Rơkâo kơ ih brơi thâo hrơi čơkă thun phrâo mơ̆ng djuai ania Jarai hơmâo tơlơi phara hơget mơn pơhmu hăng hrơi Tê̆t ngă yang thun phrâo tui blan di?

Ơi Ksor Chuel: “Hrơi ngui ngor ngă yang mơ̆ng djuai ania Jarai pơ Ayunpa, ƀu djơ̆ hăng hrơi tê̆t blan di abih bang juăt ƀong ôh, hrơi ngui ngor juăt pơphun amăng blan 3 blan 4. Yua dah amăng mông anai, angin klă pơ-iă hiam mơ-ak biă či ngui ngor; bruă hmua ta pơdơi hĭ, djuai ania Jarai juăt pơphun huă pơthi. Tui hăng tơlơi phiăn mơ̆ng ơi yă ta đưm, lơ̆m ta ƀu hơmâo wai lăng dong tah pơsat anun ta khŏm huă lui yơh. Bơ tê̆t blan di djuai ania Jarai gơmơi hla tui yuan tơbuăn mơn, ăt ƀong tê̆t mơn, bơ hrơi ngui ngor ngă yang djuai ania Jarai lĕ blan 3 blan 4”.

Amăng tơlơi phiăn hăng gơnam tam đưm mơ̆ng djuai ania Jarai, tui hăng ih, tơlơi hơget ta kiăng ruah mah, djă pioh djơ̆ hăng tơlơi hơdip rơnuk anai?

Ơi Ksor Chuel: "Tơlơi phiăn, gru grua boh thâo hiam mơ̆ng djuai ania Jarai hơmâo lu lin yơh: kah hăng pĕ goong atông brô̆; mơñam eng ao hơmâo bơnga hiam, mơñam rơ-i mơñam bung bai rêu rô kiăo tui ơi yă amĭ ama ta pơtô glăi. Samơ̆, ngă tui rơnuk đưm lĕ ta ƀu kiăo hmao ôh tơlơi hơdip rơnuk anai. yua hnun, hơdră ngă bruă hơđăp ƀu kiăng ngă dong tah, ta kơnong kiăng ruah mă gru grua hiam bơwih brơi tơlơi hơdip ƀing ta rơnuk anai kah hăng goong brô, čing hơgor, ayun suang, atông đing t’rưng, uă kơni, hơdôm tơlơi anai ta kiăng djă lui hăng pơtrut hloh".

Ih dưi mơn lăi thim dong djŏp djuai goong brô̆ đưm mơ̆ng djuai ania Jarai, biă ñu hơdôm djuai goong brô̆ mơ̆ hlăk ai rơnuk anai ƀiă đôč mơnuih thâo? Laih anun ih kiăng Kơnuk kơna djru ba hiư̆m pă amăng bruă djă pioh, pơtrut tui gru grua anai?

Ơi Ksor Chuel: "Gru grua phiăn juăt mơ̆ng djuai ania Jarai đưm ƀu kơnong čing hơgor đôč ôh, ăt hơmâo lu djuai goong brô̆ phara mơ̆ hlăk ai rơnuk anai gơñu ƀu thâo ôh, kơnong thâo mă kơni, goong, đing t’rưng, đing pơng...Čing ñu hơmâo 3,4 djuai phara mơn: kah hăng čing Nhâm, čing pơtrum kơbao, čing Lao...tơlơi anai kiăng Kơnuk kơna lăp đing nao, djru kiăng hơmâo glăi dong, tui anun ƀing gơmơi hok mơ-ak biă mă”.

Bơni kơ ih hŏ! Pơpŭ kơ sang anŏ ta čơkă thun phrâo yâo mơ-ak, mă bruă truh kih, pran jua dŏ hor na nao hăng gru grua djuai ania ƀiă ƀing ta.