Ngă tui tơlơi pơtrun mrô 08 thun 2021 mơng Jơnum min pơ ala mơnuih ƀôn sang tơring čar Dak Lak kơ djru pơđĭ kyar tuai čuă ngui amăng plơi pla ƀơi hơdôm boh ƀut plơi pla djuai ania ƀiă rơwang thun 2021-2025, amăng 3 thun rơgao, tơring čar hơmâo djru brơi 5 boh plơi pla hăng 22 boh sang anŏ, hăng abih tih prăk kah mă yua giăm 4,2 klai prăk. Prăk kak hơmâo mă yua tuh pơ alin pơkra anih anom, ngă hiam jum dar, kơƀang črâo ba, sang juă glai, anih dưm rơdêh, eng ao buh hăng gông brô̆ pĕ ngui.

Hơdră djru anai blung a ngă gêh gal kiăng mơnuih ƀôn sang hơmâo sang jưh tuai, anih tơnă hơbai, anih ngui adôh suang hăng ba hyu ĕp lăng. Samơ̆, hơdôm hơbô̆ bruă anai ăt dŏ anet đôč; gơnam bơwih brơi tuai amăng djop plơi pla ăt hrup, bruă pơlir hơbit hăng anom bruă ba hyu tuai aka ƀu kjăp. Mrô tuai hăng prăk pơhrui aka ƀu hơđong, ngă tơnap tap amăng bruă pơkra ming anih ngui, tŏ tui tuh pơ alin hăng tŏ tui bruă mă tơdơi kơ abih hơdră djru ba. Yă H Zu Ni Niê, Khua git gai Ping gah ƀuôn tuai čuă ngui Akŏ Dhŏng brơi thâo, hơdră djru phrâo kiăng gum hrŏm sui ƀiă hăng ană plơi pla: “Tơlơi pơtrun mrô 08 thun 2021 mơng jơnum min pơ ala mơnuih ƀôn sang tơring čar lĕ atur phun yôm phăn biă kiăng pơđĭ kyar tuai čuă ngui amăng plơi pla, mơng hơdôm anih pơtop hrăm bruă bơwih brơi tuai truh pơ hơdră djru kơ anih anom, gơnam tam, jing tơlơi pơtrut prong kiăng mơnuih ƀôn sang pơđĭ kyar bruă tuai čuă ngui. Čang rơmang hơdră djru rơwang thun 2026-2030 amra klă ƀiă kơ tơhnal pơkă, ƀu djơ̆ kơnong djru brơi ha wŏt đôč ôh mơ̆ ăt amra tŏ tui na nao; hơmâo tơlơi djru ba tong ten ƀiă dong hăng mơnuih ƀôn sang glăk dŏ djă pioh sang Êđê, ƀing thâo atông čing ƀudah ƀing mơñam mrai”.

Amăng mông jơnum, ƀing khua mua jơnum min pơ ala mơnuih ƀôn sang tơring čar Dak Lak ăt hơmâo lu tơlơi pơgôp hiăp, rơkâo đĭ hơdră djru rơwang thun 2026-2030 pơplih mơng djru brơi rĭm črăn hơdai nao gum hrŏm truh dưi pơjing rai gơnam bơwih brơi tuai, pơphun ngă bruă hăng thâo tơlơi kiăng amăng bruă bơwih ƀong. Laih dong, pơsir hĭ hơdôm tơlơi gun kơ lŏn mơnai, prăk čan hăng gơnam djru tui tlôn, kiăng ngă rơđah tơlơi glăm ba amăng wai lăng, pơkra ming ring bruă; hrưn đĭ boh thâo hăng pran pơlir hơbit kiăng mơnuih ƀôn sang ngă pô amăng bruă bơwih brơi tuai čuă ngui.

Pơđut mông jơnum, yă Cao Thị Hòa An, kơ-iăng Khua git gai Ping gah tơring čar, Khua jơnum min pơ ala mơnuih ƀôn sang tơring čar Dak Lak rơkâo Jơnum min mơnuih ƀon sang tơring čar ječ ameč kơsem min tơhnal pơkă phrâo plih hĭ tơlơi pơtrun mrô 08 kơ djru pơđĭ kyar tuai čuă ngui amăng plơi pla ƀơi hơdôm kual mơnuih djuai ania ƀiă: “Kâo rơkâo Jơnum min mơnuih ƀon sang tơring čar kiăng kơsem min, pơphô bruă kiăng ba tơbiă tơhnal pơkă phrâo plih hĭ tơlơi pơtrun hơđăp. Hơdôm tơlơi tonap tap, gun găn, anŏ aka ƀu klă, ƀing ta kiăng hơmâo hơdră pơsir kiăng ngă klă ƀiă. Lăng mơnuih ƀôn sang, anom bơwih ƀong hăng mơnuih djuai ania ƀiă lĕ phun kiăng pơtrut kơtang hơbô̆ bruă pơlir hơbit kơplah wah anom bơwih ƀong hrŏm bruă tuai čuă ngui amăng plơi pla hăng anom bruă ba hyu tuai; pơtô hrăm amăng plơi pla kơ boh thâo ngă bruă, tơlơi pơhiăp tač rơngiao, bruă tơnă hơbai kiăng neh met wa jing pô bơwih brơi”.