Aka ƀu abih 2 hrơi amăng hrơi ngă yang Vía Bà thun anai, hơmâo laih 40 khul hăng rơbêh 2.000 čô nao ngă yang ƀơi Anih gru đưm man pơdong yom phara Dêh čar ta Tháp Nhạn, phường Tuy Hoà, tơring čar Dak Lăk. Hơdôm khul leng kơ prăp lui tong ten, mơ̆ng gơnam pơyơr đĭ Amĭ Mơyang, eng ao nao ngă yang hăng tơlơi suang či pơpŭ kơ Ñu măng hrơi Ngă yang Amĭ ƀă yă pơjing, hăng pran jua lăp hơdor, pơpŭ laih anun djă ba tơlơi kiăng khăp hiam hloh. Mơnuih nao ngă yang pơmin tui anai: "Rơkâo lăng ba ană plơi rơnuk rơnua ană plơi yâo mơak, rơkâo brơi tơring čar Dak Lăk tơphă tơphai, nao truh glăi truh, truh rơnuk truh rơnua”.

Amăng tơlơi pơmin mơnuih ƀôn sang tơring čar Dơnung Ting Krah, Amĭ Mơyang jing yang lăng ba ană plơi rơnuk rơnua, hơdip trơi pơđao, yâo mơak. Yua hnun, ngă yang Amĭ Vía Bà mut tơma amăng tơlơi hơdip mơda, jing sa tơlơi phiăn ngă yang pơpŭ kơ amĭ mơ̆ng mơnuih ƀôn sang Dơnung Tong Krah. Kơ tơlơi phiăn, hơmâo anŏ mut hrŏm, pơtruh nao rai tơlơi ngă yang pơpŭ kơ H’Bia Mơyang mơ̆ng djuai ania Chăm hăng tơlơi phiăn ngă yang pơpŭ Amĭ mơ̆ng djuai ania Việt.

Amăng tơlơi ngă yang Vía Bà hơmâo 2 tal, sa lĕ pơyơr gơnam kơ yang laih anun suang ngă yang arăng iâu múa bóng, kiăng yă Thiên Y Ana mơak, hơmâo pran, laih anun pơsit brơi pran jua pơpŭ kơ yang tơpă sit biă. Yă Thông Thị Thêu, djuai ania Chăm mơ̆ng Bắc Bình, Lâm Đồng lăi: “Tơlơi ngă yang yom biă mă. Rim thun truh blan anai lĕ kâo tlao hok či nao. Nao pơpŭ kơ Yă kơ Amĭ, rơkâo kiăng hiam drơi jăn pran jua, sang anŏ bơwih ƀong hơmâo, đĭ gŏ amô̆. Ta ƀu nao lĕ ƀu hơ’et amăng tơngia pran ôh, anun yơh rim thun leng kơ nao soh”.

Kiăng tơlơi ngă yang Vía Bà thun anai rơnuk rơnua, prăp rơmet djŏp, Khul wai lăng anih gru đưm tơring čar Dak Lăk hơmâo pơdong anih bơwih brơi hơdôm khul mơ̆ng ƀlang ket mut nao truh anih gru đưm; prăp rơmet anih či pioh gơnam pơyơr, eng ao abăn khăn; anih mơñum ƀong, pơhlom prăp lui hơdôm khul nao ngă yang mơak hloh ƀơi pra yang Tháp Nhạn. Rơngiao kơ mơnuih nao pơyơr gơnam, hơdôm rơbâo čô mơnuih ƀôn sang hăng ƀing tuai ăt nao lăng, pel ĕp gru grua hiam anai. Ơi Phạm Phú Thái, tuai mơ̆ng Đà Nẵng lăi: “Blung a kâo rai ngui pơ Phú Yên jing ƀuh arăng ngă yang pơpŭ kơ amĭ ƀă yă pơjing. Anun jing gru grua hiam gah bơngăt jua klă hiam biă, pơƀuh gru hiam mơ̆ng djuai ania Việt ta”.

Tui hăng mơnuih kơhnâo kơsem min gru grua đưm Nguyễn Danh Hạnh, bruă ngă yang pơpŭ kơ Amĭ mơyang hơmâo UNESCO tŭ yap jing gru grua bơngăt jua mơ̆ng ană mơnuih ta. Ngă yang Vía Bà mut hrŏm hăng tơlơi pơpŭ kơ Amĭ mơyang hơmâo pơphun ƀơi anih man pơdong hiam phara Tháp Nhạn či pơpŭ kơ anŏ yom mơ̆ng pra yang anai: “Ngă yang Vía Bà jing tŏ tui glông gru grua đưm, jing phun tơhnal yom biă mă kiăng ƀing ta sem lăng anŏ pơtruh nao rai mut hrŏm mơ̆ng lu gru grua, plah wah mơnuih ƀôn sang amăng gru phun dêh čar ta. Bruă pơphun ngă na nao ƀu kơnong ngă brơi anih gru đưm hmư̆ hing, yom hloh, gru đưm jing anih mơyang, brơi anih gru đưm hơdip na nao amăng plơi pla. Laih anun anih gru đưm hơmâo ngă jing anih mơyang, jing lu mơnuih lăp đing nao. Anun lĕ tơlơi akŏ phun či djă pioh hăng pơtrut tui anŏ yom mơ̆ng gru đưm, bơwih brơi bruă čơkă tuai hyu ngui đĭ kyar”.

Găn rơgao hơdôm rơbâo thun, ngă yang Vía Bà jing tơlơi yom biă mă amăng tơlơi hơdip mơnuih ƀôn sang laih anun jing gru grua bơngăt jua hơmâo djă pioh, pơpŭ. Ngă yang Vía Bà hơmâo djă pioh mơ̆ng rơnuk anai truh rơnuk adih, brơi buh anŏ pơtruh hrŏm, tŏ tui hơđong kjăp, ngă brơi tơlơi hơdip mơda gru grua pran jua mơnuih ƀôn sang mơak hloh./.