Amăng anih ngui rơhuông rơhaih ƀơi tơdron lăk Đại Đoàn Kết, phương Pleiku, tơring čar Gia Lai, jua čing hơgor hmư̆ dik dak, pơhưč lu mơnuih ƀôn sang hrŏm hăng tuai čuă ngui apăn tơngan hrŏm ngui ayun suang jum dar. Anai lĕ črăn hơdră atông čing ngă yang trôm kơbao yua ƀing kơhnâo kơhnăk djuai ania Jarai rai mơng ƀuôn Mlăh, să Phú Túc, tơring čar Gia Lai pơphun. Hrŏm hăng hơdôm er čing hơđăp, ƀing kơhnâo hlăk ai atông hơdôm ring čing phrâo hăng jua dik dak phara, ba glăi mông ngui ngă yang mơ-ak mơ-ai, kơđŏm glăi akŏ hiam brơi kơ tuai čuă ngui lơm nao pơ Gia Lai. “Kâo čang rơmang jơlan hơdră tui anai amra tŏ tui pơphun, lơm kâo rai pơ Gia Lai amra dưi mut hrŏm jơlan hơdră anai”

Amon Ksor H’Huế lĕ ding kơna amăng grup atông čing čơđai rai mơng ƀuôn Mlăh, să Phú Túc brơi thâo: Rĭm wŏt buh eng ao Jarai, hrŏm hăng grup atông čing-ayun suang amăng plơi pla ngui pơƀuh brơi kơ tuai, ñu pơ-ư ang yua gru grua djuai ania Jarai ăt dŏ djă pioh hăng hơmâo lu mơnuih hor. “Kâo čang rơmang gru grua yôm phara mơng djuai ania pô amra tŏ tui lăi pơthâo brơi lu ƀiă dong kơ tuai čuă ngui mơng gah rơngiao kah hăng amăng dêh čar Việt Nam ta”.

Nao lăng jơlan hơdră “Ngui atông čing rơnuč rơwang hrơi tơjuh-Nao ngui hăng ĕp lăng” tal anai ƀơi Pleiku, ƀing mơnuih kơhnâo kơhnăk ƀuôn Mlăh, să Phú Túc ăt hơkrŭ “Ngă yang pơpŭ bơni”-gru grua hiam sui mơng đưm hlâo mơng djuai ania Jarai. Amăng jua čing hơgor hmư̆ tơ-ua ƀơi kual Dap kơdư, pơjâo pơphun ngă yang rơkâo hiam drơi jăn pran jua, pơdai jor kơtor mơboh, plơi pla hơđong, ană tơčô mô yâo thâo gum pơgôp hăng tơlơi hơdip trơi pơđao. Mơnuih pơphun ngă yang le tha plơi Rahlan Klil amăng ƀuôn Mlăh, să Phú Túc, tơring čar Gia Lai brơi thâo, tơlơi ngă yang anai yôm biă mă, pơdah pran pơpŭ bơni mơng ană mơnuih hăng lŏn mơnai, yang rơbang. “Hrơi anai ƀing gơmơi pơphun ngă yang, rơkâo yang rơbang pơgang brơi sang anŏ hơdip mơ-ak klă, suaih pral. Rơkâo brơi ơi yă, amĭ amai hơdip sui, kiăng ană tơčô dưi gơnang nao. Ƀing gơmơi pơyơr đĭ yang sa drơi un kơnô, tơjuh čeh tơpai, rơkâo yang tŭ mă, brơi tơlơi tơphă, rơnuk rơnua djop mơta. Rơkâo brơi pơdai jor kơtor mơboh, pơdai bă hơdjai, kơtor bă rêu rô, bơwih ƀong gêh gal, hơmâo huă hơmâo ƀong, hơmâo tơlơi hơdip trơi pơđao”.

Amai Kpă H’Nhung (djuai ania Jarai) lĕ sa čô mơnuih juăt ba hyu tuai čuă ngui ƀơi “Plơi čuă ngui Plei Chuet”, phương An Phú, tơring čar Gia lai brơi thâo, blan hlâo anun ƀing atông čing amăng plơi pla ăt hơmâo mut hrŏm jơlan hơdră “Ngui atông čing rơnuč rơwang hrơi tơjuh-Nao lăng hăng ĕp lăn”. Thun hrăm rơgao, plơi tuai čuă ngui Plei Chuet” hơmâo čơkă 8 boh sang hră čơđai anet, sang hră gưl I, gưl II hăng gưl III hrŏm hăng lu tuai čuă ngui amăng lŏn ia hăng tač rơngiao nao ĕp lăng. Ƀing čơđai hor đĭ gai sưng, tăp pơdai, mơñam rêu rô, mơñum abăn ao, laih dong dưi buh hơdôm blah eng ao Jarai kiăng kơ phĭn rup djă pioh. Amai Kpă H’Nhung brơi thâo: “Amăng sang anŏ, hơmâo ama, ƀing adơi amai lêng kơ ngă bruă bơwih brơi tuai čuă ngui amăng plơi pla, mut hrŏm hơdôm bruă ngui ngor hăng pran jua hur har mơ-ak, hor djă pioh gru grua pioh glăi mơng ơi yă. Grup čing hơdor Plei Chuet gơmơi, hơmâo djop rơnuk, hơmâo hlăk ai, hơmâo tơdăm ngek dra muai hăng ƀing kơhnâo hlăk ai, yua anun lơm nao ngui hrŏm ƀing gơñu lêng hur har hăng bruă ngui atông čing hăng ayun suang gru grua djuai ania Jarai gơmơi. Ƀing gơmơi mut hrŏm nao nguia atông čing, ayun suang ngă mơ-ak biă mă, ngă kơ lu tuai nao lăng. Tơlơi anai ngă mơ-ak tui, hăng dưi čơkă lu tuai nao čuă ngui amăng plơi pla”.

Ơi Bùi Trọng Hiền-mơnuih kơsem min tơlơi adôh suang đưm hăng gru grua Việt Nam (gah Sang hră pơtô tơlơi adôh suang dêh čar Việt Nam) hơmâo sui thun pơlir hăng bruă gru grua djop djuai ania ƀơi Gia Lai brơi thâo: “Ngui atông čing rơnuč rơwang hrơi tơjuh lĕ anih ngui phrâo, ngă gêh gal brơi hơdôm ring čing sô hơđăp dưi atông hmư̆ tơ-ua amăng kual Dap kơdư. Tui kâo pô, ƀing ta kiăng djă pioh čing hơgor, kiăng hơmâo grup atông čing hăng hơdôm ring čing hơđăp kiăng dưn atông na nao. Kâo ƀuh hơbô̆ bruă tuai čuă ngui amăng plơi pla ba čing jing gơnam bơwih brơi, anai bruă ƀing ta kiăng ngă tui”.

Tong krah Pleiku, Gia Lai, jua čing hmư̆ tơ-ua, tơlơi ayun suang ngă lu mơnuih hor hrŏm hăng gru grua yôm phara mơng djuai ania Jarai hơmâo pioh glăi tơlơi mơ-ak amăng pran jua kơ tuai čuă ngui. Ƀu djơ̆ kơnong lĕ sa jơlan hơdră ĕp lăng, “Ngui atông čing rơnuč rơwang hrơi tơjuh-Nao ngui hăng ĕp lăng” ăt pơgôp ngă bơngač anih djă pioh gru grua čing hơgor ƀơi kual Dap kơdư./.