Amăng gru grua hiam djuai ania Êđê, jua čing hơgor ƀu kơnong jua mơñi mơ̆ng gông brô̆, jĭng čêng đôč ôh. Anun lĕ tơlơi pơhiăp, iâu đĭ amăng plơi pla, jing jua mơñi pơhmư̆ brơi amăng mông yom pơphăn lơ̆m tơlơi hơdip mơda mơnuih ƀôn sang. Čơđai nge phrâo tơkeng ăt hơmâo jua čing kah mơak hrŏm. Sit mơnuih tha rơma đuăi glăi hăng bơngăt atâo ơi yă đưm đă, jua čing ăt tơ-ua đĭ ba nao tơkai pô rơngiă.

Mơnuih kơhnăk, gru ơi Y Tŏ Ƀyă, juăt iâu Ơi Sa, ƀơi ƀuôn Dang Kang, să Dang Kang, tơring čar Dak Lak kah pơpha, jua mơñi čing hơgor lĕ ƀu kơƀah ôh amăng tơlơi hơdip mơda. Samơ̆ kiăng kơ atông djơ̆ găl, mut hrŏm jua mơñi djơ̆ rơ-ua hă, ƀing hrăm atông čing khom hrăm mơ̆ng yŭ atông amuñ amĕ hloh-atông čing kram ƀơ̆i hlâo.

 “Tui hăng tơlơi phiăn juăt đưm, amăng tơlơi ngă yang plơi pla, jua čing dŏ ƀơi anih pơpŭ pơyom hloh. Sit ngă yang, jua čing tơ-ua đĭ yơh. Samơ hnang blung, khom pơtop hrăm atông čing pơkra hăng kram ƀơ̆i. Tơl thâo hruaih laih, kiăo tui jua čing sit nik gơñu ăt hrăm atông čing sit nik jing čing kông”.

Mơ̆ng jua čing kram blung a, mơnuih hrăm atông čing juăt tui, hmư̆ hăng thâo krăn jua mơñi mơ̆ng rim boh čing hơmâo anăn mơ̆ng anet truh pơ prong, djăl truh pơ tai kiăo tui atông brơi djơ̆ găl. Laih anun truh mông atông čing ia kông tơ-ua đĭ amăng mông ngă yang rơbang, ƀu kơnong ba jua mơñi hăng bơngăt jua, tui er mơñi mơak đôč ôh, dŏ djă ba rơnoh yom gru grua hiam hơmâo jao glăi kơ khul ană amôn, čơđai muai djă pioh hăng atông đĭ. Mơnuih kơhnâo kơhnăk Y Ka Niê, juăt iâu ơi Kư̆u, ƀơi ƀuôn Dang Kang, să Dăng Kang, tơring čar Dak Lak brơi thâo:

 “Tơtă anai ta tha rơma laih, samơ̆ kâo ăt gir run pơtô glăi atông čing kơ ană tơčô amăng plơi. Truh ră anai, kâo hơmâo pơtô brơi sa khul, ƀing ană tơčô thâo atông hruaih laih hơdôm tơlơi atông kâo pơtô brơi. Kâo čang rơmang ƀing ană tơčô ăt hrăm hăng djă pioh jua čing hơgor, kiăng kơ huăi rơngiă hĭ gru ama grua amĭ djuai ania ta pô”. 

Hăng tơlơi pơtô ba tong ten mơ̆ng ƀing gru nao hlâo, mông hrăm mơak biă mă, atông čing amăng plơi, hmư̆ pơđao pran jua mơ̆n. Anun lĕ, ƀu kơnong hrăm tui hơdră atông čing đôč ôh. Anun dŏ jing bruă ngă pioh kơ ƀing ană amôn čơđai muai thâo hluh rơđah kơ gru grua djuai ania pô. Hơmâo amôn kiah 7 thun đôč, ngă juăt tui hăng atông čing kram. Mơ̆ng sang dlông gru đưm, jua čing mơñi kiăo tui kơ ƀing gơñu truh pơ sang hră, truh pơ anih jơnum plơi, sang rung gru grua plơi. Ayong Y Tloi Niê, ama tra, sa čô mơnuih ƀôn sang amăng plơi lăi:

“Bruă djă pioh, pơgang lui hăng pơtô glăi čing hơgor lĕ tơbiă rai mơ̆ng tơlơi či kiăng amăng plơi pla, mơnuih ƀôn sang. Ƀing gơmơi ăt pơphun anih pơtô glăi kơ ană amôn hră, mơ̆ng ƀing čơđai anet truh kơ ƀing tơdăm ngek dra muai. Biă mă ñu, ƀing hlăk ai, mơnuih tha pơtô brơi kơ ană tơčô mơ̆ng 7-8 thun, laih dơ̆ng prăp lui pơtô ƀing čơđai sang hră gưl dua dơ̆ng”.

phun Alê djrao tha hơmâo pơhrua hăng rơbung čăt glăi dơ̆ng, samơ̆  ƀơi anăp kơ tơlơi pơblih lu tơlơi amăng khul mơnuih mơnam, lu khul čơđai rơnuk anai bưp ƀu ƀiă ôh tơlơi lông lăng amăng tơlơi hơdip, hang kơ ĕp ƀong, bơwih ƀong huă, anun yơh ƀu djơ̆ mông hrơi pơpă jak iâu pơtum lĕ djop pô ƀuh ƀô̆ mơta soh ôh, kiăng pơtô ba hlăk ai, čơđai atông čing. Anun lĕ, tơlơi bơngơ̆t prong mơ̆ng sa čô mơnuih kơhnâo kơhnăk gru đưm kah hăng Y Čeo Ƀyă, ơi Bươm, dŏ ƀơi ƀuôn Dang Kang pơmin.

“Sit nik mơ̆n, grup atông čing ƀing gơmơi lu thun laih, tha rơma baih, samơ̆ ăt gir run dŏ hrăm tơdruă atông čing kiăng hruaih. Yom hloh dơ̆ng lĕ, khua mua gong gai plơi pla kiăng hơmâo akŏ bruă pok anih pơtô hrăm glăi kah dưi djă pioh jua čing hơgor đưm tŭ yua ƀiă. Anai ƀu djơ̆ lăi bruă kơ hơjăn ƀing atông čing ôh, yua kơ ƀing khul gơmơi tha rơma laih, tơdơi anai ƀu anăm atông čing dơ̆ng tah, pioh hyu pơdah pơ anih pơkŏn thâo”.

Jua čing plơi Dang Kang ră anai ăt hmư̆ iơ iơ̆k, ik ăk mơ̆n sit truh bơyan ngă yang amăng plơi. Samơ̆ tơdơi kơ jua čing anun, hmư̆ ik ăk, tơ-ua hyu amăng glai klô čư̆ siăng, ƀu ƀiă ôh tơlơi pơmin bơngơ̆t glăi mơ̆ng ƀing tha rơma nao hlâo, ƀing gru, mơnuih kơhnâo kơhnăk. Tơlơi khăp hăng pran jua gir run mơ̆ng ƀing gơñu hơmâo bluh asăp jua tơlơi hơdip, pơmut amăng bơngăt jua ƀing hlăk ai, čơđai rơnuk anai ƀơi kual čư̆ siăng kriăng pơtâo ƀing ta. Kiăng kơ rim mlam sit adai mơmŏt yang hrơi lê̆, tong krah lơ̆n mơnai glai klô čư̆ siăng, arăng ăt dŏ hmư̆ đôč jua čing mơñi, tơ-ua đĭ kah hăng dơnai hơtai boh bơtơpư̆ amăng tơda, lơ̆m pran jua ană mơnuih ƀu thâo pơdơi ôh či plơi pla ƀuôn Dang Kang.