Hơdôm hrơi rơnuč rơwang hrơi tơjuh, mơ̆ng mơguah, anih gru đưm pra yang Tháp Nhạn hơmâo lu laih ƀing tuai hăng mơnuih ƀôn sang nao. Đa rơbat tơkai pơtŏp rơjang drơi jăn, đa nao čuh ñang, đa nao lăng ƀudah dŏ dong ƀơi kơčong čư̆ lăng ia krông Đà Rằng hăng plơi prong Tuy Hòa mơ̆ng ngŏ. Amăng anih anom hiam, rơ-ơ̆, pra yang đưm ƀuh anŏ hiam phara mơ̆ng tơlŏ ƀrik jŭ mriah, jing gru phara mơ̆ng bruă pơkra sang Chămpa. Sa cô mơnuih rơbat tơkai pơ anai lăi: "Pơ anai hlơi mơ̆ng ƀu hor. Dŏ giăm pơ anai arăng juăt rai pơ anai yơh pơtŏp añrăng drơi jăn. Kâo ataih mơn mơ̆ng anai, samơ̆ juăt rai na nao, truh hrơi năm, hrơi tơjuh lĕ ƀing adơi amai gơmơi jak rơbat tơkai rai pơ anai kiăng mơak”.

Tui hăng mơnuih ƀôn sang, anăn “Čư̆ Nhạn” hăng Tháp Nhạn, hlâo adih jing anih dŏ hơdip mơ̆ng lu čim ñạn. Rup čim por pơdar rim yang hrơi tlam yơh jing arăng pơ anăn hlao. Tháp Nhạn hơmâo man pơdong rơnuč rơnuk thun XI, akŏ rơnuk thun XII. Anai jing sa amăng ƀiă đôč pra yang dŏ ngă yang rơbang, pơpŭ kơ yang Thiên Y A Na.

Tháp Nhạn glông giăm 24m, hơmâo amăng anăn Anih gru đưm dêh čar yom pơphăn. Ƀu kơnong yom amăng gru phun dêh čar hăng gru man pơdong đôč ôh, pơ anai nao hrŏm hăng tơlơi hơdip mơda, tơlơi ngă yang mơ̆ng mơnuih ƀôn sang mơ̆ng lu rơnuk. Hơdôm thun giăm anai, lan sang Pra yang hơmâo pơhrup hiam, pok prong tui, kiăng mơnuih ƀôn sang hăng ƀing tuai nao lăng Tui hăng yă Nguyễn Thị Thục Oanh, dŏ pơ phường Tuy Hòa, tuai rai pơ Tháp Nhạn jai lu, biă ñu amăng bơyan pơdơi prong hăng amăng hrơi ngui ngor prong: “Pơ anai phara biă hăng mơ̆ng hlâo, hơmâo pơplih lu laih, lăng hiam hloh, čơkă tuai rai ngui. Amăng bơyan pơdơi prong lu biă, čơđai pơdơi sang hră lĕ gơñu rai lu pơ anai, ƀudah amăng hrơi ngui ngor, hrơi têt, giăm hrơi ngă yang viá Bà, hrơi Viá Bà lu biă, ƀing tuai rai pơ anai či iâu lăi hơmâo lu mơn”.

Anih mơyang dŏ tong krah plơi prong ia rơsĭ mơtăm, pơjing rai Tháp Nhạn anŏ phara biă hăng ƀing tuai lơ̆m nao ngui pơ kual lŏn gah ngŏ Dak Lăk. Mơ̆ng kơčong čư̆ Nhạn, ƀing tuai dưi lăng ƀuh abih anih anom plơi prong Tuy Hoà, ia krông Đà Rằng laih anun lăng nao truh ia rơsĭ pơ ataih. Amai Tống Thị Hải Yến, tuai mơ̆ng Phú Thọ lăi: "Rai pơ anai kâo lăng mơak, djhôl biă amăng pran jua. Anih mơyang djơ anai mơ̆ dŏ tong krah plơi prong hơmâo lu mơnuih ƀôn sang, samơ̆ ñu ăt hơmâo anŏ phara mơn ngă kơ ană mơnuih ta mơak, hơđong pran jua biă. Blung a kâo rai pơ anai ƀuh pra yang mơ̆ng rơnuk thun 11, truh ră anai ăt dŏ hiam đôč, dŏ hơnong đôč, jing kâo pơmin yua hơmâo tơlơi răk pioh, pơkra ming klă mơ̆ng kơnuk kơna ta mơn”.

Amăng jơlan hơdră đĭ kyar bruă čơkă tuai hyu ngui tơring čar Dak Lăk tơdơi kơ pơmut hrŏm, kual gah Ngŏ hăng anŏ gêh găl lĕ ia rơsĭ, gru grua đưm laih anun anih anom glai klô hơđăp glăk hơmâo pơsit jing anih đĭ kyar čơkă tuai hyu ngui yom biă. Amăng anun, Tháp Nhạn hơmâo lăng jing anŏ pơtruh bruă čơkă tuai hyu ngui sem lăng gru grua, hyu ngui sem lăng anih ngă yang laih anun sem hyu plơi prong ter hang ia rơsĭ. Yă Trần Thị Bử, Kơ-iăng khua wai lăng anih gru đưm, Gơnong bruă gru grua, bơkjăp drơi jăn hăng tuai čuă ngui Dak Lăk brơi thâo: “Tơdơi kơ čơkă wai lăng Tháp Nhạn jing Anom bruă wai lăng anih gru đưm amra ming pơkra glăi war pơgăn ƀơi anăp Pra yang, pơhlom rơnuk rơnua kơ ƀing tuai rơnguai lơ̆m nao ngui hăng nao iâu lăi pơ anai. Khul wai lăng ăt hơmâo hơdră ngă bruă anun lĕ ngă yang vía Bà rim thun či bơwih brơi ƀing tuai rơnguai hăng ƀing hlơi thơ hor či nao tŭi ñang hrơi ngă yang vía Bà ƀơi Tháp Nhạn đah mơ̆ng pơhưč kơ ƀing tuai rai ngui pơ anai”.

Amăng tơlơi hơdip rơnuk anai glăk pơplih rim hrơi pơ plơi prong ter hang ia rơsĭ, Tháp Nhạn ăt dŏ hơnong gru đưm đôč kah hăng gru grua phun hăng anih mơyang mơ̆ng kual lŏn gah Ngŏ tơring čar Dak Lăk. Lơ̆m yang hrơi lê̆ ƀơi čư̆ Nhạn, lăng nao ia krông Đà Rằng hlơ hleč jă ƀơi pơ-iă laih anun plơi prong Tuy Hòa glăk pĕ apui jă bra, Tháp Nhạn kar hăng ră ruai glăi gru grua đưm, tơlơi hơdip kjăp mơ̆ng gru đưm amăng tơlơi hơdip rơnuk anai./.