Ƀơi să Thanh Yên, tơlơi ngui khăm bải-ngui săi ia mơng mơnuih djuai ania Lao phrâo pơphun ƀu djơ̆ kơnong lĕ tơlơi ngui ngă yang akŏ thun đôč ôh mơ̆ ăt glăk ƀơƀrư̆ pơphun klă ƀiă dong, pơlir hăng lăi pơthâo tuai čuă ngui. Hrơi ngui pơƀuh glăi djop mơta tơlơi ngui ngă yang sô hơđăp anun lĕ rơkâo tơlơi tơphă, akă hrĕ mrai ƀơi tơngan, ngă yang ia…hơdôm tơlơi ngui ngă yang pioh kơđŏm tơlơi phiăn ană plơi pla. Amai Nguyễn Thị Nguyệt, mơnuih ƀôn sang phường Điện Biên Phủ, tơring čar Điện Biên brơi thâo:

“Tal blung a thâo hăng mut hrŏm hrơi ngui săi ia ƀơi Thanh Yên, mah jơlan nao rai tơnap tap hăng ataih ayaih dong samơ̆ amăng pran jua ăt hok kơdok mơn yua ƀơi anai arăng ngui mơ-ak biă, tui kâo pơmĭn tơdah tơlơi ngui anai dưi pơphun na nao, neh met wa amra hơmâo anih djă pioh gru grua djuai ania Lao”.

Ơi Trần Thế Hoàn, kơ-iăng Khua Jơnum min mơnuih ƀôn sang să Thanh Yên, tơring čar Điện Biên brơi thâo, mơng tơlơi čang rơmang mơng neh met wa amăng bruă to tui hơdôm tơlơi yôm gru grua hăng tơlơi kiăng ĕp lăng mơng tuai čuă ngui, gong gai să Thanh Yên glăk črâo ba bruă ba tơlơi ngui ngă yang anai jing gơnam bơwih brơi tuai čuă ngui gru grua yôm phara, pơlir hăng bruă djă pioh gru grua gah bơngăt amăng plơi pla.

“Jơnum min mơnuih ƀôn sang să glăk prap lui akŏ bruă djă pioh hăng tŏ tui gru grua yôm mơng tơlơi ngui ngă yang anai kiăng jing gru grua yôm phara hăng gru grua gah bơngăt jua amăng să. Anai arăng pơsit lĕ bruă jao phun amăng akŏ bruă djă pioh hơdôm gru grua gah bơngăt amăng ƀon lan pơ anăp anai”.

Phương Mường Lay lĕ anih pơtum pơƀut anih djă pioh gru grua mơng djuai ania Thái kô̆ ter hang ia krông Đà Giang, hơbô̆ bruă tuai čuă ngui amăng plơi pla glăk ba glăi boh tŭ yua tong ten. Hơdôm boh sang glông gru grua ƀu djơ̆ kơnong lĕ anih dŏ hơdip đôč ôh mơ̆ ăt jing sang jưh tuai, hơdôm mông ƀong huă jing mông huă ƀong lăng gơnam ƀong ƀơi anai; hơdôm tơlơi suang xòe, tơlơi phiăn jing hơdôm gơnam gru grua bơwih brơi kơ tuai. Amai Lò Huyền Giang, mơnuih dŏ amăng plơi Chi Luông 1, phương Mường Lay, tơring čar Điện Biên brơi thâo, tơlơi mut hrŏm mơng mơnuih ƀôn sang amăng bruă bơwih brơi tuai čuă ngui ba glăi prăk pơhrui hơđong.

“Lơm mut hrŏm bơwih brơi tuai čuă ngui amăng plơi pla, kâo hrŏm hăng sang anŏ hơmâo lu dong prăk pơhrui hơđong mơng hơdôm bruă bơwih brơi tuai anun lĕ: čơkă tuai, tơnă hơbaiu hăng lăi pơthâo hơdôm gơnam tam amăng plơi pla. Hrŏm hăng anun, kâo pô ăt hrăm tui lu amăng tơlơi pơhiăp bit tom, bruă bơwih brơi hăng čơkă tuai. Mơng anun ngă kâo pơ-ư ang biă lơm dưi pơgôp djă pioh, lăi pơthâo gru grua mơng djuai ania pô hăng gơyut gơyâo amăng lŏn ia laih dong mơng tač rơngiao”.

Ayong Lường Văn Muôn, Khua plơi tuai čuă ngui Phiêng Lơi, phương Điện Biên Phủ, tơring čar Điện Biên brơi thâo: hơdôm gơnam ƀong gru grua mơng djuai ania Thái, sit biă ñu lĕ hơdôm añăm mơnong om glăk hơmâo neh met wa amăng plơi pla yua jing gơnam ƀong pơhưč tơlơi đing nao mơng tơnă hơbai truh pŭ pơdă, pơgôp hrưn đĭ klă amăng bơwih bơwang, sui ƀiă hrơi mông ĕp lăng hăng dŏ glăi brơi kơ tuai čuă ngui.

“Hăng hơdôm gơnam ƀong amăng plơi pla, ră anai ƀing gơmơi hơmâo hăng glăk ngă klă biă mă kơ bruă tơnă hơbai gơnam ƀong mơng djuai ania Thái. Sit biă ñu ƀing gơmơi đing nao añăm om pŭ brơi tuai čuă ngui. Tuai rai ngui pơ anai lêng kơ hor soh”.

Sa amăng hơdôm tơlơi pơplih prong hloh amăng bruă bơwih brơi tuai čuă ngui ră anai amăng tơring čar Điện Biên lĕ bruă pơplih hơdôm bruă mă, tơlơi ngui gru grua mơng anih tong krah amăng djop plơi pla. Ƀơi anai lĕ anih djă pioh djop hăng sit nik hơdôm rơnoh yôm gru grua, laih dong ngă gêh gal kiăng mơnuih ƀôn sang dưi mut hrŏm tui glông rơnoh bơwih brơi tuai čuă ngui. Tui ơi Trần Hải Hà, Khua gơnong bruă gru grua, bơrơguăt drơi jăn hăng tuai čuă ngui tơring čar Điện Biên, bruă ngă anai ƀu djơ̆ kơnong djru hơmâo lu dong tơlơi ĕp lăng brơi kơ tuai đôč ôh mơ̆ ăt ngă pơlir kơplah wah bruă djă pioh hăng pơđĭ kyar lơm mơnuih ƀôn sang lĕ ƀing phun djă pioh rah, dưi mă yua hơdôm tơlơi yôm gru grua rah.

“Amăng pơphun hơdôm tơlơi ngui gru grua, ƀing gơmơi amra pơphun lu ƀiă ƀơi hơdôm boh plơi pla tuai čuă ngui gru grua kiăng ngă gêh gal brơi hơdôm boh plơi pla bơwih brơi tuai čuă ngui amăng plơi pla, plơi pla gru grua, hơdôm sang homestay dưi čơkă tuai, lăi pơthâo hăng pơđĭ kyar bruă bơwih brơi tuai čuă ngui amăng plơi pla gơmơi. Lơm tuai rai pơ anai, ƀing gơñu amra dưi ĕp lăng kơ gru grua, dưi ƀong huă, đĭ lu tui bruă ĕp lăng hăng pơhlôm djơ̆ pran tuai čuă ngui”.

Hơdôm tơlơi pơplih tong ten mơng bruă tuai čuă ngui ƀơi Điện Biên hơmâo pơdah mơng hơdôm blan akŏ thun 2026, tơring čar čơkă giăm 550.000 wŏt tuai, đĭ giăm 30% pơhmu tui tơđar thun hlâo. 72 thun tơdơi kơ blah dưi Điện Biên Phủ, tơlơi dưi hing ang tŏ tui lar hyu, jing anih gơnang nao kiăng Điện Biên ră anai hrưn đĭ kơtang. Lơm hơdôm anŏ yôm gru grua hơmâo ngă mơdưh, djă pioh hăng pơplih jing gơnam bơwih brơi tuai čuă ngui yôm phara, kual lŏn mơnai hlâo anun lĕ tơdron blah wang kơtang tit đưm hlâo adih glăk pơsit tong kơdrưh ang jing anih čuă ngui yôm phara hiam klă./.