Nao lăng pơ anih pơkra rơmô ƀhu sa wơ̆t pơ-iă Tuấn Hậu ƀơi tơring kual Phú Túc, tơring glông Krông Pa, tơring čar Gia Lai hơdôm hrơi anai, ƀing gơmơi ƀuh lu jơgăn, pra ƀhu mơnŏng rơmô, anih hơmâo pơ-iă pơčrang djŏp mơ̆ng kual lŏn Dap Kơdư. Mơ̆ng pô sang truh kơ mơnuih mă bruă lêng kơ ngă bruă ječ ameč soh, kiăng dưi hơmâo mơnŏng rơmô ƀăt jơman hmư̆ hing mơ̆ng Krông Pa bơwih brơi amăng bơyan Tê̆t anai. Mơnŏng rơmô arăng tă đơ plă tơngan, hơmâo ruah mơnŏng jơman hloh, ƀu hơmâo rơmă, tơdơi kơ luk jriu ngôt hra rơsun toih, hăng eh čim, aplăng amăng sa mông, amra hơmâo ƀhu đĭ hăng pra mơ̆ng 3 truh kơ 4 mông.

Amai Hoàng Thị Minh Châu, sa čô mơnuih nao mă bruă pơ ataih, juăt blơi biă mơnŏng rơmô ƀhu pơ-iă ngă gơnam pơpŭ Tê̆t kơ sang anŏ, ñu bơni:“Kâo mhao ƀong huă rơmô ƀhu sa wơ̆t pơ-iă ƀơi Krông Pa, Gia Lai, yua rơmô pơ anai ñu mih, ƀăt jơman, ƀâo hiam, mơnŏng khuă, hơmâo ƀhu pơ-iă kơtang, ƀong ñu phara biă. Rim thun giăm tê̆t lĕ kâo blơi hơdôm kĭ či brơi kơ gơyut gơyâo sang anŏ”.

Ơi Trần Quang Tuấn - Pô sang pơkra mơnŏng Tuấn Hâụ brơi thâo, rim hrơi pơ-iă hiam, ñu dưi ƀhu dua wơ̆t, mơ̆ng 9 mông truh pơ 12 mông yang hrơi dong, laih dong mơ̆ng 12 mông truh pơ 3 mông tlam. Ơi Tuấn brơi thâo, mơ̆ng gơnam juăt ƀong mơ̆ng djuai ania Jarai pơ anai, mơnŏng rơmô sa wơ̆t pơ-iă Krông Pa ră anai hơmâo sĭ pơ lu anih laih:“Gơnam ƀong anai hơmâo mơ̆ng djuai ania Jarai, hơmâo mơ̆ng hlâo laih, mơ̆ng anun neh met wa pơkra sĭ kơ tuai. Kơnong bruă jriu ngôt hra lĕ gơmơi ngă kiăo tui sang anŏ gơmơi thâo, ƀu kiăo tui arăng ôh. Rim wơ̆t hơmâo pơphun jơnum pơƀuh gơnam tam lĕ sang anŏ gơmơi nao soh. Hơmâo sang čơ iâu nao lĕ gơmơi nao či pơƀuh gơnam anai truh kơ ƀing blơi klă hloh”.

Mơ̆ng gơnam juăt ƀong mơ̆ng đưm hlâo, mơnŏng rơmô ƀhu sa wơ̆t pơ-iă jing sa mơta gơnam hơmâo lu pơ tơring glông Krông Pa, hăng lu sang anŏ pơkra, hơmâo anih hmư̆ hing, hơmâo hră OCOP mơ̆ng tơring čar. Yă Hồ Thị Mười - Pô sang pơkra gơnam Mười Đức tơring kual Phú Túc, tơring glông Krông Pa apăn bruă pơkra mơnŏng rơmô 30 thun anai laih. Tui hăng yă Mười, rim hrơi, sang ñu pơkra năng ai ñu 50kg mơnŏng rơmô săt. Hrơi giăm Tê̆t tui anai, djơ̆ hrơi ñu pơkra mơ̆ng 5 truh kơ 7 tạ mơnŏng rơmô sĭ kơ hơdôm boh sang sĭ mơdrô, ba glăi prăk lu biă:“Ră anai, sang anŏ glăk hơmâo 3 asar pơtŭ tơring glông brơi laih anun pơ anăp dong tơring glông kiăng pơđĭ tui 4 asar pơtŭ dong, gơnam mơ̆ng sang anŏ gơmơi hmư̆ hing hloh, gơnam pơkra jơman hloh, kiăng dưi ba sĭ, laih anun ta khŏm hơmâo 4 asar pơtŭ kiăng dưi kiăo tui anih sĭ mơdrô amăng dêh čar. Yua kơ tơlơi suaih pral mơ̆ng mơnuih blơi mơn anun jing kâo anăp nao pơkra gơnam hơdjă, gơnam klă hloh”.

Mơnŏng rơmô ƀhu sa wơ̆t pơ-iă ră anai ƀu kơnong jing gơnam hmư̆ hing mơ̆ng kual “lŏn pơ-iă hang” Krông Pa đôč ôh, lu sang sĭ mơdrô gơnam ƀong huă anet prong ƀơi Gia Lai ba gơnam anai pơmut amăng hră čih mơnŏng ƀong huă či pŭ kơ tuai, biă ñu lĕ hơmâo anăn păn hmư̆ hing mơ̆ng anih pơkra sĭ. Tui hăng amai Lê Hòa, pô shop “Nông trang Foods” ƀơi Pleiku, mơ̆ng akŏ blan Chạp rim thun, ƀing tuai amăng dêh čar ta nao blơi mơnŏng rơmô ƀhu sa wơ̆t pơ-iă ngă gơnam pơpŭ Tê̆t: “Hơdôm thun giăm anai mơnŏng rơmô sa wơ̆t pơ-iă jai hrơi hơmâo lu mơnuih hmư̆ hing yua dah anai lĕ mơnŏng ƀong jơman, hui đôč anih hơmâo, yua hơmâo anŏ ƀăt jơman phara hơjăn mơ̆ng kual Dap Kơdư anun jing lu mơnuih nao pơ Gia Lai ĕp blơi. Jing anih juăt sĭ gơnam hmư̆ hing kual Dap Kơdư, mơ̆ng akŏ blan 11 blan di lĕ shop hơmâo mơnuih mơ̆ng tơring čar pơkŏn tơña blơi ngă gơnam pơpŭ tê̆t, brơi kơ adơi ayong anong wa. Hăng bruă sĭ mơdrô amuñ ƀiă tui ră anai, bruă sĭ gơnam hmư̆ hing kar hăng mơnŏng rơmô sa wơ̆t pơ-iă, kâo pơmin amra hơmâo lu mơnuih blơi, biă ñu lĕ amăng hrơi ngui ngor, hrơi Tê̆t”.

Hăng pŭ rơmô rơbêh kơ 64.000 drơi, Krông Pa glăk pơtrut klă tơlơi gêh gal anai. Tar ƀar tơring glông ră anai hơmâo năng ai 30 anih pơkra mơnŏng rơmô sa wơ̆t pơ-iă. Lăp đing nao, amăng mrô 29 gơnam OCOP mơ̆ng tơring glông, hơmâo truh 20 mơta gơnam pơkra mơ̆ng mơnŏng rơmô kah hăng mơnŏng rơmô krô tul săn, mơnŏng rơmô krô, rơsŭ rơmô ƀhu sa wơ̆t pơ-iă, mơnŏng rơmô pơhang krô. Ơi Võ Ngọc Châu - Khua anom bruă hmua hăng pơđĭ kyar ƀôn lan tơring glông brơi thâo:“Rim thun, tơring glông ăt pơkiăo nao pô sang hơmâo anăn OCOP gum nao pơƀuh anăn gơnam hmư̆ hing amăng tơring glông, pơ tơring čar, pơ hơdôm boh tơring čar ƀôn prong pơkŏn dong. Bruă anai kiăng pơƀuh hăng bang hyu anăn mơnŏng rơmô sa wơ̆t pơ-iă Krông Pa kiăng abih bang mơnuih thâo. Kiăng đĭ kyar kjăp, tơring glông djru ba măi mok kĭ thuâ̆t đah mơ̆ng pơđĭ yôm anăn păn, pok prong anih sĭ mơdrô, đĭ kyar pơtruh hrŏm mơ̆ng bruă pơkra truh kơ blơi yua”.

Mơ̆ng gơnam juăt ƀong mơ̆ng đưm laih mơ̆ng djuai ania Jarai, mơnŏng rơmô ƀhu sa wơ̆t pơ-iă Krông Pa jing gơnam hmư̆ hing hơmâo lu mơnuih kiăng blơi, djru đĭ kyar bơwih ƀong amăng tơring. Lơ̆m bơyan Tê̆t truh, anŏ ƀăt jơman mơ̆ng mơnŏng rơmô jai yôm hloh, kar hăng gru hiam bruă ƀong huă mơ̆ng kual Dap Kơdư./.