Tong krah ia iom mơtah mơda hla kyâo amăng glai Nâm Nung, hmư̆ jua ia rô mơ̆ng drai ia Leng Ôm Rveh uk ak, kah hăng tơlơi jak ba tuai mut nao amăng kual lŏn pơdrong gru ama grua amĭ djuai ania Bơnông pơ anai.

Ayong Y Kruê̆, Khua khul ba tuai hyu ngui dŏ glăi amăng glai klô mơ̆ng Grup tuai hyu ngui amăng plơi pla Yôk Nâm Nung, să Nâm Nung, tơring čar Lâm Đồng brơi thâo:

“Tui hăng tơlơi ruai glăi mơ̆ng ƀing tha, đưm adih kual lŏn anai hơmâo sa drơi rơman lê̆ trun amăng drai ia hlong djai pơ anai. Sui ƀiă tơdơi kơ anun, drơi rơman djai brŭ hiă anun kah mơnuih ƀôn sang mơ̆ng ƀuh, mơ̆ng thâo. Mơnuih ƀôn sang hmư̆ tơlơi ră ruai anun, hlong pơ anăn kơ drai ia “Ôm Rveh”. Lăi pơthâo hăng tuai, gơmơi juăt pơblang glăi “Drai rơman brŭ” ƀudah ia rơman djai drai ia brŭ, kiăng ƀing tuai thâo. Bơyan anai nao ngui pơ anun mơak biă mă, yua adai rơ-ơ̆ rơ-iŏm, ia jơngeh, glai klô jum dar mơtah mơda, anun lu tuai hor biă mă”.

Tơlơi ră ruai glăi djơh hăng anun, dŏ djă pioh na nao mơ̆ng rơnuk anai, truh rơnuk pơŏn, anun yơh sit ba hyu ƀing tuai arăng hmư̆ ñu mơak, ƀu kơnong pơhưč tuai đôč ôh, djuai ania Bơnông pơ anai dŏ djă pioh tơlơi čăng glăi mơ̆ng đưm amăng plơi pla. Mơ̆ng rơnoh yom gru grua anun, jơlan hơdră pioh kơ mơnuih djuai ania Bơnông lăp pơ-ư ang kơ glai klô, kông ngăn gru grua yom pơphăn, anun thun 2022, hơdôm boh plơi ƀon Jarah, Yôk Ju hăng Rkâp hơmâo akŏ pơjing grup ba tuai hyu ngui amăng plơi pla, glai klô Yôk Nâm Nung kiăng ba gru hiam tơlơi phiăn đưm djuai ania pô jĕ giăm hăng ƀing tuai hloh. Tơ tă anai, hơmâo rơbêh 40 ding kơna, pơpha lu khul, grup djă piho gru grua hiam đưm plơi pla, pơdong sang dŏ, čơkă tuai homestay, dŏ glăi ƀong huă laih anun hyu hmua hăng ană plơi pla. Rim čô mơnuih čơkă tŭ sa bruă ngă, hrŏm hơbit pơjing rai gơnam tam brơi kơ tuai thâo jing gơnam tuai hyu ngui djă pioh angin suă jua, ba pran đưm djuai ania Bơnông.

Nao pơ Yôk Nâm Nung, tuai ƀu kơnong hyu sem lăng hơdôm blah đang glai klô, lŏn mơnai, drai ia đôč ôh, dŏ sem lăng bruă mă, tơlơi dŏ dong ƀong huă, hơdip mơda rơnuk rơnua amăng ƀôn lan, plơi pla hnong hnăi laih anun  hyu hơduah ĕp gru grua ngă hơkrŭ ƀơi Anom gru grua djă pioh gru phun dêh čar B4-lir hơbit tơring kual IV Nâm Nung.

Biă mă ñu, amăng bơyan ngă yang kah hăng Tăm Blang Mprang ƀudah ngă yang iâu ia hơjan, ƀing tuai dŏ hrŏm ană plơi pla, ĕp bruă ngă bơwih brơi tơlơi ngă yang gru grua đưm djuai ania Bơnông, hmư̆ ik jua čing ing jua hơgor, adoh pơtưh tơdăm dra hăng lăng bruă pĕ kơpaih rơngaih mrai, mơñam eng ao gru grua đưm, mơñam bung bai rêu rô, rơ-i čơkua….Hrŏm hăng anun, ƀing tuai amra ƀong añăm mơnŭ ăm, pơhang amăng apui djuh a apui hơdăng ƀâo bơngưi biă mă, huă asơi brông đing djrao, de, ale pơ-ô, añăm hla plum pơpao hna hăng rơmă bui ƀudah akan k’hul, mơñum tơpai čeh…Yă H’Thương, Kơ-iăng Khua anom gru grua-mơnuih mơnam gah anom bruă khul pơ ala mơnuih ƀôn sang să Nâm Nung, Khua wai lăng Grup ba tuai hyu ngui amăng plơi pla, glai klô Yôk Nâm Nung brơi thâo:

“Grup ba hyu tuai amăng plơi pla gơmơi hơmâo čơkă lu khul tuai rai ngui mơ̆ng dêh čar Italia, ƀôn prong Hồ Chí Minh, Hà Nội. Biă mă ñu amăng bơyan ngui ngor ngă yang mơak, tuai rai ngui lu biă mă. Lu tuai mơ̆ng tač rơngiao amuaih dŏ glăi hăng mơnuih ƀôn sang, sem lăng tơlơi phiăn đưm, tơlơi ngă yang, ngui ngor, truh pơ bruă trun hmua ia djuh kiăng kiăo tui sem tơlơi hơdip mơda ană plơi pla. Gơmơi ngă bruă čơkă tuai hyu ngui lĕ, lir hơbit hăng ƀôn Čuah, să Nam Đà dơ̆ng. Pơ anun, hơmâo lŏn mơnai glai klô hiam, gơmơi jak iâu grup atông čing suang arap bơwih brơi ƀing tuai lăng. Rơngiao kơ bruă čơkă tuai hyu ngui lĕ, gơmơi hơmâo lu anih tuai nao ngui kah hăng Drai Sap jak iâu nao pơdah atông čing, suang brơi tuai lăng”.

Yă Trần Thị Kim Tuyền, Kơ-iăng Khua anom bruă Gru grua-Mơnuih mơnam să Nâm Nung brơi thâo, să hlăk gir run djă pioh, pơlar tui tơlơi gêh găl lŏn mơnai glai klô, gru grua ngă  hơkrŭ đưm kơ lŏn ia hăng gru grua hiam djuai ania ƀiă pioh pơđĭ kyar bruă tuai hyu ngui amăng plơi pla. Rơđah biă mă ñu, Ping gah, gong gai plơi pla ăt anăp nao pơđĭ kyar brơi tuai hyu ngui ĕp lăng anih ngă hơkrŭ B4-lir hơbit tơring čar Iv Nâm Nung, laih dơ̆ng pơtruh nao rai hăng lu anom bruă ba tuai hyu ngui hăng plơi pla ieo gah pioh pơjing rai lu mơta gơnam kơ tuai hyu ngui ĕp lăng apah yua ngă anŏ phara.

“Ră anai, grup ba hyu tuai amăng plơi pla, glai klô Yôk Nâm Nung hơmâo 42 čô ding kơna. Să anăp nao bruă ngă pơđĭ kyar čơkă tuai hyu ngui amăng plơi pla, hlong nao truh pơ anih hơkrŭ đưm B4-Lir hơbit tơring kual IV Nâm Nung jing gru grua phun dêh čar wai lăng. Lu gơyut hlăk ai amăng să djru hrŏm, ba hyu tuai trekking amăng glai, hyu ĕp lăng, trun pơ hnoh ia sem drai ia hăng lu tơlơi ngui ngor mơak. Rơngiao kơ bruă pơphun brơi tui hyu ngui Yôk Nâm Nung, să ăt anăp nao pơđĭ kyar bruă tuai hyu ngui amăng plơi pla ƀon Jarah”.

Plah wah amăng anih hơdip lŭk pŭk gru grua đưm hăng tơlơi hơmâo rơnuk anau, djuai ania Bơnông ƀơi Yôk Nâm Nung, să Nâm Nung, tơring čar Lâm Đồng ăt sơ̆n pran jua dŏ djă pioh čing hơgor, djă pioh tơlơi adoh đưm, bruă ngă pĕ kơpaih rơngaih mrai, mơñam eng ao, abăn khăn, mơñam rơ-i čơkua, rêu rô, bung bai đưm plơi pla. Ƀing tuai nao ngui dŏ glăi kiăng lăng, ĕp tui tơlơi hơdip mơda, dŏ dong ƀong huă mơ̆ng mơnuih ƀôn sang, bruă ngă anun gêh găl kơ mơnuih ƀôn sang pơđĭ kyar čơkă tuai hăng jing rơnoh yom gru grua đưm djuai ania Bơnông dŏ djă pioh hăng pơlar tui dơ̆ng.