Amăng rơbêh ha blan, 6 anih pơtô atông čing, ayun suang hăng pơtô brơi boh thâo bơwih brơi tuai čuă ngui amăng plơi pla hơmâo pơphun amăng hơdôm boh plơi pla djuai ania Êđê ƀơi phương Buôn Ma Thuột, tơring čar Dak Lak pơhưč rơbêh 130 čô mơnuih mut hrŏm.

Amăng anun, hơdôm anih pơtô atông čing hơmâo 60 čô mơnuih mut hrŏm, anet hloh 8 thun, prong hloh 35 thun. Rơngiao kơ hơdôm er atông tui hơđăp, ƀing kiăo tui hrăm ăt hơmâo ƀing kơhnâo kơhnăk pơtô hrơi hơdôm er atông tơnap ƀiă pioh atông amăng hơdôm hrơi ngui ngor, ngă yang hăng atông brơi tuai čuă ngui. Hơdôm anih pơtô ayun suang ăt pơtô mơng amuñ truh pơ tơnap mơn, djru brơi ƀing kiăo tui hrăm suang rơmuăn ƀiă hăng hluh rơđah dong kơ anŏ yôm mơng tơlơi ayun suang djuai ania pô.

Anai lĕ sa amăng ƀing mơnuih kiăo tui hrăm ayun suang, amon H’Na Si Mlô, dŏ amăng ƀuôn Đung, phương Buôn Ma Thuột brơi thâo, ƀu djơ̆ kơnong thâo yak tơkai hơdai tơngan đôč ôh, ñu ăt thâo rơđah anŏ yôm mơng hơdôm tơlơi ayun suang, mơng anun jai hor hăng čang rơmang pơgôp djă pioh gru grua yôm phara mơng djuai ania pô. “Kâo čang rơmang pơphun lu mông hrăm ayun suang tui anai brơi kơ ƀing hlăk ai čơđai, mơng anun ƀing gơmơi amra thâo lu tơlơi ayun suang, kiăng tơlơi ayun suang anai huăi rơngiă hĭ ôh”.

Hrŏm hăng anun, tlâo anih pơtô brơi boh thâo bơwih brơi tuai čuă ngui amăng plơi pla yua ƀing nai pơtô mơng Sang hră Cao đẳng pơtô bruă tuai čuă ngui Sài Gòn nao pơtô hrơi ƀing mơnuih amăng ƀuôn Akŏ Dhông kiăng thâo kơ bruă bơwih brơi tuai, bruă tơnă hơbai hăng pơjing hơbô̆ bruă ĕp lăng, ngui ngor amăng plơi pla.

Yă Phạm Thị Hải Bình, kơ-iăng Khua anom bruă djru bơwih brơi mơnuih mơnam amăng phương Buôn Ma Thuột brơi thâo, bruă pơlir pơmut pơtô hrăm atông čing hăng pơtô brơi bruă bơwih brơi tuai amăng plơi pla lĕ tơlơi yak nao kiăng ƀing hlăk ai thâo djă pioh gru grua rah, hăng thâo tŭ mă klă djop tơlơi yôm phara kiăng pơđĭ kyar bruă tuai čuă ngui. “Thun anai, rơngiao kơ hơdôm anih pơtô atông čing, ayun suang, phương hơmâo gum hrŏm hăng Sang hră Cao đẳng pơtô bruă tuai čuă ngui Sài Gòn pok tlâo anih pơtô brơi boh thâo bơwih brơi tuai čuă ngui, hrưn đĭ klă amăng bruă tơnă hơbai hăng hơdôm boh sang anŏ sĭ mơnong ƀong huă, laih dong hơbô̆ bruă ĕp lăng, ngui ngor amăng plơi pla. Mơng anih pơtô hrăm, ƀing mơnuih kiăo tui hrăm thâo rơđah dong, mơng anun ƀơƀrư̆ pơjing lu hơbô̆ bruă tuai čuă ngui amăng plơi pla”.

Pơđut hĭ hơdôm tal pơtô hrăm, ƀing kiăo hrăm dưi atông čing, ayun suang hăng thâo ƀiă dong amăng bruă čơkă tuai, djru brơi tuai. Hơbô̆ bruă anai čang rơmang pơgôp djă pioh gru grua čing hơgor ƀơi kual Dap kơdư pơlir hăng pơđĭ kyar tuai čuă ngui amăng plơi pla, pơhlôm brơi tơlơi bơwih ƀong amăng djop plơi pla./.