Anai lĕ tal blung a jơnum ngui dưi pơphun prong gưl tơring čar. Jơnum anai pơphun mơ̆ng lơ 15/8 truh lơ 2/9 ƀơi phường Ƀuôn Ma Thuôt, să Krông Pač, phường Tuy Hòa hăng hơdôm să pla boh sầu riêng amăng tơring čar Dak Lak. Jơnum ngui anai hơmâo 17 mơta bruă ngă amăng lu mơta tơlơi ngui ngor gru grua hiam mơak, sĭ mơdrô, tuai čuă ngui.

Tơlơi kiăng lăi nao lĕ jơlan hơdră pok pơhai jơnum ƀơi tơdrŏn lăk lơ 10/3 anih pơdă gơnam sĭ mơdrô lăi pơthâo djop mơta gơnam mơ̆ng boh sầu riêng hăng gơnam OCOP; jơnum ngui ngor mơak sem lăng mơnong ƀong huă, tuor ba hyu tuai čuă đang boh sầu riêng; jơnum pơčrong sai pơtruh nao rai bruă sĭ mơdrô, blơi boh sầu riêng. Biă mă ñu hơmâo 500 boh rơdêh mơkrah ngă anŏ pơgiăng gơnam lăi rơdêh bán tải amra rŭi mơ̆ng să Krông Pač glăi pơ anih phun phường Ƀuôn Ma Thuôt pioh pôr pơthâo rup rap anŏ hiam mơ̆ng boh sầu riêng, čih pioh anŏ phrâo hloh Guinness hăng bơwih brơi kơ tuai hyu ngui ĕp lăng ƀong boh sầu riêng. Hrŏm hăng anun, show ĕp lăng sang dlông gru đưm, pơdah hăng boh thâo ia rơgơi 3D mapping, amra pơdah amăng mlam mơmŏt hrơi rơma, hrơi năm hăng hrơi tơjuh rơwang hrơi kom amăng tal Jơnum ngui ƀơi đang kyâo djă pioh gơnam gru Dak Lak amăng mông pơphun jơnum ngui ngor anai.