Ƀơi Sang hră gưl klâ̆o Trần Đại Nghĩa, tơring glông Buôn Đôn, Khul thâo bôh pia adôh suang tơring čar Dak Lak pơphun jơlan hơdră “Rim plăng hơdrôm hră pok – Tơlơi ư-ang por đĭ”. Ƀơi anai, ƀing čơđai sang hră dưi găn rơgao hơdôm bruă mă bơkơtuai, pơdah prưng hơdrôm hră, pơđok hơdrôm hră hăng hơdôm anih ngui ngor bôh thâo pơđok hră ngă pơhưč pran jua; pơhrôp pô amăng tơlơi akhan tui hơdôm tơlơi ruai ngă sen hăng hơdôm črăn tơlơi adôh hmư̆ mơ-ak hyơhyor pran jua.

Tal anai, Khul bôh thâo adôh suang tơring čar Dak Lak hmâo jao hơdôm pluh akô̆ hơdrôm hră bôh thâo adôh suang ƀơk brơi kơ Sang hră gưl 3 Trần Đại Nghĩa hăng lăi pơthâo sŏp hơdrôm hră “Tơlơi čih bôh thâo adôh suang, Tơlơi pơhing pơhrăm hăng ngă tui tơlơi pơmin, pran jua, kơnuih Hồ Chí Minh” yua kơ Khul dăp hơdră. Sŏp hơdrôm hră kơpal rơbêh kơ 300 plăng, tum pơƀut hơdôm tơlơi čih mơ̆ng ƀing thâo bôh pia, mơnuih čih tơlơi pơhing ƀơi Dak Lak gah lu bruă mă kah hăng kač rup, er adôh, čơphin rup, tơlơi čih bôh pia, tơlơi pơtưh hăng pôr tơlơi pơhing. Rim tơlơi čih lĕ sa tơlơi ruai, gru rup hiam lăi kơ tơlơi hơdip mơda, kiăng pơtô lăi tơlơi yôm phăn kơ bruă hrăm hăng ngă tui tơlơi pơmin, pran jua, kơnuih mơ̆ng Khua mir sir Hồ Chí Minh. Pô thâo pơtưh Nguyễn Tiến Sỹ, dô̆ pơ̆ plơi prong Buôn Ma Thuột lăi pơthâo:

“Bruă hrăm tui gru hiam pran jua mơ̆ng Wa jing sa tơlơi lăi nao prong biă. Kâo juăt đing nao anăn ñu mơ̆ng hlâo, gru grua hăng pran jua ngă hơkrŭ, biă ñu lĕ rơwang lŏn ia glăk yak mut amăng rơnuk phrâo. Hơdôm hrơi rơgao kâo hmâo sa dua mơta tơlơi čih kơ phiăn juăt mơ̆ng djuai ania, hmâo 3 tơlơi čih pơtưh hmâo in tơglit amăng sop hơdrôm hră mơ̆ng Khul thâo bôh pia adôh suang lăi pơthâo amăng tal anai”.

Ăt amăng tal anai mơn, ƀơi Anih dưm hơdrôm hră tơring čar Dak Lak pơphun jơlan hơdră lăi pơthâo hơdrôm hră rup “Plơi mă bruă đưm Việt Nam” mơ̆ng Helena Vân. Hơdôm hră tum pơƀut rơbêh kơ 150 gru rup lăi kơ hơdôm bôh plơi mă bruă đưm ƀơi 3 kual Kơdư – Tŏng Krah – Dơnung. Hơdôm bôh yôm hmâo anăn ñu dưi pơdah tui 2 bôh pơhiăp Việt – Anglê. Pô thâo čơphin rup Helena Vân brơi thâo, hluai tui hơdrôm hră, ñu kiăng djă pioh tơlơi ruai kơ bôh thâo mơ̆ng rim plơi mă bruă đưm hăng bơngač rơđah, lu mơta ia.

“Mơ̆ng lu per rup mơ̆ng hơdôm bôh plơi mă bruă đưm phara, kâo ruah mă hăng ruah tơbiă hơdôm per rup djă jă mơ̆ plơi mă bruă đưm glăk rơngiă tui ƀơƀrư̆, dô̆ ƀiă sang anô̆ hăng mơnuih dô̆ djă pioh bruă mă. Kâo čang rơmang amra dưi pơđĭ prong hơdrôm hră anai hăng amra ƀơk brơi kơ anih dưm hơdrôm hră lŏn ia, anih dưm hơdrôm hră mơ̆ng hơdôm bôh tơring čar pioh djop mơnuih dưi nao pơđok hơdrôm hră, mă yua tơdăng pioh hơkrŭ glăi plơi mă bruă đưm hăng čang rơmang dưi hmâo lu mơnuih thâo hloh hăng hơdôm bôh plơi mă bruă đưm glăk rơngiă tui ƀơƀrư̆ anai"./.