Ƀơi hơdôm boh plơi pla amăng tơring čar Lâm Đồng, jua čing hơgor lêng kơ hmư̆ bang tơ-ua amăng hơdôm hrơi ngui ngor amăng plơi pla; hơdôm blah eng ao djuai ania pô arăng pơsur buh amăng tơlơi hơdip rĭm hrơi; hơdôm tơlơi ayun suang, tơlơi adôh, bruă mơñam abăn ao, mơñam rêu rô ƀudah hơdôm tơlơi ngă yang ăt hơmâo djop rơnuk djă pioh hăng pơtô glăi ană tơčô. Gru grua hơdôm djuai ania, anun lĕ K’ho, Churu, M’nông, Chăm…ƀơi tơring čar Lâm Đồng ƀu djơ̆ dŏ kơnong amăng tơlơi pơmĭn đôč ôh hơmâo pơƀuh amăng mông ƀong huă, nao ngă hmua, bruă wai pơgang lŏn mơnai glai čư̆ hăng amăng plơi pla. Mơnuih kơhnâo kơhnăk Ka Duýp, să Đinh Trang Thượng brơi thâo:

“Sa čô mơnuih djuai ania K’ho, kâo ƀuh ră anai tơdah ƀu djă pioh gru grua djuai ania pô, tơdơi anai amra rơngiă tui mơtăm. Ƀuh tơlơi sit nik tui anun, ƀơi Đinh Trang Thượng, kâo ngă akŏ grup atông čing čơđai. Mơng hơdôm bruă mă anet mơng ƀing čơđai, kar hăng tơlơi ngă bơngač kiăng abih bang čơđai thâo hluh rơđa tơlơi yôm mơng gru grua, thâo djă pioh hăng wai pơgang. Hrŏm hăng anun, ƀơi Đinh Trang Thượng ăt hơmâo lu biă mă grup atông čing, hăng hơnong pơkă phun lĕ kiăng djă pioh gru grua djuai ania K’ho”.

Ayong Kră Jan K’Druynhs-sa čô mơnuih kơhnâo kơhnăk dŏ hlăk ai djuai ania K’ho dŏ ƀơi phương Lang Bang-Đà Lạt brơi thâo, ñu hrŏm hăng giăm 20 čô ding kơna lĕ ƀing tơdăm dra dŏ hơdip pơ yŭ tơkai čư̆ Lang Bang ră anai glăk mut hrŏm ngui adôh suang ƀơi anih čuă ngui Lang Bang Land. Hluai tui hơdôm jua čing, tơlơi ayun suang hơđăp, grup anai ăt pơplih phrâo hăng hơdôm tơlơi ayun suang phrâo kiăng ba glăi tơlơi jê̆ giăm, mơ-ak mơ-ai brơi kơ tuai čuă ngui samơ̆ ăt dŏ djă pioh gru grua gah bơngăt jua djuai ania pô. Ƀing ding kơna hơmâo kĭ hră pơkôl mă bruă ha anih ƀơi anih bơwih brơi tuai čuă ngui hăng 3 wŏt nao ngui adôh suang rĭm hrơi, yua anun ăt hơmâo prăk pơhrui hơđong mơn.

Tha plơi K’Keo, dŏ amăng plơi Hàng Làng, să Di Linh, tơring čar Lâm Đồng brơi thâo, hơdôm thun rơgao, Ping gah hăng kơnuk kơna lêng kơ ngă gêh gal djru brơi neh met wa hơkrŭ glăi hơdôm bruă gru grua djuai ania. Ƀu djơ̆ kơnong amăng plơi pla, čing hơgor ăt pơtô ƀơi sang hră, hơmâo pơtô amăng hơdôm grup gru grua. Yua anun, jai hrơi hơmâo lu dong hlăk ai nao hrăm atông čing hơgor. Tui tha plơi K’Keo, bruă pơphun ngui ngor, ngă yang huă asơi hle lĕ hrơi mông yôm phăn kiăng ƀing čơđai tŏ tui, lăi pơthâo gru grua yôm phara mơng djuai ania pô.

“Kâo pô lĕ tha plơi, mơnuih arăng đăo gơnang amăng plơi pla djuai ania ƀiă yua anun kiăng hơkrŭ glăi gru grua anai, kiăng pơtô brơi ană tơčô mô yâo hrăm tui. Tơdah hơmâo tơlơi gêh gal dong amra pơjing, hơkrŭ glăi kiăng tŏ tui djă pioh gru grua čing hơgor mơng djuai ania pô, mut hrŏm hăng hơdôm djuai ania pơkŏn dong”.

Tơdơi kơ pơmut hrŏm tơring čar Lâm Đồng, Dak Nông hăng Bình Thuận, tơring čar Lâm Đồng phrâo tañ pok pơhai lu hơdră bruă sit nik pơlir hăng djă pioh gru grua hăng pơđĭ kyar hơđong kjăp. Hơdôm hơbô̆ bruă tuai čuă ngui amăng plơi pla, anih ngui atông čing hơgor, anih pơtô hrăm gru grua djuai ania hơmâo pơsur pơđĭ kyar ƀơi ƀon lan. Mơnuih ƀôn sang jing pô phun djă pioh, wai pơgang gru grua, ba glăi tơlơi bơwih ƀong mơng gru grua yôm phara. Tui tơlơi sit nik brơi ƀuh, bruă ba gru grua pơwot glăi amăng tơlơi hơdip rĭm hrơi ƀu djơ̆ kơnong wai pơgang hơdôm anŏ yôm mơng ơi yă đôč ôh mơ̆ ăt pơsit tong gru grua phara hơmâo ƀơi Lâm Đồng amăng tơlơi hơdip mut hrŏm. Anai ăt lĕ atur phun kiăng gru grua djop djuai ania dưi djă pioh hơđong kjăp, hơdip hrŏm tơlơi hơdip phrâo hăng ngă lar hyu kơñ pơgi ni anăp. /.