Jơlan hơdră anai, hơmâo lu bruă mă gru grua hiam mơak, tơlơi nguingor ngă yang hơdor glăi, suang rup ania čơgrai, rơmung dul, adoh suang gru đưm, adoh kơhñăk, pơtưh nao rai, suang kơdăt gai trul, čih hră boh hră hiam bơni hơ-ơč thun phrâo, bơwih brơi tuai rơnguai nao ngui, mut ĕp, găn rơgao bruă pơkra ming ƀañ đưm amăng plơi pla, man rup hăng lŏn krăi.

Lu čơgăn pơdă gơnam sĭ mơdrô OCOP ăt ba dưm pơ anun bơwih brơi mơnuih ƀôn sang, tuai mut nao blơi. Amăng anun, hơmâo bruă mă čih boh hră pơpŭ thun phrâo yơh pơhưč lu tuai nao rơkâo hăng blơi boh hră, kiăng hơmâo tơlơi bơni hơ-ơč hơkat brơi, čang rơmang amăng thun phrâo rơnuk rơnua, gêh găl, ngă bruă hruaih hloh. Bruă pơphun tơlơi ngui ngor akŏ bơyan phang thun phrâo anai kiăng pơgôp hrŏm djă pioh, pơđĭ tui rơnoh ym gru grua phun, gru grua hiam mơak mơ̆ng đưm dŏ djă pioh amăng tơlơi hơdip mơda truh ră anai.