Ƀơi mông jơnum ngui, tơring čar Gia Lai ba pơƀuh lu mơta gơnam bơwih brơi, mơ̆ng hyu ngui pơ ia rơsĭ Quy Nhơn, dap kơdư glai čư̆ Pleiku, gru grua atông čing, hyu čuă lăng anih anom hiam, rơ-ơ̆, mơnong ƀong huă mơ̆ng plơi pla djuai ania ƀiă, đih pơdơi hăng hơdôm bruă pơtruh nao rai kual. Bruă kiăng hơmâo lĕ pơƀuh anŏ kơdrưh hmư̆ hing mơ̆ng Gia Lai jing anih čuă ngui hơmâo lu tơlơi či sem lăng. Biă ñu, bruă pơtruh hăng sang bruă bơwih ƀong mơ̆ng čar Hàn Quốc, Japan, Khač, India, Nga, Australia...čang rơmang pok prong anih bơwih ƀong, hăng ƀing tuai phrâo dong kơ Gia Lai wơ̆t hăng hơdôm anih hyu ngui pơkon ƀơi Việt Nam.

Ơi Hà Văn Siêu, Kơ-iăng khua anom bruă čơkă tuai hyu ngui Việt Nam lăi, amăng hrơi blan kiăng hyu ngui, laih anun ƀing tuai hor či hyu ngui phara mơn, tơlơi gêh găl gah anŏ hơmâo mơ̆ng anih anom, glai klô, ia rơsĭ aka ƀu djŏp ôh. Anom bruă tuai hyu ngui kiăng pơplih mơ̆ng mă yua kông ngăn hơdai pơjing rai anŏ yom mơ̆ng kông ngăn anun; mơ̆ng bơwih mă hơjăn, ngă mă anet đôč, hơdai ba hyu sem lăng, pel ĕp tong ten; mơ̆ng bơkơtưn hăng nua prăk hơdai bơkơtưn hăng anŏ klă hăng gru grua hiam ngă pơhưč: “Ƀing gơmơi pơsit Gia Lai hơmâo tơlơi gêh găl mah, mơ̆ng thun čơkă tuai hyu ngui dêh čar 2026, dưi pơtruh hăng hơdôm sang bruă bơwih bong đah mơ̆ng pơtruh amăng kual, pơtrut gru grua hiam mơ̆ng Gia Lai. Gơmơi jak iâu hơdôm sang bruă mơdrô, tơring tơrang, anom ngă hrŏm ƀuăn gum ngă bruă: rim boh tơring 1 mơta gơnam hmư̆ hing hăng hơmâo anŏ kơtang phara mơ̆ng kual, mơ̆ng plơi pla. Rim sang bruă bơwih ƀong 1 tơlơi pơčeh phrâo pơjing rai anŏ yom phara, pơđĭ tui tơlơi dưi bơkơtưn, rim anih čuă ngui jing sa tơlơi ră ruai gru grua ngă pơhưč, pơtruh pran jua hăng ƀing tuai rơnguai”.

Ơi Phạm Anh Tuấn, Khua jơnum min mơnuih ƀôn sang tơring čar Gia Lai pơsit, tơdơi kơ Thun čơkă tuai Dêh čar 2026, hơdôm bruă pơtruh čơkă tuai amra hơmâo pơjing, gơnam bơwih bơwang amra hơmâo lu tui laih anun ƀing tuai phrâo amra hơmâo lu mơn. Ñu čang rơmang, khul bơwih ƀong ƀu kơnong lăng Gia Lai jing anih nao čuă ngui phrâo đôč ôh, kiăng hrom hăng tơring anai pơjing rai anih hyu ngui phrâo: “Kâo čang rơmang hrơi ba tuai hyu ngui Việt Nam tal 2 ƀơi Gia Lai hơmâo lu dong bruă ngă hrŏm, gơnam bơwih brơi phrâo, lu anih či nao hăng ƀing tuai phrâo dong rai ngui pơ Gia Lai ăt kah hăng anih pơkŏn dong ƀơi Việt Nam. Gơmơi čang rơmang khul ba tuai hyu ngui pơjing “Dap kơdư tek ƀơi ia rơsĭ” mơ̆ng sa tơlơi pôr pơthâo či ba pơƀuh ngă pơhưč, jing sa hrơi mông, glông jơlan hyu ngui sit nik, mơ̆ng sa tơlơi jơnum mơ̆ng thun 2026 jing sa anŏ yom đĭ kyar sui thun”./.