Hăng mơnuih djuai ania Hơdang ƀơi plơi Đăk Giá, să Dục Nông, tơring čar Quảng Ngãi, rim bơyan amăng thun leng kơ hơmâo tơlơi phiăn ngă yang, mơ̆ng tơjŭ pơdai pla kơtor, ngă yang pơdai huă asơi hle, ngă yang adai...Ƀơi sang rung, jua čing mut hrŏm hăng anŏ ƀâo mơnâo jơman mơ̆ng asơi brŏm đing, mơnŏng ŏm, ană mơnuih ta hơmâo pơtruh hăng yang rơbang, hăng lŏn adai hăng anih pơjing rai tơlơi hơdip.

Mơ̆ng anet truh kơ prong hơdip amăng anih gru grua djuai ania Hơdang, ơi A Khao pơ plơi Đăk Giá 1 hor adoh, hor atông čing. Jing mơnuih kơhnâo gru đưm, ñu pơtrut, tŭi apui brơi tơlơi hor anun kơ ană đah rơkơi hăng ƀing hlăk ai amăng plơi.

Mơnuih rơgơi kơhnâo A Khao brơi thâo, mơ̆ng thun 1960, lơ̆m ñu dŏ hrăm hră, ñu hor laih kơ tơlơi adoh đưm, kah hăng ayŏ, rơngê, ting ting...Tơhrơi ñu nao hrăm hră, mơmot glăi hrăm adoh, hrăm atông čing, pĕ goong ting ning...Gru grua đưm jing mut amăng drah kơtăk ơi A Khao laih. Lu thun rơgao, mơnuih kơhnâo A Khao gir nao adoh, atông čing, pơtô atông čing, pơtô suang kơ djŏp plơi pla amăng lăm hăng gah rơngiao tơring ñu. Tha plơi - mơnuih kơhnâo gru đưm A Khao brơi thâo:“Rim thun kâo juăt nao adoh, nao atông čing pơ tơring glông Ngọc Hồi (hơđăp), đa nao pơ plơi pơkŏn dong, kah hăng plơi Đăk Blái hlâo kơ hrơi gơñu nao atông pơ să, gơñu iâu kâo soh nao pơtô brơi tơlơi čing hăng tơlơi suang. Amăng thun rơgao, kâo nao atông lu wơ̆t laih pơ tơring čar, giong anun nao hrăm pơ Hà Nội, kâo hrăm lu tơlơi hiam biă...”

Ơi A Khao ră ruai, tơlơi apah bơni prong hloh hăng ñu ƀu djơ̆ hră bơni, hră pơsit ôh, anun lĕ jua čing ăt dŏ mơñi tơ-oa na nao amăng hrơi ngui, hrơi ngă yang, lơ̆m ƀing čơđai ăt dŏ hor hrăm atông čing, hrăm suang, hnun ñu kiăng.

Tŏ tui tơlơi gir mơ̆ng ama ñu, ayong A Phin - ană kơčua đah rơkơi ơi A Khao ăt hor kơ čing hơgor, goong brô̆ djuai ania Hơdang mơn. Tui hăng ñu, gru grua hơdip sit ta pơtŏp hrăm, hăng pĕ atông na nao đôč. Ră anai, plơi Đăk Giá 1 dŏ hơmâo sa grup atông čing 18 čô, laih dong akŏ pơdong sa grup čing hlăk ai dong. Hơdôm mông ngui ngor ngă yang ka hăng ngă yang pơdai, huă asơi hle, hrơi gum pơgôp djuai ania....ăt hơmâo pơphun djŏp tui tơlơi phiăn đưm, anih jua čing hrŏm hăng ayun suang mut hrŏm, eng ao đưm hơmâo buh, ngă brơi anih ngui ngor jai mơak, hiam ƀhêm gru grua đưm. Mơnuih kơhnăk A Phin lăi: “Gru grua, čing hơgor, ayun suang jing yom kơtang biă. Yua hơmâo Ping gah, Kơnuk kơna lăng ba rŭ pơjing glăi gru ama grua amĭ, ơi yă ta pơdô̆ glăi, kiăng kơ huăi wơr hĭ. Biă ñu, ƀing gơmơi leng kơ djă pioh răk lui goong brô̆ đưm, kah hăng čing hơgor, đing t’rơng, đing pơng, ting ning, kukur,...Ră anai gơmơi ăt iâu pơthưr ƀing kơhnâo djă bong hơđong grup atông čing, ayun suang, pơkra hăng mă yua goong brô̆ đưm. Gơmơi pơtô brơi hlăk ai čơđai muai, biă ñu lĕ čơđai mơ̆ng anih 7 truh anih 9”.

Lơ̆m jua čing ăt dŏ mơni, lơ̆m tơlơi adoh ăt dŏ hmư̆ amăng tơlơi adoh, lơ̆m hlăk ai ăt hơmâo pô pơtô brơi hăng pran jua hur har, tui anun bơngăt jua gru grua djuai ania Hơdang ăt dŏ hơmâo djă pioh na nao, bang hyu djŏp, hơdip kjăp hăng ană plơi pla lŏn Dap Kơdư.