Ƀơi ƀuôn Hai, tơlơi bơră ruai lăi nao bruă djă pioh gru grua djuai ania hơmâo pok pơphun mơng rĭm boh sang anŏ. Pơhmutu kar hăng sang anŏ ơi Y Yak Byă, arăng juăt iâu lĕ Ơi Khuê. Ră anai sang anŏ ñu ăt dŏ djă pioh sa ring čing hăng rơbêh 10 boh čeh djop mơta. Rĭm thun, sang anŏ gơgrong pơphun hơdôm tơlơi ngă yang anun lĕ ngă yang pin ia, ngui hăng amĭ ama hăng mut hrŏm hơdôm bruă ngui atông čing amăng plơi pla. Ơi Khuê brơi thâo: “Ră anai ƀing gơmơi ăt tŏ tui hăng pơtô glăi hơdôm tơlơi yôm gru grua djuai ania anun lĕ bruă atông čing hăng hơdôm tơlơi ngă yang brơi ană tơčô amăng sang anŏ. Sang anŏ gơmơi lêng kơ ba gru amăng bruă anai. Hơdôm tơlơi ngă yang mơng djuai ania Êđê lu biă mă, ngă yang pơ sang ƀudah pơ đang hmua, ngă yang čư̆, yang ia…Hơdôm phiăn juăt hiam klă ăt hơmâo djă pioh hăng pơphun na nao”.

Mơng tơlơi pơmĭn mơng rĭm boh sang anŏ ƀơi ƀuôn Hai mơ̆ gru grua djuai ania Êđê hơmâo tŏ tui. Lơm lu plơi pla bưp tơnap tap amăng bruă tŏ tui hơdôm bruă tui gru grua djuai ania ƀơi ƀuôn Hai, hơdôm tơlơi ngă yang pin ia, ngui hrŏm amĭ ama, ngui atông čing ăt dŏ pơphun na nao. Laih dong, hơdôm bruă tui gru grua mơng mơnuih ƀôn sang lêng hơmâo tơlơi gum hrŏm, gum djru mơng hơdôm hơdră bruă mơng kơnuk kơna. Ƀing mơnuih Ping gah, tha plơi, mơnuih arăng đăo gơnang juăt pơbưp nao rai, pơtrut pơsur mơnuih ƀôn sang mut hrŏm bruă gru grua plơi pla, laih dong pơtô brơi rơnuk tơdơi hơdôm anŏ hiam tui phiăn juăt mơng djuai ania Êđê. Ơi Y Bơ̆i Byă-Khua git gai Ping gah ƀuôn Hai, să Čư̆ Mta, tơring čar Dak Lak brơi thâo: “Kâo hrŏm hăng tha plơi, mơnuih arăng đăo gơnang lêng kơ pơtrut pơsur ƀing čơđai, laih dong ƀing gơmơi amra tŏ tui djă pioh hơdôm anŏ yôm gru grua djuai ania amăng tơlơi hơdip mơda. Abih bang hlô mơnong pioh kơ pơyơr đĭ yang rơbang, ngă yang pin ia, iâu hơjan hăng rơkâo tơlơi suaih pral lêng kơ tŏ tui hrup hlâo adih mơn”.

Ơi Y Bơ̆i Byă brơi thâo dong, yua kơ hơmâo hơdră djru mơng kơnuk kơna hăng tơlơi gum tơngan hrŏm, mơ̆ tơlơi hơdip kơ 132 boh sang anŏ hăng rơbêh 520 čô mơnuih ƀơi ƀuôn Hai jai hrơi pơplih phrâo. Tơlơi bơwih ƀong huă jai pơđĭ kyar, neh met wa jai răng kơđiăng ƀiă kơ bruă djă pioh, tŏ tui gru grua djuai ania. “Ră anai gơnong bruă gru grua hơmâo jao kơ ƀuôn Hai sa ring čing hăng hơdôm blah eng ao djuai ania Êđê. Amăng pran jua mơnuih ƀôn sang hok mơ-ak biă, laih dong ƀing hlăk ai čơđai ăt tŏ tui gru grua ngă yang rơbang hăng ngui atông čing kar hăng gru grua yôm phara amăng plơi pla. Hluai tui hơdôm tơlơi ngă yang anun lĕ ngă yang pin ia, neh met wa amăng plơi pla dŏ djă pioh hăng tŏ tui amăng tơlơi hơdip mơda.

Djă pioh gru grua djuai ania lĕ djă pioh atur phun hăng pơtô glăi anŏ yôm phara brơi kơ rơnuk tơdơi. Hăng tơlơi gum tơngan hrŏm mơng gưl Ping gah, gong gai hăng mơnuih ƀôn sang, gru grua djuai ania Êđê amăng ƀuôn Hai amra tŏ tui djă pioh, jing hrĕ pơlir ană plơi pla, pơgôp pơjing tơlơi hơdip gru grua jai hrơi hơmâo lu ƀiă dong hăng ngă atur brơi pơđĭ kyar hơđong kjăp amăng plơi pla./.