Prôk mơ̆ng mơguah, Tơdrun kom păn Phan Thiết dik dak mơtuk mơtul mơnuih nao rai. Hơdôm boh song, ƀat tô mă akan hơmâo pơhrup dưm hla gru ngũ hành, hương án, čing hơgor ba mơtăm; ƀing ơi tha mă akan buh ao dai, khăn akă ƀơi akŏ prăp lui kơ hrơi ngă yang. Krĕp 7 mông, ƀat tô pơpĕ đuăi mơ̆ng tơdrun ia, nao pơ Hòn Lao mơtăm či ngă yang, tơdơi kơ anun glăi pơ amăng bah ia Cồn Chà. Mơ̆ng anai, hơdôm rơtuh čô mơnuih rơbat tơkai ter hang ia krông Cà Ty, hlâo či glăi pơ Dinh Vạn Thủy Tú lơ̆m ngă yang giong.

Ngă yang iâu tŭ, tơkung Akan mơyang Lệnh Ông Sanh pơlir hăng tơlơi phiăn pơpŭ, đăo kơ yang Nam Hải, ƀudah akan Ông, mơ̆ng mơnuih ƀôn sang pơ ia rơsĭ. Mơ̆ng tơlơi ngă yang anai, mơnuih ƀôn sang rơkâo brơi plơi pla, lŏn ia rơnuk rơnua, yâo mơak, ia rơsĭ rô rơnang, angin rơnĕ, ƀat tô nao rai huăi lung lup kŭp pơđang, mă akan hơmâo. Ơi Phạm Triều, mơnuih hơmâo rơbêh 45 thun laih dŏ hrŏm ia rơsĭ, ñu lăi: “Tơlơi ngă yang anai yom biă hăng mơnuih mă akan ƀing gơmơi, mơ̆ng đưm laih. Truh hrơi Ngă yang akan, neh met wa rơkâo brơi plơi pla, lŏn ia ta mơak mơai, rơnuk rơnua, bơwih ƀong đĭ, nao pơ ia rơsĭ tơphă tơpai, huăi hơmâo tơlơi truh, bưng bôt”.

Hrŏm hăng ngă yang iâu akan, bruă ngă yang ƀơi Dinh Vạn Thủy Tú ăt hơmâo ngă yang lăi pơhmư̆ kơ yang rơbang, hơdor bơni kơ ơi pơtao, iâu atâo brâo, lâ̆o tơlơi ngă yang hăng pơđung apui kơđen dian ƀơi ia krông Cà Ty. Bruă ngui ngor hơmâo adoh bả trạo, adoh bội, adoh bài chòi, suang kơdăt ania čơgrai, ngui tơlơi ngui đưm, adoh suang ter jơlan, jơnum ngui sang čơ hăng pơdă gơnam ƀong huă jơman mơ̆ng Phan Thiết. Mơ̆ng anun, mơnuih ƀôn sang hăng tuai rơnguai pel ĕp tơlơi hơdip mơda, tơlơi ngă yang hăng gru grua mơ̆ng neh met wa pơ ia rơsĭ. Ơi Đào Quang Thanh, Kơ-iăng khua jơnum min mơnuih ƀôn sang phường Phan Thiết, lăi bruă djă pioh tơlơi ngă yang lĕ khŏm lăng mơnuih ƀôn sang yơh phun ñu, laih dong pơlir hrŏm hăng čơkă tuai hyu ngui: “Tơlơi yom hloh lĕ mông ngă yang ngui ngor anai khŏm hơmâo pơphun pơpŭ kơ tơlơi phiăn đưm, laih anun sit mơnuih ƀôn sang pơ anai yơh ngă pô. Bruă pơmut hrŏm tơlơi ngă yang hăng čơkă tuai ăt hơmâo ruah mă mơn, ba pơƀuh gru hiam ia rơsĭ Phan Thiết, ăt ƀu ngă rơngiă ôh anŏ kơdrưh yom mơ̆ng tơlơi ngă yang anai”.

Amăng tơlơi hơdip đĭ kyar tui mơ̆ng plơi prong, bruă bơwih bơwang, čơkă tuai pơ ia rơsĭ mơ̆ng Lâm Đồng, hơdôm anih mă akan, Dinh Vạn Thủy Tú, jua adoh bả trạo hăng khul iâu yang akan ƀơi ia krông Cà Ty ăt ngă ƀing ta hơdor na nao kơ anŏ dlăm gru grua hiam mơ̆ng Phan Thiết. Ngă yang akan yua hnun ƀu kơnong djă pioh pran đăo kơnang mơ̆ng mơnuih mă akan hlâo či nao pơ ia rơsĭ đôč ôh, ăt tŏ tui bơngăt jua kual ia rơsĭ, kiăng anŏ yom anun hơmâo djă pioh, bang hyu, ngă hiam ƀhêm gru grua mơ̆ng Lâm Đồng amăng anih đĭ kyar phrâo./.