Tơdah kar hăng gong drai mơnuih djuai ania Êđê hơmâo gru bơnga pơpŭ kơ yang rơbang, kiăng hơmâo tơlơi klă hiam, yâo mơ-ak hăng ană plơi, hơmâo angin klă hơjan hiam lĕ hăng mơnuih djuai ania Bahnar gong drai pơ ala kơ pran kơtang, tơlơi pơdrong sah na nao. Mơnuih kơhnăk Yung, 74 thun, plơi Đê Kjiêng (să Ayun, tơring glông Mang Yang, Gia Lai) brơi thâo, hăng tơngan rơguăt bruă mơ̆ng pô, mơnuih djuai ania Bahnar krih, trah, kač gru, pik ia iŏm phara, pơdah tơlơi đăo kơnang kơ yang rơbang. Lơ̆m pơdong đĭ gong drai, djŏp bruă pơkŏn amăng plơi khŏm pơdơi hĭ, pơƀut pơdong gong drai đôč yơh.

“Gong drai pơkra hăng phun ƀlang tung, phun ƀlang lơ̆m ngă yang adai pơtrum kơbao. Khŏm ngă yang pơtrum kơbao, đĭ sang rung phrâo, anun kah mơ̆ng pơdong đĭ gong drai anai. Mơ̆ng đưm lêng kơ tui anun soh yơh, khŏm pơkra gong drai lơ̆m ngă yang pơtrum kơbao, đĭ sang rung”.

Bơ mơnuih kơhnăk Rčŏm Chú, dŏ ƀơi Ƀôn Rưng Ama Nin, să Ea Rƀor, plơi prong Ayunpa, tơring čar Gia Lai brơi thâo, hăng mơnuih djuai ania Jarai, gong drai jing bơngăt bơnguai mơ̆ng tơlơi ngă yang. Ia iŏm hơmâo pik ƀơi gong drai djuai ania Jarai lĕ jŭ, mriah, kô̆. Hlâo či pơdong đĭ gong drai, tha plơi, pô phai hăng ƀing tha amăng plơi pơčrông lăng ƀơ̆i, jao bruă ĕp gơnam či pơhrup, laih anun amra ngă yang hlâo či pơdong gong drai. Gong drai pơ ala brơi tơlơi čang rơmang mơ̆ng neh met wa kiăng yang thâo, kiăng ană plơi hơmâo tơlơi hơdip trơi pơđao yâo mơ-ak.

“Arăng pơdong gong drai lơ̆m ngă yang pơtao apui hơduah ia hơjan, tal dua lĕ amra pơdong lơ̆m ngă yang kơbao. Phun hơdrai yôm biă amăng tơlơi hơdip djuai ania Jarai”.

Mơnuih kơhnăk Y Se, ƀôn Ja Rah, să Nâm Nung, tơring glông Krông Nô, tơring čar Dak Lăk jing sa čô mơnuih thâo hluh kơ gong drai djuai ania M’nông brơi thâo, gong drai ƀu kơnong pơtruh ană mơnuih hăng yang rơbang đôč ôh mơ̆ ăt hơmâo anŏ yôm gah gru grua djuai ania dong. Mơnuih dưi pơdong gong drai lĕ mơnuih ană plơi kơnang, thâo hluh kơ rup kač, bơnga pơhrup ƀơi gong drai. Gong drai jing anih yang dŏ krăp lăng tơlơi ngui ngor, ngă yang amăng plơi. Mơnuih kơhnăk Y Se brơi thâo:

“Tơlơi yôm lơ̆m pơkra gong drai lĕ ngă yang suaih pral puh đuăi klin klon, tơlơi duăm ruă, ƀing ta đưm adih rin rơpa ƀu hơmâo prăk kăk, ta ngă hmua kiăng hơmâo pơdai sĭ, sĭ blơi un, blơi kơbao, rơmô glăi rông tơdah kiăng pơdrong sah ta khŏm ngă yang suaih pral pơ sang hăng rơmô mơtăm. Tơdah ngă yang hơduah ia hơjan lĕ hơmâo pơphun ƀơi pin ia, pơdong gong drai kiăng yang rơbang thâo”.

Hăng mơnuih djuai ania Sêdang, gong drai hơmâo rup pơdai. Akŏ thun phrâo, neh met wa djuai ania Sêdang juăt ngă yang huă asơi hle, laih anun khŏm hơmâo gong drai pơdong tong krah lan sang ngă yang. Mơnuih kơhnăk A Bloi, ƀuôn Kon Hrĭng, să Ea Hđinh, tơring glông Čư̆ M’gar, tơring čar Dak Lăk lăi, djuai ania Sêdang juăt ruah phun kram pơ-o prong, tơpă, hiam či pơkra gong drai. Hơjung ñu hơmâo pơkra rup pơdai hăng čang rơmang kiăng tơlơi hơdip ană plơi trơi pơđao, yâo mơ-ak, pơdai kơtor bă kơ tông sang.

“Ƀơi hơjung gong drai hơmâo pơkra 5 rup pơtŭ, ƀơi yŭ hơmâo rup čim grư̆, hơmâo hrĕ ayul bơrơhñai pơkra mơ̆ng kram, pik ia iŏm hiam biă, giong anun hrĕ ayul tal dua dong. Gong drai ƀơi phun ñu hơmâo sang mơñam hăng kram či pioh gơnam ngă yang”.

Gong drai mơ̆ng djuai ania kual dap Kơdư hơmâo gru grua yôm, kač rup hiam phara mơ̆ng ƀing kơhnăk rơgơi mơbruă, laih anun ƀu dưi kơƀah ôh amăng tơlơi ngui ngor. Gong drai hơmâo pơdong amăng hrơi ngui ngor, ngă yang pơdah pran jua kơtưn đĭ pơ anăp, čơkă tơlơi klă hiam hloh amăng tơlơi hơdip mơ̆ng mơnuih ƀôn sang kual Dap Kơdư.