Mông jơnum pơhueč lu mơnuih čih boh hră, mơnuih adoh suang ngă sen, ƀing nai pơtô, ƀing tơhan hăng čơđai sang hră nao hmư̆ tom, gum lăi nao anŏ yom kơ hơdôm tơlơi čih kơ Khua mir sir Hồ Chí Minh laih anun tơlơi gơgrong mơ̆ng gru grua hiam pơđok hră kiăng bơbă tui tơlơi pơmin hơdip hiam, pran jua hlong hrăm mă pô mơ̆ng hlăk ai rơnuk anai. Lu tơlơi pơgôp hiăp lăi, amăng rơnuk mă yua boh thâo mrô, bruă pơđok hră kơ Wa Hồ ƀu kơnong djru hlăk ai thâo hluh kơ gru phun djuai ania ta đôč ôh ăt akŏ pơjing tơlơi pơmin hiam, hơdip klă, gơgrong hăng mơnuih tơpuôl. Tui hăng Thạc sĩ Nguyễn Thị Phương, Nai pơtô Sang hră Đại học Luật Hà Nội ƀơi Dak Lăk, bruă sem lăng, pơđok hră či kơ Wa ră anai ƀu djơ̆ kiăo tui hră in đôč ôh, ăt hơmâo lu jơlan pơđok hră pơkŏn lăp djơ̆ hăng ƀing hlăk ai: “Gru hiam pơđok hră jing klă yơh. Khă hnun hai, ră anai ƀu kiăng blơi hơdrôm hră kah mơ̆ng dưi pơđok, ƀing ta dưi hmư̆ hră arăng pơhiăp, pơhmutu kah hăng VOV Live, lăng phim pơdah tơlơi ră ruai đưm, ƀudah hơdôm jơlan hơdră kơ gru phun dêh čar. Anun ăt jing bruă hrăm boh thâo mơn”.

Ƀơi mông jơnum, mơnuih pơčeh tơlơi adoh, mơnuih kơsem min gru grua yă Linh Nga Niê Kđăm ră ruai lu tơlơi lơ̆m ñu bưp Wa Hồ, mơ̆ng anun ñu ƀuh Wa jing sa čô khua jê̆ giăm hăng ană plơi, khăp ƀu-eng biă kơ mơnuih ƀôn sang wơt hăng ƀing čơđai. Ñu ăt lăi nao mơn kơ tơlơi čih kơ Wa Hồ ăt hmư̆ ư, bang hyu kơtang na nao đôč amăng ƀing hlăk ai rơnuk anai: “Kâo čang rơmang hơdôm tơlơi ră ruai, tơlơi kah pơpha hrơi anai ƀu kơnong hơdor glăi rup Khua mir sir Hồ Chí Minh, mơnuih rơgơi kơhnâo gru grua rŏng lŏn tơnah đôč ôh, ăt pơtrut pơsur ƀing hlăk ai hyu ĕp pơđok hră čih kơ Wa Hồ, kiăng thâo jơlan či hơdip mơda, tơlơi pơmin mă bruă hiư̆m pă pơ anăp”.

Hrŏm hăng mông jơnum, jơlan hơdră hơmâo tơlơi ngui adoh tơlơi adoh đưm, bơbưp hơduah ĕp kơ tơlơi hơdip, bruă mă mơ̆ng Khua mir sir Hồ Chí Minh, pơhưč lu čơđai sang hră. Ơi Quản Phạm Anh Thương brơi thâo, jơlan hơdră djru čơđai thâo rơđah hloh kơ tơlơi hơdip mơda, bruă ngă hơkrŭ mơ̆ng Wa Hồ ăt kah hăng anŏ yom mơ̆ng bruă pơđok hră amăng bruă hrăm, pơtŏp rơguăt mơ̆ng pô: “Mông jơnum anai jing yom biă. Ƀing gơmơi thâo hluh hloh kơ hơdrôm hră či kơ Khua mir sir Hồ Chí Minh, hơmâo bưp mơnuih čih tơlơi ră ruai hiam, hăng ƀing gơyut pơđok hră, hăng tơlơi pơmin, tơlơi thâo hluh phara biă kơ hơdôm hơdrôm hră či kơ Wa, ta thâo hluh rơđah hloh kơ tơlơi hơdip mơ̆ng Wa, bruă ngă hơkrŭ mơ̆ng Wa”.

Tui hăng pô čih tơlơi ruă ruai hiam nhà văn Niê Thanh Mai, Khua khul čih tơlơi ră ruai adoh suang tơring čar Dak Lăk, bruă bang hyu hodôm tơlơi čih ră ruai, tơlơi adoh kơ Wa amra hơmâo ngă hăng lu hơdră, či ba anŏ hiam amăng tơlơi pơmin, pran jua, kơnuih Hồ Chí Minh jê̆ giăm hloh hăng mơnuih ƀôn sang: “Hrŏm hăng hơdôm bruă bưp ƀơi anăp, jing gơmơi amra pơhrip glăi jua pơđok thơ, tơlơi adoh kơ Wa  laih anun gơmơi mơit glăi hơdôm anom bruă, amăng anun hơmâo hơdôm boh phương, tap năng gơmơi ngă bruă hăng sang mơnă đah mơ̆ng ba nao tơlơi čih anai amăng brô̆, kiăng abih bang mơnuih dưi hmư̆ soh”.

Mông jơnum anai ƀu kơnong ngă kjăp tui tơlơi khăp ƀu-eng, pran jua pơpŭ bơni hăng Khua mir sir Hồ Chí Minh đôč ôh, ăt bang hyu anŏ hiam, thâo pơđok hră amăng mơnuih tơpuôl, biă ñu rơnuk hlăk ai. Hăng hơdôm hơdrôm hră, tơlơi ră ruai hiam kơ Wa, jơlan hơdră hơmâo pơsur pran jua kiăng rim čô mơnuih nao ĕp hră kah hăng bruă či hrăm hră, pơtŏp rơguăt drơi pô, laih anun kơtưn đĭ hơdip hiam, hơdip klă, djru ba mơnuih tơpuôl./.