Plơi Khá dŏ giăm đam Jơlan prong mrô 6, ataih mơ̆ng tơring kual Yên Châu, tơring glông Yên Châu giăm 10km anăp nao Hà Nội. Amăng plơi hơmâo rơbêh 90 boh sang anŏ, rơbêh 420 čô mơnuih, abih bang lêng kơ djuai ania Thái soh. Nao pơ plơi Khá, ƀing tuai amra mut amăng anih mơ-ak, hơ-et mơ̆ng sa boh plơi Thái đưm, abih bang sang anŏ lêng kơ dŏ amăng sang kyâo đưm, jum dar hơmâo phun pơ-ô̆, phun amil prong krên dên tơ-ui biă mă, hơmâo čroh ia Vạt đuăi jum dar...

Ơi Quàng Văn Phanh, 80 thun, mơnuih amăng plơi Khá brơi thâo, neh met wa amăng plơi ră anai ăt dŏ djă lui hăng pơtrut tui lu gru hiam mơ̆ng djuai ania Thái, kar hăng adoh tơlơi adoh đưm, pĕ goong atông brô̆; mơñam mrai, thuăk kơteh khăn piêu, mơñam rơ-i čơngua, ngă yang ngui ngor kiăng hiam drơi jăn pran jua, hơmâo sang thun angin klă hơjan hiam, pơdai kơtor mơboh jor.

“Rim thun truh lơ 10 lĕ ngă yang ha wơ̆t. Ngă yang kiăng ană plơi hiam drơi jăn, bơwih ƀong đĭ kyar; hơmâo pơdai kơtor lu; rơmô kơbâo huăi hơmâo klin tul”.

Mơ̆ng hơdôm tơlơi gêh gal, hơmâo hơđăp, tơring glông Yên Châu hơmâo ngă Akŏ bruă pơđĭ kyar hơbô̆ bruă tuai čuă ngui amăng plơi pla ƀơi plơi Khá; bruă pơkra gơnam pioh kơ tuai čuă ngui amăng 5 thun, hăng mrô prăk năng ai 43 klai, pơƀut man pơkra bah amăng mut amăng plơi; anih čơkă tuai pơ graih rơdêh; anih pioh rơdêh hăng rơdêh pơkĕ apui lơtrik pơgiăng tuai hyu ngui đah mơ̆ng huăi ngă hơƀak ayuh hyiăng; hơdôm anih sĭ gơnam hăng anih ngui; čih pơkra hơdôm bruă či ngui; pơhrup hiam plơi pla, man pơkra sang juă glai...

Gah bơnah plơi Khá, pok pơhai Akŏ bruă hơmâo ruah 5 boh sang anŏ dưi pơkra jing homestay; 3 boh sang dưi pok ngă anih sĭ gơnam ƀong huă; 3 boh sang dưi mơñam mrai, sit thuăk khăn piêu, mơñam rơ-i bung bai bơwih brơi ƀing tuai nao ngui; lu sang anŏ amăng plơi Khá hơmâo pơtô bruă bơwih brơi ƀing tuai. Plơi ăt hơmâo akŏ pơdong 2 grup adoh suang, hơmâo pơtŏp na nao hăng nao adoh suang bơwih brơi ƀing tuai. Amai Vì Thị Thanh, dŏ amăng plơi Khá brơi thâo:“Sang anŏ kâo čih anăn bơwih ƀong bơwih kơ tuai čuă ngui. Tơdơi kơ čih anăn, sang anŏ gơmơi blơi buk, abăn khăn phrâo či čơkă tuai. Lơ̆m ƀing tuai rai ngui, gơmơi juăt pơkra añăm ƀong mơ̆ng djuai ania Thái, kah hăng añăm hla pơneh, añăm ƀon, rơbung hơtuk, mơnŏng mơnŭ, akan ŏm...kơ ƀing tuai”.

Ơi Quàng Văn Chiến, Kơ-iăng khua Jơnum min mơnuih ƀôn sang să Sặp Vạt ăt brơi thâo mơn:

“Tơring čar, tơring glông lăng ba hơmâo hơdră akŏ pơdong plơi Khá jing anih tuai čuă ngui amăng plơi pla, să gơmơi hok kơdok biă mă. Gơmơi hrŏm hăng tơring glông hăng anom bruă pơtô bruă sem lăng, man pơkra glăi jơlan mut amăng plơi pla, akŏ pơdong anom ngă ƀong hrŏm bơwih kơ tuai čuă ngui kiăng neh met wa gum ngă hăng thâo ngă bruă čơkă tuai nao ngui hiư̆m pă”.

Tui hăng ơi Lù Văn Cường, Khua Jơnum min mơnuih ƀôn sang tơring glông Yên Châu, kiăng akŏ pơdong plơi Khá jing plơi tuai čuă ngui nao hrŏm hăng man pơdong plơi pla phrâo, Jơnum min mơnuih ƀôn sang tơring glông Yên Châu git gai anom apăn bruă čih pơkra hăng pơtô hla tui hơnong pơkă kơ tơlơi hiam pơ anih tuai čuă ngui plơi Khá; pok anih pơtô, pơhrăm bruă, kiăng abih bang thâo hluh kơ tơlơi hơdip hiam thâo pơpŭ kơ tuai, thâo čơkă, thâo pơhiăp tom tuai ăt kah hăng bruă bơwih brơi tuai pơkŏn dong. Rơngiao kơ plơi tuai čuă ngui djuai ania Thái, tơring glông ăt prăp rơmet bruă djă pioh, pơtrut tui gru grua hiam mơ̆ng djuai ania Mông, Xinh Mun dong, đah mơ̆ng pơtrut tui gru grua hiam pơlir hăng tuai čuă ngui; mơ̆ng anun pơtrut bơwih ƀong huă - mơnuih mơnam đĭ kyar. Anai ăt jing tơlơi yôm amăng hơdôm tơlơi yôm mơ̆ tơring glông ba pơmut amăng Tơlơi pơtrun Jơnum khua mua Ping gah tơring glông tal 20, rơwang thun 2026-2030 pơ anăp anai./.