Tơkeng rai hăng hơdip truh prong amăng gru grua čing hơgor, mơng dŏ anet ơi Đinh Hdot (dŏ amăng plơi Đak Pơkao, să Tơ Tung, tơring čar Gia Lai) hơmâo hmư̆ jua čing hơgor amăng hơdôm hrơi ngui ngă yang huă asơi hle, pơdô̆ rơkơi bơnai ƀudah hơdôm mơmŏt ngui ngor amăng sang rung. Hăng ñu pô, jua čing ƀu djơ̆ kơnong lĕ jua mơñi hmư̆ mơ-ak đôč ôh ăt lĕ boh pơhiăp mơng ơi yă, anai lĕ bơngăt jua mơng djuai ania Bahnar. Mơng pran hor dơlăm tui anun hơmâo pơtrut ñu ngă pô akŏ pơjing hơdôm grup čing hơgor hăng grup adôh suang djuai ania Bahnar amăng plơi pla kiăng pơtô brơi rơnuk hlăk ai čơđai. Tơhrơi ñu nao ngă hmua, truh mơmŏt ñu iâu pơtum pơƀut ƀing hlăk ai nao pơ sang rung kiăng pơtô atông čing hăng adôh tơlơi adôh đưm.

Hơdôm thun rơgao, hơdôm ring čing hơđăp hơmâo tul pơkra glăi, uă rơgoh; hơdôm tơlơi adôh him lăng wơr hĭ laih ră anai ăt dưi hmư̆ dik dak amăng hơdôm hrơi ngui ngor amăng plơi pla. Sit biă ñu, lu čơđai amăng plơi pla ƀơƀư̆ hor kơ gru grua djuai ania pô yơh tơdơi kơ mut hrŏm hơdôm grup adôh suang. Mơnuih kơhnâo kơhnăk Đinh Hdot brơi thâo: “Kâo lêng kơ pơmĭn tơdah ƀing tha rơma ƀu pơtô glăi, ƀing hlăk ai čơđai amra ƀơƀrư̆ wơr hĭ gru grua djuai ania pô. Jua čing hơgor, tơlơi adôh ƀu djơ̆ kơnong pioh ngui mơ-ak đôč ôh ăt lĕ anŏ pioh glăi, jing bơngăt kiăng ană tơčô tơdơi anai thâo gru grua djuai ania pô. Rĭm wŏt ƀuh ƀing čơđai atông čing ƀudah adôh tơlơi adôh đưm, kâo hok mơ-ak biă mă hăng ngă pơtrut pran jua kiăng tŏ tui bruă anai”.

Tơlơi bơră ruai glăi mơng mơnuih kơhnâo kơhnăk Đinh Hdot brơi ƀuh, pran khăp dơlăm amăng hơtai boh mơng ñu hăng gru grua djuai ania pô. Ƀu djơ̆ kơnong pơtô brơi tơlơi atông ngui, ñu ăt pơblang brơi ƀing čơđai thâo tơlơi yôm mơng rĭm tơlơi adôh, rĭm jua čing amăng tơlơi hơdip djuai ania Bahnar. Tui ñu pô, kiăng djă pioh gru grua, blung hlâo kiăng pơblang brơi rơnuk hlăk ai hluh hăng pơ-ư ang kơ gru grua djuai ania pô.

Ră anai, hơdôm grup atông čing hăng adôh tơlơi adôh đưm yua ơi Đinh Hdot akŏ pơjing juăt nao ngui hrŏm amăng hơdôm hrơi ngui ngă yang gru grua amăng ƀon lan, hăng mut hrŏm ngui pơbưp nao rai amăng tơring čar hăng tơring čar pơkŏn. Ayong Đinh Văn Anging, sa čô ding kơna amăng grup atông čing hăng adôh tơlơi adôh đưm brơi thâo: “Hlâo adih kâo hmư̆ ơi yă adôh tơlơi adôh đưm mơ̆ ƀu pơmĭn kâo amra dưi hyu ngui adôh suang hrŏm. Tơdơi kơ hơmâo wa Đinh Hdot črâo brơi, kâo thâo hluh lu ƀiă dong gru grua djuai ania Bahnar. Wa pơtô brơi kâo tong ten biă, mơng hơdôm tơlơi adôh truh pơ anŏ yôm mơng rĭm tơlơi adôh. Yua mut hrŏm grup adôh kâo huăi mlâo dong tah lơm dŏng ƀơi anăp lu mơnuih hăng jai hor boh pơhiăp, gru grua mơng djuai ania pô. Kâo čang rơmang tơdơi anai amra kiăo tui hrăm dong kiăng kơ pơtô glăi ƀing čơđai pơkŏn amăng plơi pla”.

Ƀu djơ̆ kơnong djru brơi ƀing hlăk ai hluh rơđah ƀiă dong kơ gru grua, hơdôm grup adôh suang ăt ba glăi anih ngui mơ-ak, pơlir ană plơi pla hăng pơsur pran pơ-ư ang djuai ania amăng rơnuk hlăk ai čơđai. Rĭm tlam mơmŏt tơdơi kơ sa hrơi mă bruă, jua čing amra hmư̆ tơ-ua amăng sang rung. Ƀing pơprong amra črâo brơi, ƀing hlăk ai čơđai đing nao hrăm tui, ba glăi anih jê̆ giăm hăng pơdah gru grua yôm phara. Ayong Đinh Plih, ding kơna amăng grup atông čing hăng adôh tơlơi adôh đưm amăng plơi Đak Pơkao brơi thâo: “Ơi Đinh Hdot lĕ mơnuih abih pran jua hăng gru grua djuai ania. Ñu pioh lu hrơi mông kiăng hyu pơtrut pơsur ƀing hlăk ai mut hrŏm grup atông čing, adôh tơlơi adôh đưm. Đa hrơi hơmâo aset mơnuih mut hrŏm samơ̆ ñu pô ăt ƀu lui ôh. Yua mơng pran gir run anun, ră anai amăng plơi pla hơmâo grup atông čing juăt hyu atông na nao, ƀing gơñu thâo atông čing lu ƀiă hăng adôh tơlơi adôh đưm lu mơn. Neh met wa amăng plơi pla pơpŭ biă mă yua ñu pô lêng kơ pơmĭn nao ană plơi pla hăng gru grua djuai ania Bahnar.”

Ơi Đinh Plơnh, tha plơi Đak Pơkao brơi thâo, mơnuih kơhnâo kơhnăk Đinh Hdot lĕ “mơnuih djă pioh” amăng plơi pla. Ƀu djơ̆ kơnong bruă tŏ tui ngui adôh suang, ñu ăt ĕp pơƀut glăi hăng pơtô glăi lu tơlơi adôh đưm mơng djuai ania Bahnar.

“Hơdôm tơlơi pơgôp mơng mơnuih kơhnâo kơhnăk Đinh Hdot yôm phăn biă mă amăng bruă djă pioh gru grua mơng djuai ania Bahnar. Bruă akŏ pơjing hăng tŏ tui hơdôm grup atông čing, grup adôh tơlơi adôh đưm djru brơi lu hlăk ai hluh ƀiă dong hăng jai hor kơ gru grua djuai ania pô. Anai lĕ bruă mă kiăng pơtrut pơsur hăng pok prong kiăng gru grua čing hơdor kual Dap kơdư tŏ tui djă pioh, lăi pơthâo amăng tơlơi hơdip phrâo ră anai”.

Amăng tơlơi hơdip glăk pơplih tui rĭm hrơi, ƀing mơnuih kar hăng Đinh Hdot dŏ amăng să Tơ Tung, tơring čar Gia Lai ăt kret kruai djă pioh jua čing hơdor, tơlơi adôh đưm kar hăng djă pioh bơngăt jua plơi pla. Bruă mă hăng pran khăp gru grua mơng ñu pô hơmâo pơgôp ha bơnah yôm phăn ngă kơ gru grua djuai ania Bahnar tŏ tui pơtô glăi hăng ngă lar hyu./.