Ƀơi bul pơtâo Lý Sơn, hơdôm hrơi ngui ngă yang rơgao, mơnuih luh nao čuă ngui ƀơi bul pơtâo lu biă mă. Ƀu djơ̆ kơnong pơhưč yua anŏ hiam jum dar, Lý Sơn ăt ba tuai čuă ngui nao ĕp lăng gru grua yôm phara dong.

Amăng hrơi ngui pơdơi anai, tơlơi ngă yang pioh hơdor kơ tơhan Hoàng Sa hơmâo pơphun yôm phăn, pơhưč tơlơi đing nao mơng lu tuai čuă ngui, pơgôp ngă pơƀuh glăi hăng pơpŭ gru grua hing ang, ngă pô ƀơi bul pơtâo. Tơdơi anun, pơphun ngui pơkiăo song nan pơphun dik dak amăng ia rơsĭ, pơhưč lu mơnuih ƀôn sang hăng tuai nao lăng, ba glăi hrơi mông ngui mơ-ak biă mă.

Lơm nao čuă ngui pơ bul pơtâo, čư̆ Thới Lới, kual bul pơtâo Lý Sơn ăt lĕ anih kiăng nao ĕp lăng. Mơng kơčong čư̆, dưi lăng hyu jum dar bă mơta ia rơsĭ, amra ƀuh hơdôm anŏ hiam ƀơi bul pơtâo anai. Ayong Nguyễn Đức Tiến, rai mơng tơring čar Hưng Yên brơi thâo:

“Rai pơ anai kâo ƀuh bul pơtâo hiam biă mă, ia rơsĭ mơtah; ayuh hyiăng rơ-ơ̆ biă. Tơdah hơmâo wăn, ƀing hlăk ai kiăng rai ngui pơ Lý Sơn ha wŏt”.

Ƀu djơ̆ kơnong hơmâo bul pơtâo plao ia rơsĭ, hơdôm anih čuă ngui amăng đang glai, ĕp lăng gru grua amăng tơring čar Quảng Ngãi ăt pơhưč lu tuai čuă ngui. Ayuh hyiăng bơyan anai pơ-iă hiam, rơ-ơ̆ mơ-ak ngă gêh gal kiăng kơ tuai dưi nao ngui pơdơi pran, hyu ngui ƀơi čuah hang ia rơsĭ, lăng drai ia, ia krông čroh hnoh. Tui hăng bruă tuai čuă ngui thun anai brơi ƀuh, tuai đing nao ruah hơdôm anih rơ-ơ̆, hơmâo lu gru grua yôm phara, pơlir hăng ĕp lăng hăng pơdơi pran.

Ƀơi să Măng Đen (tơring glông Kon Plông, tơring čar Kon Tum hơđăp), hrơi ngui dik dak hơmâo pơphun hăng lu tơlơi ngui gru grua-tuai čuă ngui hơmâo pơphun klă. Yôm hloh lĕ ngui rôk ngui ayun suang rô tui jơlan mrô 24. Hơdôm jua čing hơgor, tơlơi ayun suang pơmut hrŏm hơdôm tơlơi ngui đĭ gai sưng, klŭm miu ba glăi hrơi mông ngui mơ-ak mơ-ai, pơhưč lu tuai. Hơdôm jơlan hơdră pơbưp nao ƀing adôh suang hăng tuai čuă ngui ăt pơgôp ngă jê̆ giăm, ngă lar hyu pran jua mơ-ak.

Lơm yang hrơi trun ƀơi tơkai čư̆, jơnum sang sĭ gơnam đang hmua hăng kyâo jrao Măng Đen jing anih ƀu kơƀah ôh. Anih jơnum sang čơ dik dak hăng bhêm apui kơđen, lu gơnam ƀong jơman mơng kual čư̆ siăng. Tuai čuă ngui dưi hyu ĕp lăng hơdôm anih sĭ gơnam, ƀong hơdôm gơnam ƀong djuai ania, pel ĕp hơdôm gơnam yôm ƀơi ƀon lan hăng amra ƀuh tơlơi hok mơ-ak, rơhmač mơng mơnuih ƀôn sang ƀơi anai. Amai Đặng Phương Lan, mơng ƀôn prong Đà Nẵng hơmâo lu wŏt nao pơ Măng Đen čuă ngui, ñu brơi thâo:

“Rĭm wŏt nao pơ Măng Đen, amăng rĭm mơmŏt ƀing gơmơi lêng kơ weh nao pơ sang čơ. Ƀơi anai ƀu djơ̆ kơnong dik dak mơ-ak đôč ôh mơ̆ ăt pơdah djop gru grua yôm phara hăng pơhưč lu mơnuih”.

Sa tơlơi ĕp lăng phrâo glăk hơmâo lu tuai čuă ngui hor anun lĕ mơñum kơphê kual rơ-ơ̆ ƀơi Măng Đen. Amăng kual glai hngo rơ-ơ̆, tuai čuă ngui dưi mơñum kơphê hăng dưi mut hrŏm tuk pơkra kơphê, pel ĕp mơng bruă uă pơkra truh pơ rĭm tơdjoh kơphê ƀâo hiam. Rĭm kơčok kơphê ƀu djơ̆ kơnong ia ƀâo mơnâo jơman phara đôč ôh mơ̆ ăt djă pioh hơdôm tơlơi bơră ruai lăi nao kual lŏn hăng ană mơnuih ƀơi anai.

Yă Vũ Thị Hồng Phương, Khua anom bruă djru bơwih bơwang djop gơnam ƀơi să Măng Đen, tơring čar Quảng Ngãi brơi thâo, bruă ĕp lăng kơphê kual rơ-ơ̆ kiăng hrưn đĭ nua yôm mơng gơnam đang hmua hăng lăi pơthâo anăn păn sĭ mơdrô ƀơi ƀon lan. Mơng hơdôm kơčok kơphê tuk pơkra mă, sa glông rơnoh yôm glăk ƀơƀrư̆ pơjing rai, mơng pơlir ngă hmua, pơkra truh pơ tuai čuă ngui, pơgôp pơtrut pơđĭ kyar bơwih ƀong huă amăng ƀon lan. Yă Vũ Thị Hồng Phương brơi thâo dong:

“Hluai tui hơdôm tơlơi anai, să Măng Đen čang rơmang pơlir nao rai hơdôm anăn păn sĭ mơdrô kơphê kual rơ-ơ̆. Mơng anun, ba glăi anih ĕp lăng brơi kơ tuai, hơmâo lu dong gơnam bơwih brơi tuai čuă ngui lơm nao pơ Măng Đen, pơgôp lăi pơthâo hơdôm gơnam bơwih brơi tuai čuă ngui amăng ƀon lan”.

(nhạc nền nhẹ nhàng)

Hrŏm hăng hơdôm tơlơi ngui, ĕp lăng hơdôm bruă tui gru grua-tuai čuă ngui tui sô hơđăp ăt hơmâo pơphun dik dak kar hăng pơkiăo song nan, adôh bài chòi, ngui tơnă hơbai, ngui rôk jơlan, pơgôp hơmâo djop gơnam brơi tuai čuă ngui lơm nao pơ Quảng Ngãi. Yua hơmâo lu gơnam bơwih brơi tuai glăk ngă pơhưč lu mơnuih nao pơ kual lŏn Quảng Ngãi./.