Hăng anăn “Pơlir ană plơi pla-Lar hyu gru grua yôm phara”, anai lĕ hrơi ngui blung a hơmâo pơphun tơdơi kơ să Phú Túc akŏ pơjing, kiăng pơgôp djă pioh, lăi pơthâo gru grua djop djuai ania pơlir hăng bruă lăi pơthâo gơnam đang hmua, gơnam OCOP amăng să. Hrơi ngui hơmâo tơlơi mut hrŏm mơng 14 grup rai mơng hơdôm boh plơi pla amăng să, hrŏm hăng 3 grup nao ngui hrŏm mơng hơdôm boh să Ia Rsai, Ia Dreh hăng Uar.

Anai lĕ sa amăng hơdôm grup hơmâo mơnuih nao ngui hrŏm lu hloh, ƀuôn Chư Ung hơmâo pơkiăo nao rơbêh 60 čô mơnuih kơhnâo, ƀing pơplông bơrơguăt drơi jăn hăng ƀing ding kơna pơkŏn hơmâo gir run prap lui hrơi ngui anai. Tơlơi kơđŏm glăi mơng grup amăng hrơi ngui anai lĕ bruă hơkrŭ glăi ngă yang mơñum tơpai 3-sa amăng hơdôm tơlơi ngă yang gru grua mơng djuai ania Jarai. Ơi Nay Noar-Mơnuih kơhnâo amăng ƀuôn Chư Ung brơi thâo: “Ƀuôn gơmơi mut hrŏm hrơi ngui gru grua djuai anai hăng bruă pơdong sang pioh hơkrŭ glăi ngă yang mơñum tơpai 3, pơphun glăi kiăng ană tơčô mô yâo tơdơi anai thâo tơlơi ngă yang mơñum tơpai 3 mơng djuai ania Jarai hiưm pă ñu. Anun ƀuôn gơmơi ba rai ngui tơlơi ngă yang mơñum tơpai 3”.

Hrơi ngui dik dak mơ-ak djop mơta amăng hrơi ngui gru grua-bơrơguăt drơi jăn djop djuai ania ƀiă să Phú Túc ƀu djơ̆ kơnong pơtum pơƀut ƀơi đang bơnga Phú Túc đôč ôh ăt ƀuh dik dak mơ-ak rôk jơlan glông. Hơdôm tơlơi ngui rôk jơlan, ngui atông čing hơgor, ayun suang hơmâo ba glăi hrơi mông ok or mơ-ak. Hơdôm tơlơi pơplông bơrơguăt drơi jăn anun lĕ ngui tăp pơdai dua čô, hơdui hrĕ, kơdăt asăk, đĭ gai sưng hrŏm hăng mông ngui buh eng ao hiam pơhưč lu mơnuih ƀôn sang hăng tuai rơnguai nao lăng. Rup rap hiam hloh lĕ mông ngui buh eng ao djuai ania, pơgôp pơpŭ tơlơi yôm mơng eng ao hăng lăi pơthâo gru grua mơng mơnuih djuai ania Jarai. Amai Nay H’Dơ rai mơng plơi Lâm Viên brơi thâo: “Grup ngui buh eng ao hiam ƀing gơmơi hơmâo 7 čô. Hơdôm dua čô đah rơkơi đah kơmơi buh eng ao djuai ania tui sô hơđăp. Bơ dua čô đah kơmơi pơkŏn amra buh eng ao čoh phrâo tui ră anai. Mơng anun kiăng pơƀuh brơi abih bang, mah tơlơi hơdip đưm hlâo ƀudah tŭ tă ră anai, eng ao mah čoh pơplih phrâo, samơ̆ ăt dŏ djă pioh anŏ hiam mơng djuai ania gơmơi”.

Hrŏm hăng hơdôm bruă tui gru grua-bơrơguăt drơi jăn, jơnum sang čơ sĭ gơnam OCOP să Phú Túc hơmâo 24 anih pơdă gơnam mơng 14 grup rai mơng hơdôm boh plơi pla, pơdă lu gơnam yôm phara anun lĕ mơnong rơmô krô, mơnong mơnŭ om, asơi brong, weč, tơpai čeh, añăm pla plum, añăm trong hơbai hrŏm klĭ rơmô, akan om…pơhưč lu tuai rơnguai hăng mơnuih ƀôn sang nao lăng, blơi ƀong.

Ơi Ngô Đức Mạo-Khua anom bruă gru grua, pôr pơhing hăng bơrơguăt drơi jăn să Phú Túc, tơring čar Gia Lai pơsit tong Hrơi ngui gru grua-bơrơguăt drơi jăn djop djuai ania hăng jơnum ngui sang čơ sĭ gơnam đang hmua, lăi pơthâo gơnam OCOP să Phú Túc tal I thun 2026 ba glăi lu bruă tui gru grua yôm phara. Amăng hrơi ngui gru grua, ƀing kơhnâo pơƀuh glăi tơlơi hơdip amăng plơi pla, ngui atông čing, mơñam rêu rô, tăp pơdai, mơñam abăn ao, trah rup hăng pơdă gơnam ngă hmua, gông brô̆ djuai ania. Mơng anun, pơgôp djă pioh, lăi pơthâo gru grua djop djuai ania, lăi pơthâo rup rap kual lŏn, ană mơnuih hăng hơdôm gơnam yôm amăng să Phú Túc, Gia Lai. “Mơng hrơi pok pơhai hơbô̆ bruă gong gai ƀon lan dua gưl truh ră anai, bruă mă tui gru grua, bơrơguăt drơi jăn ƀơi ƀon lan glăk hơdư̆ glăi. Yua anun, thun anai ƀing gơmơi pơphô bruă brơi Jơnum min mơnuih ƀon sang să pơphun hrơi ngui gru grua-bơrơguăt drơi jăn djop djuai ania kiăng djă pioh, tŏ tui gru grua djuai ania Jarai amăng ƀon lan. Mah prăk yua dŏ kơƀah, bruă pơphun gưl ƀon lan đôč, samơ̆ truh ră anai djop plơi pla lêng kơ hur har pran jua mut hrŏm, gir pơtop hrăm, prap lui djop gơnam yua. Hrơi ngui anai kơđŏm glăi lu tơlơi, jing atur phun pơgôp djă pioh, tŏ tui gru grua djuai ania Jarai”.

Hrơi ngui gru grua-bơrơguăt drơi jăn djop djuai ania ƀiă hăng jơnum sang čơ sĭ gơnam đang hmua, lăi pơthâo gơnam OCOP să Phú Túc tal I thun 2026 hơmâo pơgôp ngă hiam tui tơlơi hơdip mơnuih djuai ania ƀiă. Pơlir kơplah wah bruă djă pioh gru grua hăng lăi pơthâo gơnam đang hmua, gơnam yôm, tơlơi anai pơgôp ngă kjăp tui pran gum pơgôp djop djuai ania, laih dong ngă pơtrut pơđĭ kyar tuai čuă ngui hơđong kjăp brơi ƀon lan./.