Mơ̆ng mơguah, lơ̆m pơ-iă phrâo pơčrang trun ƀơi kơnua čư Đồng Bò, ơi Bùi Xuân Phước, 91 thun, tơgut pơbung rŏng laih, djom rơnang tŭi ñang ƀơi pra yang hơdor kơ Wa Hồ amăng sa boh pra yang anet. Asăp ñang ƀâo phuang amăng sang, gah rơngiao lĕ dơnao bơnga črih phrâo čuh bơnga, hla gru čar mriah pơtŭ kơñĭ por đơđet amăng angin.

Hăng ƀing tơhan, mơnuih ƀôn sang ƀơi phương Nam Nha Trang, anih hơdor kơ Khua mir sir Hồ Chí Minh mơ̆ ơi Bùi Xuân Phước pơkra pơjing, jing anih juăt nao laih. Ƀing ñu juăt nao kih rơmet, ayôl aka gru, dăp kơƀang grê. Jua kơnih arăng kih hla krô, jua arăng akă yôl đĭ hla gru por đơhet ƀơi tong krah lan sang, mut hrŏm anŏ ƀâo mơnâo mơ̆ng asăp trầm hương, anun yơh pơjing rai anih kơdrưh rah, jê̆ giăm rah.

Ơi Trần Minh Cường, tơhan mơnuih ƀôn sang phường Nam Nha Trang brơi thâo: “Tơhan mơnuih ƀôn sang trun djru ba Anih hơdor bơni kơ Wa, kih rơmet, dăp glăi kơƀang grê, akă yôl hla gru. Gơmơi ăt pơtô brơi rơdêh nao rai, pring rơdêh, pok jơlan brơi nao. Rim thun amăng hrơi ngă lơphet kah hăng lơ 3/2, 30/4 hăng 1/5; lơ 19/5; 27/7;2/9...hơdôm khul glăi pơ anai lu biă”.

Ơi Bùi Xuân Phước tơkeng thun 1935. Mơ̆ng anet ñu mut amăng khul čơđai hrăm ngă tơhan, giong anun ngă tơhan ƀô̆ đô̆i gum blah ƀơi tơdron blah Phú Yên. Tơdơi kơ Hră pơkôl Geneve thun 1954, ñu nao ngă tơhan pơ kual Kơdư, hơmâo pơtô hrăm gưl prong gah bruă wai lăng sang djă pioh gru đưm. Tơdơi kơ anun, ñu buh ao tơhan, nao ngă tơhan gum blah pơ čar Lao dong.

Glăi mơ̆ng ngă tơhan, ñu mă bruă ƀơi sang djă pioh gơnam gru đưm, laih anun dŏ pơmin na nao kơ bruă hơdor bơni kơ Wa Hồ. Ñu pioh 30 thun hơdip, blơi lŏn tơnah mơ̆ng ƀrư̆, mă prăk blan, prăk ñu pơkom, tap năng sĭ hlao sang amăng plơi prong đah mơ̆ng hơmâo prăk man pơdong anih hơdor kơ Wa. Mơ̆ng ha boh tơlŏ ƀrik, mơ̆ng sa pok rup trah, mơ̆ng ha tơlŏ boh pơtâo dăp gai rơñan đĭ nao pơ pra yang leng kơ hơmâo kru tơkai tơngan hăng pran jua mơ̆ng sa čô tơhan hơđăp. Truh ră anai, anih  hơdor hơ’ŭ prong rơbêh 2.000m2, hơmâo lu anih kah hăng Gong kut Khua mir sir Hồ Chí Minh, pra yang, sang jơnum, dơnao phun bơnga črih, phun pla đang bơnga hăng kơƀang dưm lu hră pơ-ar čih pơthâo tơlơi hơdip Wa Hồ. Rim wơ̆t ngă lơphet prong, lu khul grup khua mua, čơđai sang hră, tơhan hơđăp glăi pơ anai mơn, či tŭi ñang, bơbưp nao rai, jơnum hơdor bơni kơ Wa.

Ơi Đặng Đình Tuân, tơhan hơđăp ƀơi ƀut plơi Phước Thủy, phường Nam Nha Trang, pô juăt nao pơ pra yang mơ̆ng hrơi blung a phrâo pơdong mơtăm, brơi thâo, pơkra pơjing anih anai jing hơmâo mơ̆ng pran jua khăp ƀu-eng prong biă kơ Wa Hồ hăng pran jua kjăp khŏp, hui đôč mơ̆ng hơmâo mơ̆ng ơi Phước: “Wa Bùi Xuân Phước jing mơnuih ƀôn sang amăng kual Dơnung, hăng abih pran jua hăng Khua mir sir Hồ Chí Minh, hăng tơlơi rơgơi djă pioh, răk lui, sang djă pioh gơnam đưm, ñu nao mơ̆ng Kơdư truh pơ Dơnung hyu ĕp, man pơdong kual anai. Blung a tơnap biă, samơ̆ ƀing gơmơi bơni biă kơ wa Phước yua dah ñu thâo pơčeh phrâo, gir kơtir, triang biă mă. Hơmâo lu bruă ñu ngă mă hơjăn ñu đôč, hăng pran jua pơpŭ kơtang biă kơ Khua mir sir Hồ Chí Minh anun yơh man pơdong rai sa anih hơdor hơ’ŭ yom tui anai”.

Mah thun tha laih, pran hai tơdu mơn, ơi Bùi Xuân Phước ăt dŏ nao hrơi mlăm pơ pra yang. Sit tơngan ñu wai lăng đang kyâo, sut, uă pra yang, anih čuh ñang, dưm glăi rup, pơwih ming boh pơtâo čih tơlơi pơtô mơ̆ng Wa. Lu mơnuih rai pơ anai ăt dŏ ƀuh đôč tơhan hơđăp ƀuk kô̆ dŏ ƀơi dơnao bơnga črih, lăng đĭ rup trah Wa, lăi kiăng kiăo tui Wa na nao. Ñu ră ruai: “Kâo lăng mơak amăng pran jua yơh. Kâo 91 thun baih, dŏ hơdip hrơi ƀơi lĕ kâo djru ngă bruă hrơi anun, lơ̆m ta rơngiă jing mơak biă, djhôl pran jua kiăo tui Wa Hồ. Hră pơtă pơtăn lĕ kâo ƀu sĭ ôh anih anai, ƀu jao glăi kơ arăng, ƀu brơi kơ pô hlơi ôh, kiăng pioh glăi anŏ yom anai kơ djŏp rơnuk mơtăm”.

Ƀơi đang kyâo mơtah či kơnua čư̆ Đồng Bò, anih hơdor hơ’ŭ kơ Khua mir sir Hồ Chí Minh hăng tơhan đưm, kah hăng “anih djă pioh tơlơi lăp hơdor” mơ̆ng mơnuih ƀôn sang hăng Wa Hồ. Laih dong amăng rim tơlŏ ƀrik, rim jơlan mut nao, ăt dŏ kơđŏm gru tơlơi khăp kiăng mơ̆ng rơnuk abih tơlơi hơdip hrăm tui, hla tui tơlơi hơdip hiam, djai drơi pô mơ̆ng Khua git gai lŏn ia./.