Tơdơi kơ 50 thun pơklaih rơngai lŏn ia, bruă pơčeh boh pia ƀơi Dak Lak hơmâo dong lu tơlơi čih pơplih phrâo klă hloh, lăng yôm pran khăp lŏn ia hăng kơdŏm glăi tơlơi hiam klă, tŏ tui gru grua yôm phara mơng djop djuai ania. Tơring čar hơmâo ĕp pơƀut hăng djă pioh glăi hơdôm rơtuh tơlơi akhan hri Êđê hăng M’nông, tơlơi akhan đưm hăng hơdôm rơbâo tơlơi phai yang amăng hơdôm tơlơi ngă yang mơng neh met wa. Jao hơdôm rơtuh ring čing hăng eng ao djuai ania; hơkrŭ glăi, pơphun lu hrơi ngui ngor gru grua, pơlir bruă djă pioh gru grua hăng pơđĭ kyar bơwih brơi tuai čuă ngui.

Tơlơi phara amăng rup rap gru grua mơng djop djuai ania hơmâo ngă kơ Dak Lak pơđĭ kyar djop mơta mơng bruă čih boh pia. Ơi Nguyễn Văn Cừ, Khua anom pơtô bruă Ping gah hăng pơtô ba mơnuih ƀôn sang Ping gah tơring glông Ea Sup brơi thâo, bruă djă pioh hăng tŏ tui hơdôm gru grua djuai ania kiăng pơđĭ kyar boh pia, kah hăng bruă pơlir pơđĭ kyar tuai čuă ngui hrŏm hăng bơwih ƀong huă.

“Mă gru grua ngă tơlơi bơwih ƀong huă hăng tŏ tui mă gru grua rông ba gru grua. Man pơkra anih tuai čuă ngui tơring glông Ea Sup, hyu čuă lăng dơnao Ea Sup hlao, tháp Giang Prong, nao čuă 5 boh plơi pla ƀơi tơring kual Ea Sup hăng ring čing atông brơi kơ tuai, gơnam ƀong, gru grua, tơlơi ngui ngor pơlir hơbit kiăng neh met wa pơđĭ kyar bơwih ƀong huă amăng sang anŏ, mơng anun pơjing rai bruă ngă tô nao rai, anun lĕ bơwih ƀong huă, gru grua, kơđi čar hăng mơnuih mơnam pơđĭ kyar hăng hơđong”.

Ơi Trần Doãn Tới, Kơ-iăng khua anom pơtô bruă Ping gah hăng pơtô ba mơnuih ƀôn sang Ping gah tơring čar Dak Lak brơi thâo, tŏ tui hơdôm tơlơi dưi, tơring čar tŏ tui pơjing hơdôm bruă jao, jơlan gah pơđĭ kyar čih boh pia amăng rơnuk phrâo.

“Anom pơtô bruă Ping gah hăng pơtô ba mơnuih ƀôn sang Ping gah tơring čar tŏ tui pơphô bruă brơi Ping gah tơring čar kiăng hơmâo tơlơi git gai hmao tlôn, mơng anun ngă klă ƀiă dong tơlơi pơtrun mrô 23 kơ bruă čih boh pia. Hăng lơm ƀing ta yak nao rơnuk hrưn đĭ mơng ta pô, pơmut hrŏm kual lŏn mơnai, him lăng amra hơmâo lu tơlơi pơplih phrâo djop mơta ƀiă dong kơ bruă čih boh pia hăng gru grua, pok pơhai hăng tŏ tui pran kơtang abih bang gru gra mơng kual čư̆ siăng hăng tơlơi mut hrŏm amăng bruă čih boh pia mơng kual Dơnung tong krah lơm ƀing ta pơmut hrŏm”.

Anăp nao rơnuk pơđĭ kyar phrâo, bruă mut hrŏm kơplah wah gru grua-boh pia hăng tơlơi bơwih ƀong huă, sit biă ñu lĕ tuai čuă ngui, amra pok rai hơdôm tơlơi dưi prong brơi Dak Lak pơđĭ kyar hơđong kjăp, djă pioh gru grua hăng pơtrut pran pơčeh phrâo. Mơng atur gru grua djop mơta hăng pran khăp kơ lŏn ia, bruă čih boh pia Dak Lak ră anai tŏ tui hrưn đĭ, pơgôp pơjing kual Dap kơdư hiam klă./.