Tui lăi pơthâo ƀơi hang ia rơsĭ Quy Nhơn, hơdôm hrơi anai, tuai čuă ngui tui nao lu biă mă. Ƀơi hang ia rơsĭ anih mơnơi, ayong Hồ Văn Thắng, mơnuih djru wai lăng mơng Sang jưh tuai Hải Âu, lêng kơ kiăo tui lăng, tơngan djă kơsu đung drơi, ñu lêng kơ anăp nao hang ia rơsĭ. Hăng ñu pô, bruă anai ƀu dưi pơtah hơtai ôh, yua tơlơi truh sat amra ƀuh ƀu hmao thâo ôh.

“Kâo lĕ mơnuih krăp djru, lơm tuai mơnơi gah hang ia rơsĭ gơmơi, kâo amra kiăo tui lăng, kiăng wai lăng tuai mơnơi hiưm pă, tơdah hơmâo tơlơi hơget thơ amra trun mă hmao tlôn, djru pơjrao ječ tơdah ia ƀlung”.

Ƀu djơ̆ kơnong ƀơi Quy Nhơn, ƀơi anih tuai čuă ngui Kỳ Co, tuai čuă ngui ăt lu biă mă, mah lơm ayuh hyiăng pơ-iă hang yang hrơi dong. Ƀing mơnuih djru brơi amra pơkiăo nao lu, cano lêng kơ prap lui hlâo. Tuai čuă ngui arăng pơtă anăm luai tơbiă mơng anih arăng guang dar. Ayong Lê Thanh Hùng Anh, mơnuih wai lăng ƀơi anai brơi thâo, lơm mrô tuai čuă ngui lu tui, bruă amra kơtrâ̆o tui, kiăng kiăo tui lăng na nao.

“Mơnơi ƀơi Kỳ Co hơmâo tơlơi pơkă brơi kual dưi mơnơi pơhlôm rơnuk rơnua, ƀing čơđai anet brơi mơnơi giăm hang, tơdah trun nao anih dơlăm amra ayup đing iâu glăi pơ hang. Tơdah ƀing pơprong trun nao pơ anih dơlăm dăo kŏ ăt ayup đing iâu glăi pơ hang mơn. Tơdah hơmâo tơlơi truh sat amra yua môtô đuăi amăng ia rơsĭ, yua măi telephôn iâu nao rai kiăng abih bang dưi nao djru hrŏm”.

Bruă ƀuh ƀô̆ mơta na nao mơng ƀing mơnuih wai lăng, hrŏm hăng gơnam đung ƀơi jơlah ia jum dar pơhlôm hơđong pran jua kơ tuai. Ayong Nguyễn Hoàng Anh, tuai čuă ngui mơng Hà Nội, lăng yôm bruă pơhlôm rơnuk rơnua ƀơi anai.

“Kâo ƀuh ngă klă, hăng wai lăng kjăp biă mă, lu anih ƀu hơmâo ƀing mơnuih wai lăng tui anai ôh, ƀơi anai hơmâo tơhan djru brơi hăng hơmâo gơnam đung guang dar anih mơnơi yua anun kâo ƀuh rơnuk rơnua hăng hơđong amăng pran jua lơm nao mơnơi”.

Tui lăi pơthâo, hơdôm anih čuă ngui amăng kual ia rơsĭ ƀơi Quy Nhơn, Kỳ Co, Eo Gió, Nhơn Lý ƀudah Bãi Xép glăk pơhưč lu mơnuih ƀôn sang hăng tuai čuă ngui. Samơ̆, ăt amuñ ƀuh ia ƀlung lơm sa, dua čô mơnuih pơtah hơtai, luai nao anih ia dơlăm ƀudah mut nao kual ia kuar ataih mơng hang. Ƀơi anăp kơ tơlơi sit nik anai, gong gai ƀon lan hơmâo gum hrŏm hăng hơdôm anom bruă bơdjơ̆ nao kơtưn pơtô pơblang, pơtă pơtăn hăng pơpha mơnuih wai lăng ƀơi lu anih.

Ơi Phan Tấn Hoàng, kơ-iăng Khua Jơnum min mơnuih ƀon sang phường Quy Nhơn brơi thâo, phường hơmâo prap lui mơnuih hyu wai lăng hăng djop gơnam măi mok, pơphun dŏ gak tui mông phara, laih dong tŏ tui hrưn đĭ kjăp amăng krăo lăng.

“Mah hơmâo mơnuih wai lăng hăng hơmâo hơdră djru brơi samơ̆ ăt pơtă mơnuih ƀôn sang lơm nao mơnơi kiăng buh ao đung drơi lơm luai nao ataih mơng hang kiăng pơhlôm rơnuk rơnua. Laih dong phương ăt glăk pơlăi nao rai hăng anom bruă krăo lăng kiăng pok pơhai bruă dưm truă camera kiăo tui lăng hŭi ƀuh mơnuih ia ƀlung. Lơm ƀuh hơdôm tơlơi sat bơdjơ̆ nao tuai rai pơ Quy Nhơn, măi mok amra pơhŭi hlâo mơtăm kiăng tuai hmao tlôn bĕ hĭ”.

Ƀơi gưl tơring čar, bruă pơhlôm rơnuk rơnua brơi kơ tuai ăt hơmâo git gai khut khăt, Khua Jơnum min mơnuih ƀon sang tơring čar Gia Lai rơkâo djop gơnong bruă, ƀon lan kơtưn pel ĕp, krăo lăng hơdôm bruă ngui ngor amăng ia. Ơi Bùi Trung Hiếu, kơ-iăng Khua gơnong bruă gru grua, bơrơguăt drơi jăn hăng tuai čuă ngui tơring čar Gia Lai brơi thâo, bruă akŏ pơjing hơdră djru brơi ječ, hrŏm hăng hyu tir, krăo lăng kjăp amra lĕ hơdră bruă phun amăng bơyan hơmâo lu tuai čuă ngui anai.

“Khua Jơnum min mơnuih ƀon sang tơring čar Gia Lai hơmâo git gai đing nao kơ bruă pơhlôm rơnuk rơnua brơi kơ tuai čuă ngui lơm nao pơ tơring čar, gơnong bruă gru grua, bơrơguăt drơi jăn hăng tuai čuă ngui hơmâo gum hrŏm hăng djop gơnong bruă, djop ƀon lan pel ĕp glăk gơnam măi mok pơhlôm rơnuk rơnua brơi kơ tuai lơm nao mơnơi, ngă hiưm pă amăng bơyan pơdơi prong anai tuai nao pơ kual ia rơsĭ Gia Lai pơhlôm rơnuk rơnua amăng hrơi mông ngui ngor mơ-ak”.

Tui tơlơi sit nik brơi ƀuh, hrŏm hăng tơlơi gir run mơng anom bruă bơdjơ̆ nao, pran răng kơđiăng mơng mơnuih ƀôn sang hăng tuai čuă ngui ăt lĕ tơlơi yôm hloh. Bruă ngă tui hơdôm tơlơi pơhŭi, anăm luai tơbiă mơng kual pơhlôm rơnuk rơnua, kiăng buh ao đung drơi lơm luai hyu amra pơgôp ngă plai ƀiă ƀuh hơdôm tơlơi truh sat, kiăng rĭm wŏt nao ngui pơ ia rơsĭ jing hrơi mông čuă ngui mơ-ak hăng rơnuk rơnua./.