Tơlơi pơplih phrâo amăng jơlan hơdră ngui ngor atông čing hăng anăn “Jua mơñi mơ̆ng hrơi pơdô̆” pơƀuh glăi tơlơi phiăn tŭ han amăng hrơi pơdô̆ mơ̆ng djuai ania Êđê. Ƀơi yŭ phun kyâo prong, ƀing kơhnâo ƀuôn Tơng Jŭ, phường Ea Kao pơƀuh glăi djŏp tơlơi phiăn nao tŭ han (iâu glăi pơ sang bơnai) mơ̆ng djuai ania Êđê. Rak lan nao tŭ han tâo, pô han anun găn rơgao lu tơlơi lông kah mơ̆ng dưi. Pô đah rơkơi brơi kông hăng gơnam pơpŭ kơ kơnung djuai, gơyut gơyâo dua bơnah ƀơ̆i hlâo či glăi dŏ pơ sang bơnai ñu. Hăng mơnuih djuai ania Êđê, kông pơ ala brơi tơlơi pơkhăp kjăp lui kơ djai ba, bơ tơlơi lông ƀơi lan nao tŭ han lĕ arăng čuih đôč, kiăng dua rơkơi bơnai dưi găn rơgao djŏp tơlơi lông, tơlơi tơnap tap, hơdip yâo mơak na nao.

Mơnuih kơhnâo Y Djing Adrơng, dŏ pơ ƀuôn Tơng Jŭ brơi thâo, bruă ba tơlơi phiăn anai brơi kơ ƀing tuai lăng jing bruă djă pioh gru ama grua amĭ mơn, pok rai tơlơi bơwih ƀong mơ̆ng bruă čơkă tuai hyu ngui dong: “Kâo pơ’ư pơ’ang biă mă lơ̆m nao lăng arăng pơƀuh glăi tơlơi phiăn tŭ han, hơdor glăi gru grua hiam mơ̆ng djuai ania Êđê. Ƀuôn Tơng Jŭ ră anai ngă bruă čơkă tuai, anai jing jơlan ngă bruă klă biă, djru brơi neh met wa hơmâo bruă mă, laih dong djă pioh gru ama grua amĭ kah hăng mơñam mrai, atông čing ƀudah pơƀuh glăi tơlơi ngă yang tui hăng hrơi anai. Kâo čang rơmang anŏ yom mơ̆ng gru grua djuai ania Êđê bang hyu djŏp anih, kiăng mơnuih mơ̆ng tač rơngiao hai hmư̆ hing laih djă pioh na nao”.

Tơdơi kơ pơƀuh glăi tơlơi ngă yang, ƀing tuai sem lăng, pơhmư̆ arăng atông čing, čing kông, čing kram, čing boh pơtâo, adoh tơlơi adoh tui yŭ er Dap Kơdư laih anun mơñum tơpai čeh. Hơdôm bruă mă anai kơđŏm glăi amăng pran jua ƀing tuai amăng čar ta wơ̆t hăng mơ̆ng čar rơngiao. Ơi Steve, mơ̆ng čar Scotland, brơi thâo, jua mơñi mơ̆ng čing hơdor, hăng jơlan gah plơi pla djă pioh gru grua ngă kơ ñu hor či hơduan ĕp biă: “Anai jing tal blung a kâo hơmâo sem lăng laih anun kâo lăng mơak biă. Kâo hor biă gong brô̆ mơ̆ng djuai ania Êđê. Tui hăng kâo, anŏ yom gru grua djơh anun kiăng hơmâo ba pơƀuh hloh ƀơi djŏp plang pôr pơhing, kiăng hơmâo lu mơnuih hmư̆ hing. Ƀơi anŏ ñu kâo pơwơ̆t glăi dong mơn”.

Tui hăng akŏ bruă, jơlan hơdră ngui ngor atông čing amra hơmâo pơphun rim tơđar ƀơi Sang djă pioh gru đưm Dak Lăk. Rim blan tơring čar amra pơƀuh sa tơlơi ngă yang, sa tơlơi phiăn mơ̆ng djŏp djuai ania pơ anai, gum djă pioh, răk lui gru grua đưm, hăng pơjing rai lu bruă bơwih brơi kơ ƀing tuai rơnguai./.