Amăng “Rơwang hrơi tơjuh pơhrăm na nao”, hơdôm anih anom, anom bruă đing nao pok pơhai hơdôm bruă mă kah hăng: Tơlơi pơhing, lăi pơhing kơ tơhnal yôm phăn hăng bruă mă mơ̆ng pơđĭ kyar bôh thâo pơđok hơdrôm hră, pơtrut pơhrăm na nao; pơphun hơdôm hrơi jơnum ngui hơdrôm hră lăi pơthâo hơdrôm hră phrâo, pơjing anih anom bơkơtuai kơplah wah mơnuih čih pơkra hăng pô pơđok hơdrôm hră; pơjing khul pơđok hơdrôm hră, hră pơhing tui akô̆ ñu, hnưr thun; pơphun hơdôm bruă bơkơtưn čih, kač, ruai glăi hluai tui hơdrôm hră, hră pơhing...

Amăng mông pok phun, Grŭp pơphun hmâo jao laih 6 tơlơi pơhing rơwang hrơi tơjuh anăp nao pơhrăm na nao 2024 brơi hơdôm anih anom, anom bruă, khul grŭp, anih anom pơtô pơhrăm. Hơdôm boh anom gum djru hmâo ƀơk brơi laih 200 akô̆ hơdrôm hră; 50.000 anih hơduah ĕp lăng anih dưm hơdrôm hră mrô; ƀơk brơi prăk hrăm hră, ƀơk keh prăk pơsur hrăm hră tơring čar./.