Sang apui anet mơ̆n mơ̆ng sang anŏ amai Ksor H’Liên, 37 thun, hmư̆ na nao jua tul añăm, sô̆ tơrong pơhăng, hla plum ngă añăm. Amăng anih ƀơi tơpur apui anun, hơmâo apui jă djuh rŏm amăng tơpur mriah hur, ieo gah jum dar tơpur hơmâo rêu, hơkă, pra gêt ia, hơdôm boh kơtor yôl lui ƀơi pra apui, či pơnăng sang apui….Sa boh telephôn rơgơi dưm lui sa anih pioh mă rup, ngă video, rim črăn amai H’Liên prăp lui či pôr pơthâo kơ abih bang hăng ƀing gơyut lăng, ƀuh bruă ñu ngă, gơnam ñu pơkra amăng plang pơhing mơnuih mơnam facebook.

Ñu pơkra mơnong ƀong huă hơtŭk añăm rah, mă rup video rah. Mơ̆ng bruă prăp lui hla añăm rơ̆k, truh pơ hra pơhăng, gơnam dưm hrŏm či pơjing añăm ƀong hlâo kơ hơtŭk riă, jing añăm ƀong jơman mơ̆ng djuai ania pô, abih bang ñu mă rup rim črăn, pơtum hĭ giong abih ñu hlong pơdah brơi abih bang lăng. Hăng amai H’Liên lĕ, sang apui gơñu anun ƀu kơnong anih hơtŭk riă tơnă hơbai asơi añăm đôč ôh, ñu hơdor pioh, čăng glăi gru grua anih tơnă asơi hơbai añăm jing sang apui, tơpur apui mơ̆ng djuai ania Jarai mơ̆ng đưm.

“Sang apui anai hăng kâo ƀu kơnong jing anih dŏ pơkra pơjing mơnong ƀong huă, anih hơtŭk riă tơnă hơbai asơi añăm đôč ôh, kiăng hơdor glăi tơlơi hiam gru grua đưm mơ̆ng djuai ania Jarai hơbai gơmơi. Yua kơ anun yơh, kâo gir run akŏ pơjing glăi anih dŏ, jĕ giăm hloh, hơmâo tơpur apui, kơčet djuh, pra gêt ia, hơmâo khul kơtor krô…kâo kiăng arăng thâo hluh lu mơta kơ mơnuih mơnam djuai ania Jarai hơdip mơda, dŏ dong ƀong huă đưm adih, jing sa gru grua hiam djuai ania pô”.

Sit mơ̆n năng ai tơbiă mŏng ƀuh rup rap, anih dŏ, bruă ngă juăt hơmâo tui tơđar hrơi tơlơi hơdip amăng plơi pla hơmâo pơdah amăng video amai H’Liên pô ngă phara biă mă. Mơ̆ng sang apui anet đôč, pơdah thâo lu mơta añăm pơtam, mơnong mơnuă pơkra pơjing asơi añăm, mơnong ƀong mơ̆ng djuai ania Jarai đưm hăng ră anai kah hăng hla plum, hơbơi hna, tơrong phĭ hơtŭk hăng akan krô, hra tul hăng hơdŏm sao….hơmâo pơdah thâo amăng plăng tơlơi pơhing hlong truh pơ rơngiao arăng thâo nao rơkâo blơi, jai hrơi lu mơnuih thâo. Lơ̆m lu mơta video amai H’Liên pơdưm brơi ƀuh amăng anăn facebook čih anăn Mị Son kiăng lăi amĭ Son, hơmâo pơhưč hơdôm rơtuh rơbâo čô mơnuih ĕp lăng, laih anun truh hơdôm klăk wơ̆t arăng sem hăng čih pơhiăp ră ruai tom.

“Hnang blung kâo pơmin mă rup video djă pioh đôč, laih anun mơ-it brơi gơyut gơyâo, phung wang adơi amai lăng ngui. Ƀu thâo tah, hơdôm video anun hơmâo lu mơnuih sem đing nao. Hơmâo lu tơlơi čih mơ-it tơlơi pơhiăp tơña kơ hơdră hơtŭk riă, pơkra ming añăm pơtam, hla añăm rơ̆k, tơlơi phiăn juăt đưm Jarai. Kâo ƀuh tui anun mơak biă mă hăng ăt dŏ kơtuă mơ̆n”.

Mơ̆ng tơlơi arăng đing lu tui anun, hơdôm mơta añăm pơtam, mơnong ƀong huă lăi pơthâo amăng video ñu ăt dưi pơtruh brơi truh pơ tơngan mơnuih ĕp lăng blơi ƀong. Amai H’Liên pơkra pơjing mơnong ƀong huă, anăm hla rơ̆k hăng lăi pơthâo amăng plang tơlơi pơhing mơnuih mơnam. Hơdôm mơta añăm mơnong ƀong gru grua ƀu kơnong dưi hơmâo lu mơnuih thâo đôč ôh, dŏ djru kơ ñu hơmâo prăk pơhrui glăi kơ sang anŏ mơ̆ng bruă lăi pơthâo amăng facebook. Biă mă ñu, añăm akan kơhŭl sô̆ hăng hla eč Jarai laih anun hra  tul hăng hơdŏm sao yơh lu mơnuih hor blơi ƀong:

“Hnang blung kâo pơkra ming hơdôm mơta mơnong ƀong djơh hăng anai pioh ƀong huă amăng sang anŏ đôč. Tơdơi kơ video kâo lu mơnuih ĕp, hơmâo lu mơnuih rơkâo lăi: ih sĭ mơ̆n, rơkâo ih mơ-it brơi kơ gơmơi sa črăn akan kơhŭl sô̆ anun hơdôm. Mông anun kâo pơmin, tơdah lu mơnuih hor ƀong añăm anai, yua hơgĕt ta ƀu pơkra ming hăng ba sĭ mơdrô kơ arăng blơi. Laih anun añăm ƀong akan k’hul tul hăng hla eč Jarai kâo pơkra ming arăng blơi lu, yua anai lĕ añăm ƀong juăt pơkra na nao laih mơ̆ng djuai ania Jarai laih anun mơnong lu mơnuih hor ƀong mơ̆n, gơñu tơña blơi. Ră anai, rơngiao kơ bruă lăi pơthâo mơnong ƀong huă pơdah amăng plang mơnuih mơnam lĕ kâo hơmâo dơ̆ng prăk pơhrui glăi kơ sang anŏ prăk kăk sĭ mơdrô”.

Gah klôn hơdôm mơnit phim video anun hơmâo klăk mơnuih ĕp anun, dŏ hơmâo tơlơi djru ba mơ̆ng sang anŏ, biă mă ñu rơkơi ñu, ayong Ksor Hai. Rơkơi ñu yơh mơnuih dŏ hrŏm, lăng bruă ñu ngă mơ̆ng hrơi blung, pơjing rai video, laih anun ăt jing thâo hluh tơlơi či kiăng, anŏ hur har mơ̆ng amai H’Liên pioh kơ bruă anai.

“Tal blung a ƀuh bơnai ta tơnă hơbai mơnong ƀong huă kơ sang anŏ ta pơdah amăng plang tơlơi pơhing mơak mơ̆n laih anun dŏ kơtuă mơ̆n yua kơ hơdôm mơta mơnong ƀong huă anun lu mơnuih đing nao tơña bla tui anun. Ƀuh bơnai ta hor hăng pơphun ngă bruă jai hrơi lu hloh, hơmâo mơnuih dong yua, mông anun hlơi djru ba hơgĕt lĕ, djru ba yơh. Sang anŏ ăt mơak mơ̆n yua hơmâo video anun, lu mơnuih thâo hơdôm mơta mơnong ƀong gru grua đưm djuai ania Jarai ta”.

Tơlơi kiăng ngă pơhưč pran jua pơdah amăng video mơ̆ng amai H’Liên ƀu tơguan ngă lu mơta, gleh glar đơi ôh, yua mơ̆ng rup video ñu pơƀuh brơi anŏ dôl djhôl đôč, añăm pơtam juăt hơmâo amăng sang anŏ tlam mơguah rim hrơi, tơpă ară, sit nik. Amai Phan Thị Liên, dŏ ƀơi phường Plei Ku, tơring čar Gia Lai, brơi thâo:

“Kâo hor biă phim video mơ̆ng H’Liên pô ngă yua kơ ñu tơpă hăng jĕ giăm biă mă. Mơ̆ng tơlơi hơmâo, ră ruai rim hrơi tơlơi hơdip tơđar hrơi đôč, ñu pơtruh brơi kơ djop mơnuih thâo hluh lu hloh kơ tơlơi hơdip mơda, bruă mă, dŏ dong ƀong huă, gru grua djuai ania Jarai laih anun dŏ djă pioh anŏ hơdor glăi hiam, jĕ giăm amăng plơi pla”.

Mơ̆ng hơdôm mơta mơnong ƀong huă juăt ƀuh anun amăng sang apui amai H’Liên hlăk ba tơlơi ră ruai glăi tơlơi hơdip mơda hăng gru grua đưm Jarai hơbai truh pơ djop mơnuih ĕp lăng jĕ giăm hloh, tơpă biă mă:

“Kâo ƀu pơmin ôh kâo hlăk ngă bruă hơgĕt prong prin. Kâo kơnong kiăng pơjing rai hơdôm mơta mơnong ƀong mơ̆ ta juăt ƀong, juăt thâo đôč. Samơ̆ tơdah kơnang mơ̆ng mơnong ƀong anun mơ̆ lu mơnuih thâo hluh ƀiă dơ̆ng kơ djuai ania Jarai lĕ, kâo pơmin anun ăt jing jơlan hơdră djă pioh gru grua hiam djuai ania ta. Laih anun kâo čang rơmang tơdơi anai, lu mơta mơnong ƀong, añăm pơtam djơh hăng anun dưi pơkra ming, thâo pơjing rai hnă ƀong jơman hloh, kiăng lu mơnuih thâo, ƀu kơnong amăng plơi pla đôč ôh, dŏ truh pơ anih pơkŏn dơ̆ng thâo”.