngui, kah hăng plơi prong Ƀuôn Ma Thuôt, tơring glông Lak hăng Ƀuôn Đôn. Hơdôm tơring glông pơkŏn amra jing čơƀeng djru hrŏm kơ bruă čơkă tuai, pơkra hơdră čơkă tuai hyu tui hluai tuôr. Dak Lak dŏ amăng anih anom gru grua hiam čing hơgor hư̆ hing lŏn tơnah, ăt hơmâo tơlơi ƀuăn hăng UNESCO kơ bruă djă pioh čing hơgor. Amăng thun blan mơ̆ng thun 2021-2025, tơring čar hơmâo ngă hră pơtrun kơ bruă čing hơgor, hră pơtrun djru mơnuih ƀôn sang djop plơi pla, pơđĭ tui bruă čơkă tuai hyu ĕp lăng gru grua atông čing amăng plơi. Pơtum djru pơhrăm mơnuih mă bruă, hơdôm kơčăo bruă, jơlan hơdră pơđĭ kyar bơwih ƀong huă amăng kual mơnuih ƀôn sang djuai ƀiă, pơtrut ngă tui akŏ pơjing anih anom phun pioh čơkă tuai kiăng djă pioh gru grua hiam, laih anun pơđĭ kyar gơnam sĭ mơdrô kơ tuai hyu ngui.

-Hrơi blan lĕ bruă pơđĭ kyar ba tuai hyu ngui tui hơdră anai hơmâo boh tơhnal laih hă ƀudah aka ôh ?

-Yă Nguyễn Thuỵ Phương Hiếu : Rim thun rơnoh pơđĭ kyar gah bruă tuai hyu ngui, wơ̆t prăk pơhrui glăi mơ̆ng bruă tuai hyu ngui hăng čơkă tuai lêng kơ đĭ soh mơ̆ng 10-15%, wơ̆t hăng tuai amăng dêh čar hăng tuai jar kmar. Mah tui anun, găn rơgao 2 thun hơmâo hĭ klin kheng Covid 19 ngă, jing tơ̆i đưn bruă čơkă tuai samơ̆ rơnoh pơđĭ kyar mơ̆ng thun 2021-2025 ăt rơgao mơ̆n hăng hnơ̆ng pơkă.

-Pơđĭ kyar bruă tuai hyu ngui ĕp lăng lŏn glai hăng gru grua hiam jing anŏ gêh găl hơmâo laih hlâo, lơ̆m anun lu tơring čar, ƀôn prong pơkŏn ăt hlăk ngă tui hơdră anai mơ̆n, yua kơ anun tơring čar Dak Lak ngă hiư̆m pă pioh lăi pơthâo gru grua hiam phara hơjăn ƀơi tơring čar hơmâo brơi kơ tuai thâo, hmư̆ hing rai lĕ?
-Yă Nguyễn Thuỵ Phương Hiếu : Amăng bruă či ngă pơ anăp adih čơkă tuai hyu ngui tơring čar hơmâo pơkă tơhnal bruă lir hơbit lu mơta, ngă hrŏm lu tơring čar pơkŏn, tơring čar ruah mă hơdôm anih hơmâo tuai hyu ngui lu laih anun hơmâo pơtruh nao rai jơlan rơdêh por nao rai hăng Dak Lak. Ră anai, tơring čar hơmâo ngă hrŏm 14 boh tơring čar, ƀôn prong hăng sa khul ngă hrŏm mơ̆ng anom tuh tia pơkra ming ƀơi ƀôn prong Hồ Chí Minh. Yua kơ hơmâo ngă hrŏm, lir hơbit amăng bruă anun hơdră pôr pơthâo bruă mă ăt khom dăp hơdră, pơtum lăi nao kơ anŏ gêh găl, tơlơi kơtang hơmâo mơ̆ng hlâo kah hăng ia rơsĭ hăng glai klô. Hăng anih hyu čuă ngui pơ jar kmar ƀudah pơhưč tuai mơ̆ng jar kmar lĕ kơnang kơ hơdôm anih kah hăng tơring čar Khánh Hòa, Hà Nội, ƀôn prong Hồ Chí Minh pioh pơhưč tuai rơnguai rai pơ tơring čar. Prăp lui, ngă hrŏm bruă pơtom hiăp pioh pôr pơthâo, pơlar lu rup rap, anŏ gêh găl, ană mơnuih mơnam mơ̆ng Dak Lak kơ djop tơring čar thâo.

-Ơ lah, kah hăng ih hơmâo lăi anun, pơđĭ tui anŏ gêh găl, pran kơtang mơ̆ng rim boh tơring čar, pơtruh nao rai kual ia rơsĭ hăng glai klô pioh pơdjru nao rai tơdruă lĕ jing sa bruă mă mơ̆ Dak Lak lir hơbit, pơtrut bruă čơkă tuai hyu ngui. Tui anun, kơnong ƀơi tơring čar Dak Lak lĕ amra pơđĭ tui bruă tui hyu ngui hiư̆m pă kiăng pơhưč ƀing tuai hăng pơkong pran jua tuai hor dŏ glăi ngui sui hloh lĕ ?

-Yă Nguyễn Thuỵ Phương Hiếu : Yua hơgĕt anăp brơi mă bruă kơ djop sang bruă bơwih ƀong sĭ mơdrô pơkra ming gơnam tam sĭ mơdrô phrâo, kơnang kơ atur gru grua hiam djuai ania, pioh pơjing rai anŏ phrâo, phara hloh. Pơđĭ tui boh tŭ yua amăng bruă mă, mơ̆ng tơlơi git gai wai lăng, pơphun pơtô hrăm, pơtô glăi mơnuih mă bruă amăng tơring čar truh pơ djop anih, kiăng dưi ngă djop bruă jao rơnuk phrâo pơhưč ƀing tuai rơnguai. Pơtrut kơtang bruă mă mơ̆ng khul čơkă tuai hyu ngui, akŏ pơjing khul anet, grup mơnuih mă bruă, pơđĭ tui anŏ gêh găl, kơtang lu bruă mă ngă hrŏm, kơnang mơ̆ng tal jơnum prong, ngă yang ngui ngor mơak gah gru grua hiam djuai ania ƀudah kơnang kơ tal pơplông porơguăt drơi jăn mơ̆ Dak Lak pô pơphun, kiăng pơhưč ƀing tuai rai pơ tơring čar dŏ glăi, hyu ngui mơak.

Amăng blan 10 thun anai, Gơnong bruă Gru grua pơrơguăt drơi jăn hăng tuai čuă ngui pơthâo hăng Jơnum min mơnuih ƀôn sang tơring čar kiăng rơkâo pơphun bruă mă, pơtong glăi anŏ ngă hrŏm lir hơbit, mơ̆ng anun ngă atur dăp hơdră, čih pơkra akŏ bruă či ngă hrŏm thun blan pơ anăp tŭ yua hloh. Laih dơ̆ng, Khul ngă hrŏm tuai čuă ngui tơring čar Dak Lak ăt amra akŏ pơjing 2 khul grup dơ̆ng, jing grup ƀing ngă bruă gah sang jưh tuai hăng mơnong ƀong huă laih anun khul grup ƀing ba hyu tuai, pơđĭ tui anŏ kơtang, tơlơi gêh găl pơđĭ kyar bruă tuai čuă ngui hyu lăng glai klô, plơi pla djop ƀôn lang amăng tơring čar.

-Ơ lah, bơni kơ ih lu hŏ yă Nguyễn Thụy Phương Hiếu, Kơ-iăng Khua Gơnong bruă Gru grua, Pơrơguăt drơi jăn hăng Tuai čuă ngui tơring čar Dak Lak hơmâo pioh mông bơ ră ruai hrŏm anai.