Hnơ̆ng jơnum ngui tal anai pơphun prong hloh kiăng kơ Dak Lak pôr pơthâo anăn păn boh durian ta juăt lăi sầu riêng, dưi pơtruh hăng lu anih sĭ mơdrô blơi tŭ, laih anun pơđĭ rơnoh yom gru grua hiam, tuai čuă ngui mơ̆ng kual lŏn Dap Kơdư hăng ter hang ia rơsĭ tong krah.

Đĭ pơhiăp ƀơi mông jơnum, ơi Đỗ Hữu Huy, Khua Jơnum min mơnuih ƀôn sang tơring čar Dak Lak brơi thâo, đơ đam tơring čar ră anai hơmâo 41.000 ha đang sầu riêng, rơnoh pĕ pơhrui amăng thun 2026 him lăng 500.000 tơn, kơnong thun 2025 sĭ mơdrô hơmâo pơhrui glăi 1,1 klai USD. Mơ̆ng anŏ gêh găl anai, Dak Lak hơmâo pơtong rơđah, kiăng pơđĭ tui rơnoh sĭ mơdrô gơnam hăng hơdră lir hơbit pơkra ming hăng pơđĭ tui anŏ tŭ yua hiam, hơduah ĕp thâo tong ten anih pla, sang bruă pơkra ming gơnam sĭ mơdrô mơ̆ng boh sầu riêng, logistics hăng anih sĭ mơdrô.

“Ƀing gơmơi khom pơblih kơtang mơ̆ng tơlơi pơmin wai lăng rơnoh hơmâo boh troh gơnam mơ̆ng đang hmua nao kơ bruă wai lăng rơnoh prăk sĭ mơdrô, anŏ hiam klă, mơnuih ƀôn sang ngă hmua pô tŭ mă rơnoh sĭ mơdrô, sang bruă mơdrô gum hrŏm blơi gơnam boh troh đang hmua hăng pơgang anăn gơnam sĭ mơdrô Dak Lak hơmâo pơtong brơi laih sit nik amăng anih anom sĭ mơdrô ƀơi jar kmar”.

Hăng pran jua mă bruă pơđĭ tui rơnoh gơnam sĭ mơdrô dưi pơdah thâo amăng lu ruăi ngă bruă tal Jơnum ngui bruă sầu riêng Dak Lak thun 2026. Hrŏm hăng jơnum pơtruh nao rai bruă pơkra ming, sĭ blơi sầu riêng hăng anih anom pơdă gơnam sĭ mơdrô boh troh đang hmua, ƀing tuai amra hyu sem lăng, mut amăng đang hmua ƀong boh durian ƀơi đang hmua mơtam, tal jơnum ngui anai pơphun lu bruă mă mơak, bơjuă nua sĭ mơdrô boh sầu riêng hăng jao ƀơi đang kơ pô blơi, jơnum ngui ƀong lăng 102 mơta mơnong ƀong pơkra mơ̆ng sầu riêng. Ƀơi mông pok jơnum, Dak Lak ăt hơmâo jao 2 pok hră pơsit phrâo hloh, prong hloh Việt Nam kơ hơdôm mơta mơnong ƀong jơman hloh pơkra ming mơ̆ng Sầu riêng hăng mơnong ƀong pơkra lu hloh mơ̆ng sầu riêng ƀơi Việt Nam hăng bruă pơplông pơkra ming mơnong ƀong jơman, lu mơnuih ngă hrŏm hloh. Hơdôm bruă ngă anai, jing lăi pơthâo, pôr tơlơi sĭ mơdrô pơhưč brơi rơnoh yom bruă ngă hmua, pla pơjing, pơpŭ bơni kơ khul mơnuih ngă hmua, jing gru grua bruă sĭ mơdrô čơkă tuai hyu ngui. Hăng mơnuih ƀôn sang ƀơi Dak Lak, tal blung a ƀuh bruă pơphun jơnum ngui anai prong hloh gưl tơring čar laih anun hơduah eưp anih anom si mơdrô sầu riêng lu hloh. Ơi Bùi Văn Duy, phường Ƀuôn Ma Thuột kah pơpha:

“Tuai hyu ngui rai lu biă mă kơniă jơlan abih hăng tơlơi mơak prong mơ̆ng ană plơi pla, hyu sem lăng jơnum ngui tal anai. Sầu riêng anai lăp đing nao ƀu kơnong ƀơi Việt Nam đôč ôh, dŏ pơtruh pơ lu dêh čar ieo gah ƀing ta dơ̆ng, anun kiăng anăp nao pioh pơđĭ kyar kơtang pơtrut tơlơi bơwih ƀong huă jai hrơi đĭ kyar hloh”.

Jơnum ngui sầu riêng Dak Lak thun 2026 ƀu kơnong sa bruă ngă pôr pơthâo gơnam sĭ mơdrô đôč ôh, dŏ jing sa tơlơi čang rơmang yak ngă blung a pioh kơ tơring čar pơđĭ tui gơnam sĭ mơdrô, pok prong bruă pơtruh nao rai hăng pơjing tal jơnum ngui anai dưi bang hyu kơtang hloh amăng hơdôm thun pơ anăp adih.