Show ngui “Sang Êđê” hơmâo pă črăn, pok blung hăng tơlơi ngui anăn “Tơlơi hơdor pioh” hăng tlâo črăn phun hơmâo “Dring gah”, “Gah” hăng “Ốk”. Tuai rơnguai amra hyu djop bơnah, pơƀuh glăi tơlơi hơdip mơng mơnuih djuai ania Êđê, mơng tơlơi hơdip pơlir hăng lŏn mơnai glai čư̆, luai pơnah, ngă đang hmua truh pơ tơlơi hơdip gru grua, pran hơdip pơlir hăng sang Êđê.

Hơdôm tơlơi adôh đưm, jua čing hơgor, gô̆ng brô̆ đưm, tơlơi akhan, tơlơi ngă yang hăng tơlơi hơdip ană plơi pla pơlir hăng tơlơi ngui adôh suang hơmâo dưm dăp, apui pơčrang hăng yua pơƀuh amăng măi mok. Anŏ phara mơng jơlan hơdră anai lĕ tuai rơnguai ƀu djơ̆ kơnong dưi lăng đôč ôh mơ̆ ăt dưi rơbat kiăo tui djop bơnah, pơmut hrŏm sa, dua mơta tơlơi ngui kiăng pơƀuh glăi, mơng anun thâo rơđah dong kơ tơlơi hơdip gru grua sô hơđăp mơng djuai ania Êđê.

Ƀing mơnuih mut hrŏm pơƀuh glăi lêng ƀing kơhnâo kơhnăk hăng mơnuih ƀôn sang djuai ania Êđê. Abih bang tơlơi ngui lêng yua boh pơhiăp tơlơi Êđê, pơgôp djă pioh gru grua djuai ania lơm ngui pơƀuh glăi.

Tui kiăo tui lăng, yă Lê Thị Lý, dŏ amăng phương Buôn Ma Thuột, tơring čar Dak Lak brơi thâo, jơlan hơdră ba glăi tơlơi mơ-ak lơm pơdah tơlơi hơdip, tơlơi pơdô̆ rơkơi bơnai, eng ao hăng gơnam buh mơng đah kơmơi djuai ania Êđê dưm hlâo adih. “Lơm kâo rai lăng ƀuh mơ-ak amăng pran jua. Kâo ƀuh tơlơi hơdip kơ mơnuih djuai ania ƀiă đưm hlâo hơmâo djop tơlơi mơn hăng anai lĕ gru grua kiăng răk pioh. Ăt ƀu pơmĭn Dak Lak dưi pơdah brơi sa jơlan hơdră ngui mơ-ak tui anai”.

Ơi Trần Hồng Tiến, Khua gơnong bruă gru grua, bơrơguăt drơi jăn hăng tuai čuă ngui Dak Lak brơi thâo, bruă ba măi mok amăng tơlơi ngui pơƀuh gru grua lĕ glông jơlan lăp djơ̆ hăng tơlơi rơkâo pơđĭ kyar bruă pơkra pơƀuh brơi gru grua, laih dong pok rai tơlơi dưi pơjing rai hơdôm gơnam čuă ngui phrâo, anăp nao pơjing gơnam tuai čuă ngui gru grua dưi pơhưč lu tuai rơnguai hăng hơmâo dong prăk pơhrui mơng gru grua plơi pla. “Ƀing gơmơi čang rơmang anai amra jing gơnam bơwih brơi tuai čuă ngui kiăng djru brơi gơnong bruă tuai čuă ngui pơđĭ kyar. Lơm tuai rơnguai rai pơ Dak Lak ngă hiưm pă kiăng dưi lăng hơdôm show pơƀuh glăi tui anai”./.