Tui hăng Gong phun jua pơhiăp dêh čar Việt Nam hơmâo pôr, ring bruă pioh ngă anih ngui ngor mơ-ak hloh ƀơi Đà Lạt hơmâo Jơnum min mơnuih ƀôn sang tơring čar Lâm Đồng pơtrun hră pơ-ar tuh pơ alin amăng thun 2012, ƀơi mrô sang 23, jơlan Quang Trung, phường 9, plơi prong Đà Lạt. Samơ̆, truh rơnuč thun 2023, ring bruă anai man pơkra giong samơ̆ mă yua ƀu djơ̆ hăng tơlơi pơkă, anun lĕ yua ngă sang jưh tuai 4 asar pơtŭ, dưi pơhlôm brơi 50 anih dŏ.

Tơdơi kơ hơmâo tơlơi pơhing lăi nao, Jơnum min mơnuih ƀôn sang tơring čar  Lâm Đồng hơmâo hră pơtrun git gai hơdôm gơnong bruă, anom bruă bơdjơ̆ nao hăng Jơnum min mơnuih ƀôn sang plơi prong Đà Lạt pơphun pel ĕp bruă tuh pơ alin, bruă mă mơng ring bruă anai kiăng pơphô brơi hơdră pơsir hĭ. Tui yă Nguyễn Thị Bích Ngọc, Kơ-iăng Khua gơnong bruă gru grua, bơrơguăt drơi jăn hăng tuai čuă ngui tơring čar Lâm Đồng, truh ră anai, anom bruă hơmâo rơkâo Jơnum min mơnuih ƀôn sang plơi prong Đà Lạt git gai anom bruă bơdjơ̆ nao mă glăi hră pơ-ar mă bruă hăng ring bruă anai.