Anih čuă ngui Tháp Nhạn, tơring čar Dak Lăk giăm hrơi ngă yang Vía Bà hơmâo lu biă tuai nao ngui. Amai Tống Thị Hải Yến, tuai mơ̆ng Phú Thọ brơi thâo, ñu phrâo hyu ngui ataih rơbêh 180km mơ̆ng Buôn Ma Thuột anun jing glêh biă. Hơmâo đa amăng khul hyu ngui jing pơdơi laih kiăo tui tour yua ƀu anăm dong tah, ƀu ai ču nao hrŏm, đah mơ̆ng pơjưh hĭ bruă hyu čuă ngui mơguah kuar glai rưng tlam tek ia rơsĭ; mơguah mơñum kơphê Ban Mê, tlam nao lăng san hô Hòn Yến. Amai Yến lăi, nao rai ataih biă, jơlan ƀu hiam, anun yơh nao rai đĭ rơdêh ñu glêh, măt rơdêh biă yua jơlan plung kơdư, bơrơyuh biă, anun yơh rơngiă mông hyu ngui: “Anai jing tal blung a kâo rai pơ anai lăng hiam biă, ană mơnuih pơ anai thâo ƀu-eng, pơhiăp mơak biă, bơwih bơwăng hai klă mơn. Samơ̆ pơ anai aka ƀu hơmâo man pơkra, tuh pơ alin pơhrup hiam ôh, aka ƀu hơmâo ôh anŏ bơwih brơi ngă tuai hor či dŏ glăi sui. Tơdah đĭ kyar klă, pơ anai dŏ hơmâo lu đôč tơlơi gêh găl”.

Bruă tuai čuă ngui Dak Lăk aka ƀu pơƀut ngă hrŏm ôh, ăt jing tơlơi pơsit mơ̆ng lu anom bơwih ƀong čơkă tuai hyu ngui mơn. Jơlan nao rai ataih, gơnam bơwih brơi aka ƀu djơ̆ hăng anŏ kiăng anun jing ƀu ngă pơhưč tuai ôh. Mơ̆ng plơi prong Buôn Ma Thuột gah Yŭ truh pơ ia rơsĭ gah Ngŏ ataih rơbêh kơ 180km. Mơ̆ng Buôn Ma Thuột nao pơ hơdôm anih čuă ngui anet ƀiă, kah hăng Dơnao Lăk, Buôn Đôn ăt ataih truh 50km mơn. Amai Phạm Bích Hạnh, pô pơ ala sa kông ti čuă ngui ƀơi ƀôn prong Hồ Chí Minh brơi thâo: “Jơlan mơ̆ng anih anai nao pơ anih pơkŏn ataih đơi, tuai ñu glêh biă tơdah hyu ngui mơ̆ng Ngŏ nao pơ Yŭ Dak Lăk. Tơdah jơlan nao rai hiam, dưi nao rai tañ, jing tuai rai pơ anai amra lu mơn”.

Ơi Trần Hữu Phước, anom bruă ba tuai hyu ngui tour jar kmar Việt – Lao lăi, jơlan ataih, aka ƀu pơtruh nao rai ôh, anun yơh bruă hyu ngui tui tour mơ̆ng glai rưng truh pơ ia rơsĭ tơnap mơn: “Ră anai hơdôm glông jơlan pơtruh dap kơdư hăng hơdôm boh tơring čar ia rơsĭ Tong Krah dŏ sat đôč”.

Hrŏm hăng bruă jơlan nao rai, čơkă tuai hyu ngui ƀơi Dak Lăk ăt dŏ kơƀah anŏ dlăm. Tuai nao ngui pơ Dak Lăk, phin rup, giong anun đuăi hĭ tañ mơn. Hơdôm bruă gru grua ƀơi lu anih dŏ pơƀut lu kơ bruă pơƀuh pĕ atông, ayun suang đôč, aka ƀu thâo pơhiăp tom, ră ruai tom tuai, aka ƀu thâo bơwih brơi kiăng ƀing tuai ñu hor dŏ đih glăi, anun jing Dak Lăk jing anih “ataih lĕ hning – jê̆ lĕ ƀu hơmâo hơget lơi”. Ơi Dương Quốc Tuấn, pô ba tuai hyu ngui mơ̆ng Dap Kơdư nao pơ ia rơsĭ Tong Krah brơi thâo, anŏ lăng kơnar soh, pơ anai hnun mơn, pơ adih kar kăi mơn, anun yơh jing tơlơi tơdu mơ̆ng Dak Lăk: “Tơlơi bơwih ƀong mlăm lĕ dŏ aset mơn, ƀu hơmâo anih ngui ngor ôh, yua dah ƀing ta ƀu ngă bruă bơwih ƀong mlăm tui hăng Thái Lan ôh. Bơ anih anom pơ anai, arăng leng kơ lăi kar kăi soh, hnong hnăi soh, yua dah djŏp anih gơñu coppy nao rai đôč, aka ƀu hơmâo anŏ phara ôh”.

Tơdơi kơ pơmut hrŏm, Dak Lăk hơmâo ia rơsĭ laih, pok rai tơlơi čang rơmang đĭ kyar prong gah bruă čơkă tuai hyu ngui kuar glai rưng – mơnơi ia rơsĭ. Khă hnun, mrô prăk pơhrui ăt brơi ƀuh anŏ tơnap biă mă. Amăng hrơi pơdơi lơ 30/4 hăng lơ 1/5 phrâo rơgao, prăk mơ̆ng bruă čơkă tuai ƀơi Dak Lăk rơbêh 520 klai prăk, jing ha mơkrah pơhmu hăng Gia Lai đôč, sa amăng 3 črăn hăng Lâm Đồng đôč, laih anun 1 amăng 5 črăn Khánh Hòa đôč.

Anŏ tơdu mơ̆ng čơkă tuai Dak Lăk ăt pơƀuh ƀơi anih đih pơdơi, lơ̆m hơmâo 2 anih đôč klă hiam, hơmâo 5 asar pơtŭ; 4 asar pơtŭ hơmâo 4 anih, 9 anih hơmâo 3 asar pơtŭ. Hơdôm anih čuă ngui hmư̆ hing hloh mơ̆ng Dak Lăk kah hăng Bản Đôn, Dơnao Lăk, Sang gru đưm, Dơnao EaKao…pơgôp aset biă amăng rơnoh đĭ kyar hrŏm mơ̆ng tơring čar.

Tui hăng yă Nguyễn Thị Ngọc Anh, Khua khul đah kơmơi bơwih ƀong rơgơi Dak Lăk, hyu čuă lăng glai klô – plơi pla jing anŏ kơtang mơ̆ng tơring, samơ̆ anom bơwih ƀong kơnong tuh pơ alin aset đôč yua dah lŏn pioh ngă bruă čơkă tuai brơi apah mă pơmă đơi. Tơdah Dak Lăk ƀu pơklai ôh anŏ tơnap anai, bruă čơkă tuai hyu ngui amăng tơring čar tơnap biă či pơplih phrâo, huăi tơdu tui ră anai: “Hơmâo lu hơdră djru gah ayuh hyiăng, lŏn tơnah hăng hơdôm tơlơi pơkă bơdjơ̆ nao glăk pơgăn hĭ pran jua hor či tuh pơ alin mơ̆ng anom bơwih ƀong. Tơdah hơdră djru ƀu hruaih, jing tơnap biă mơ̆ng hơmâo bruă čơkă tuai hyu ngui prong, tui anun dưi đĭ kyar raih daih, anet đôč”./.