Tlam tom brơi (18/8), Khul bơwih brơi tuai čuă ngui Việt Nam amăng mông mă bruă hăng gơnong bruă gru grua, bơrơguăt drơi jăn hăng tuai čuă ngui tơring čar Dak Lak kiăng pơjing hơdră bruă pơđĭ kyar gơnam tam lăp djơ̆ hăng bruă sĭ mơdrô, ba glăi lu gơnam yôm phara kiăng hrưn đĭ pran bơkơtưn. Mơng akŏ thun truh ră anai, tơring čar Dak Lak čơkă giăm 7,3 klăk tuai čuă ngui, đĭ rơbêh 36% pơhmu tui tơđar thun hlâo.

Amăng anun, tuai čuă ngui mơng tač rơngiao giăm 107.500 wŏt, đĭ giăm 45%; tuai amăng dêh čar giăm 7,2 klăk wŏt. Abih tih prăk pơhrui mơng tuai čuă ngui him lăng giăm 13.500 klai prăk, đĭ rơbêh 36%. Ơi Nguyễn Hồng Hải, kơ-iăng Khua khul pơlir bơwih brơi tuai čuă ngui Việt Nam brơi thâo, hăng kông ngăn hơmâo djop mơta, bruă yôm phun mơng Dak Lak ră anai lĕ kiăng ruah lăp djơ̆ tơlơi dưi kiăng pơjing rai hơdôm gơnam yôm phara.