Sa mơguah ƀơi bul pơtâo Nhơn Châu (Cù Lao Xanh), hơdôm boh song nan hyu mă akan hơdang ăt nao rai, mut jưh ƀơi tơdrun kompan rim hrơi. Kơnong phara hĭ, ƀơi tơdrông tua nao rai či tơdrun lĕ hơmâo lu mơnuih djă măi mă rup video, čơphil rup hăng apui bơngač mơ̆ng măi ƀlip ƀlip, ƀing thâo adoh suang hăng hơdôm rơtuh čô tuai rơnguai. Hăng ƀing mơnuih juăt ƀuh na nao hăng tơlơi hơdip mơda, bruă mă mơak rơnuk rơnua ƀơi plơi pla hyu mă akan hơdang anai, jing hĭ “ƀing pơhrôp pơdah” diễn viên amăng tơlơi ră ruai glăi kơ tơlơi hơdip mơda, bruă mă ƀing gơñu. Ƀing mơnuih kơhnâo adoh suang pơhrôp pơdah gru hiam nao hrŏm ƀing hyu mă akan trun nao amăng ia rơsĭ đĭ song nan, trun amăng ia ñŭ sem lăng mă san hô, añăm amăng ia rơsĭ, mut hyu amăng kơčep jơlan anet lơ̆m bul pơtâo ia rơsĭ, kiăng bưp amăng sang anŏ mơnuih ƀôn sang, ră ruai tom mơnuih ƀôn sang plơi pla ƀơi bul ia rơsĭ. Truh mlam mơmŏt, ƀơi anih pơdah tơlơi adoh suang pơdong ƀơi bul pơtâo ia rơsĭ, pơhưč hơdôm rơbâo čô mơnuih ƀôn sang hăng tuai nao sem.

Ƀu kơnong jơlan hơdră ngui ngor mơak đôč ôh, Nhơn Châu tal blung a dưi hơmâo hơdôm klăk čô mơnuih lăng amăng dêh čar thâo nao hăng rup pơdah amăng tivi video ră ruai sit nik kơ ană mơnuih hăng tơlơi hơdip mơda amăng bul pơtâo ia rơsĭ ataih mơ̆ng kơdư hang. Amai Hồ Thị Đoan Trang, mơnuih ƀôn sang plơi Tây, să Nhơn Châu, brơi thâo, mơnuih ƀôn sang hơ̆k mơak biă mă lơm plơi pla ta dưi pơdah đĭ amăng jơlan hơdah rup amăng tivi ƀuh tơlơi sit nik hăng dưi bưp ră ruai tom ƀing kơhnâo adoh suang nao ngui:

“Kâo mơak biă mă yua mơ̆ng sui laih ƀơi bul pơtâo plao ia rơsĭ hơmâo jơlan hơdră prong hăng pơhưč lu tuai rai ngui ƀơi plao ia Cù Lao Xanh ƀing gơmơi. Kâo čang rơmang lĕ bul pơtâo anai amra hơmâo lu bruă ngă jơnum ngui hloh dơ̆ng kiăng pơđĭ kyar bruă tuai čuă ngui”.

Ơi Nguyễn Tiến Dũng, Khua git gai ping gah să Nhơn Châu brơi thâo, anŏ tŭ yua mơ̆ng jơlan hơdră pơdah amăng tivi anun ƀuh rơđah rup rap ră ruai glăi kơ bul pơtâo ia rơsĭ kiăng lu mơnuih ƀuh, ăt pơdah thâo plang tơlơi pơhing mơnuih mơnam, atur ia rơgơi mrô, pơhưč lu tuai nao ngui ƀơi plơi pla:

“Amăng jơlan hơdră anăn “Say Hi hyơ̆k hyơr” kơkuh mơak hrŏm abih bang phrâo anai pôr pơthâo amăng djop plang tơlơi  pơhing, lu mơnuih ƀôn sang hăng tuai rơnguai thâo rai kơ Nhơn Châu lu biă mă. Kâo čang rơmang Nhơn Châu hăng anŏ gêh găl hăng mông tŭ yua mơ̆ng jơlan hơdră amra pơhưč lu tuai kiăng pôr pơthâo rup rap, ană mơnuih, tơlơi hơdip mơda ƀơi tơring čar hăng djop anih anom hiam pơ anai pioh pơđĭ kyar thun blan pơ anăp”.

Hrŏm hăng hơdôm jơlan hơdră pơdah amăng tivi ƀuh sit nik, Gia Lai ăt hlăk ră ruai glăi kơ pô hăng rup video pơdah amăng tivi hăng plang ia rơgơi mrô. Pơhrua kơ bruă pơjing rai phim tui jơlan hơdră mă rup prăp lui tong ten, lu črăn phim ruah mă lu črăn hyu mă rup plơi pla, ƀôn lan lir hơbit hăng bruă hơkrŭ Tây Sơn đưm pơhrôp glăi hing ang. Puih tơhan, ling tơhan rŭi đưm, sang hră pơhrăm tơhan, anih akă aseh ƀudah sang mơnă hơmâo pơhrôp glăi lu črăn hiam, kơdrưh biă mă, pioh ngă phim.

Tơdơi kơ phim ngă giong, abih bang anih anom anai amra djă pioh glăi amăng rup phim, kah hăng phim pok brơi, anih kơ ƀing tuai dưi mut lăng, kah hăng hyu sit nik amăng gru grua đưm, găn rơgao gru grua hiam hăng thâo tong ten kơ kual lŏn arăng hmư̆ thâo bơtaih đưm Tây Sơn. Mơnuih git gai ngă phim Võ Đức hlăk pok pơhai sa kơčăo bruă ngă phim ƀơi să Tây Sơn kah pơpha:

“Ƀing gơmơi kiăng pơtruh brơi mơnuih lăng hăng lu ia iom phrâo kơnang kơ atur tơlơi jơnum pơdah tơlơi adoh suang hơmâo biă kiăng kơ lu mơnuih pơhrôp jĕ giăm biă mă, hơmâo tơlơi pơmin pơƀuh amăng lăm pran jua hăng tơlơi hơdip mơda rim hrơi, jĕ giăm hăng djop mơnuih. Lơ̆m hrơi mông ngă phim tal anai, bơwih brơi kơ bruă tuai hyu ngui, ăt kah hăng sa kông ngăn gru grua anet mơ̆ khul ngă phim pioh kơ plơi pla ta pô”.

Tơdah phim pơhrôp hiam djă pioh tơlơi hơdor glăi đưm adoh suang pok brơi bah amăng phrâo, brơi kơ ƀing hlăk ai rơnuk anai nao pơ Gia Lai hăng jơlan hơdră tơlơi adoh suang. Mega Concert "Gia Lai-Lŏn glai čư̆ siăng tek nao truh ia rơsĭ” amăng mông jơnum pok Thun Tuai čuă ngui gưl dêh čar 2026 pơphun ƀơi Quy Nhơn hơmâo pơtum lu mơnuih kơhnăk hmư̆ hing adoh suang, ƀing ngă phim, mơnuih hiam arăng khăp, hơmâo pơhưč truh 70.000 čo mơnuih nao sem rai mơ̆ng djop tơring čar, ƀôn prong. Ƀu ƀiă ôh mơnuih tal blung a nao pơ Gia Lai yua kơ mlam adoh suang anun đôč, samơ̆ tơdơi kơ anun pioh lu mông hyu ĕp amăng ia rơsĭ, glai klô hăng gru grua ƀơi tơring čar. Gơyut hlăk ai Lê Thanh Phương Hạ, brơi thâo:

“Kâo dŏ pơ Nha Trang rai pơ anai. Tal blung a kual Tong krah ta hơmâo jơlan hơdră concert prong hrup anun, anun kâo khom rai ĕp lăng”.

Hơdôm tơlơi ră ruai glăi hăng rup pơdah tivi, phim hăng adoh suang hlăk ba glăi boh tŭ yua sit nik rơđah rơđong kơ bruă pơđĭ tui rơnoh pơhrui glăi mơ̆ng tuai hyu ngui Gia Lai. Kơnong amăng blan 7/2026, tơring čar hơmâo čơkă truh 1,8 klăk wơ̆t tuai, đĭ tui 40% pơkă hăng tal anai thun hlâo. Pơkom tui rơnoh amăng 7 blan rơgao lĕ hơmâo rơbêh 10.55 klăk wơ̆t tuai. Amăng anun, tuai mơ̆ng jar kmar đĭ năng ai 77%. Prăk pơhrui glăi mơ̆ng tuai hyu ngui hơmâo 23.000 klai prăk, đĭ 22%.

Gah klô kơ hơdôm mrô anun lĕ anŏ pơblih phrâo hơdră čơkă tuai hyu ngui: mơ̆ng bruă pôr pơthâo anih či nao, truh pơ bruă pơčrâo brơi anih či dŏ, găn rơgao; mơ̆ng bruă lăi pơthâo anih hiam, lŏn mơnai glai klô truh pơ bruă ră ruai glăi hăng rup hơđong, rup bơtơpư̆ jing video phim pơdah brơi lăng, ngă kơ tuai rơnguai kiăng gơñu pô đuăi hyu ĕp, dŏ glăi amăng plơi pla. Ơi Hà Văn Siêu, Kơ-iăng khua anom bruă Tuai čuă ngui dêh čar Việt Nam brơi thâo, tơring čar Gia Lai kiăng pơlar tui hơdră ngă phrâo anai:

“Gia Lai khom ngă hiư̆m pă djă pơkong tơkai ƀing tuai hor dŏ glăi sui ƀiă hăng bruă hyu ngui, ĕp amăng plơi pla, lŏn hmua, hmư̆ tơlơi ră ruai pơhưč pran jua hăng anŏ phara hơjăn đôč hơmâo pơ anih či nao. Gia Lai ăt ba yua boh thâo ia rơgơi djă pioh mrô kông ngăn anih tuai či hyu ngui. Ƀing ta ba yua boh thâo ia rơgơi ră ruai glăi pơhưč tuai nao pơ Gia Lai amra jing anăp ngă bruă, tơlơi kiăng hăng bruă khom ngă kơ anom bruă čơkă tuai Gia Lai lăi pha laih anun Việt Nam ta hnun mơ̆n kơñ pơgi”.

Gia Lai hlăk ruah mă yak rơbat phrâo gah bruă tuh tia pơkra ming pơjing rai jơlan hơdoh suang mơak, kiăng djop jơlan hơdră pơdah rup amăng tivi, rim črăn phim, rim mlam pơdah adoh suang lĕ sa tơlơi ră ruai phrâo râo pơdưh kual lŏn. Laih mơnuih ƀôn sang plơi pla jing sa črăn ƀing arăng ră ruai nao anun, tuai hyu ngui ƀu kơnong jing anŏ pôr pơthâo đôč ôh, dŏ jing bruă pơhrua nao hăng gru grua hiam phara laih anun tơlơi hơdor pioh mơ̆ng abih bang mơnuih amăng plơi pla.