Tơlơi gơñăm nao truh pơ thun 2050 lĕ ba bruă čơkă tuai hyu ngui Dak lăk jing anăn hmư̆ hing kơtang; jing anih čuă lăng anih anom glai klô, pơdơi pơdă, sem lăng gru grua đưm hăng hyu ngui ƀơi ia rơsĭ mơak phara. Ƀing khua ăt pơƀut pơgôp hiăp kơ bruă pơsit rơđah anih anom čuă ngui tơdơi kơ pơmut hrŏm tơring čar; ngă rơđah anih pơtruh Ngŏ - Yŭ; pơsit gơnam amuñ thâo krăn, lơ̆m lăi nao lĕ thâo mơtăm yơh anuh lĕ gơnam mơ̆ng Dak Lăk, akŏ pơjing anăn čuă ngui hmư̆ hing.

Klah čun glăi ƀơi mông jơnum, ơi Đào Mỹ, Kơ-iăng khua Jơnum min mơnuih ƀôn sang tơring čar Dak Lăk kiăng anom pơčrâo bruă hmư̆, djă pioh djŏp tơlơi pơgôp hiăp, čih pơgiong akŏ bruă tui glông jơlan ngă rơđah anŏ hmư̆ hing, anăn čuă ngui Dak Lăk amăng kual wơ̆t hăng amăng dêh čar; pơjing bruă bơwih brơi tuai čuă ngui pơtruh glai rưng hăng ia rơsĭ tui jơlan ngă bruă “sa jơlan nao - dua anih anom”, pơtruh anih čuă ngui Ngŏ - Yŭ./.