Hăng mơnuih djuai ania Jarai, Rơ Châm Blinh, dŏ pơ să Ia Phí, tơring čar Gia Lai, bruă pơčeh phrâo amăng plang mơnuih mơnam jing bruă ñu juăt ngă rim hrơi yơh. Ñu hrăm gah bruă kač rup, samơ̆ ñu hơmâo arăng hmư̆ hing amăng bruă adoh suang, pơčeh tơlơi adoh Jarai - Yuan hăng yŭ er tơlơi adoh Dap Kơdư, hmư̆ hing biă amăng plang internet. Ñu hơmâo đok adoh tai phara biă, kơnuih ñu adoh djơ̆ hăng ană ƀơi ƀơi Dap Kơdư mơtăm, hơdôm video “klăk mơnuih lăng”, arăng juăt pia triệu view mơ̆ng Blinh glăk ba pơdah ƀơi arăng hmư̆ lu tơlơi hiam phrâo. Mơ̆ng tơlơi adoh, ñu kiăng djă pioh, pơtrut tui gru grua hiam mơ̆ng djuai ania ñu. Mut hrŏm hăng thun čơkă thun hyu ngui dêh čar Gia Lai 2026, ñu hơmâo mă pri Sa video čơkă tuai Gia Lai 2026 hăng anăn “Rim čô mơnuih Gia Lai jing sa čô mơnuih pơ ala brơi pơƀuh hyu bruă čơkă tuai”. Ƀơi mông Jơnum KOL tơring čar Gia Lai 2026, pơphun kơnôl 11/9, Rơ Châm Blinh lăi: “Kâo pơ-ư pơ-ang biă mă lơ̆m hơmâo Kông an tơring Gia Lai jak iâu Jơnum KOL Gia Lai thun 2026. Pơ anai, kâo hơmâo bưp, hiăp tom lu ayong amai adơi ngă bruă pơčeh phrâo amăng plang mơnuih mơnam mơ̆ng Quy Nhơn wơ̆t hăng hơdôm boh tơring pơkŏn. Anai jing hrơi mông kiăng khul pơčeh phrâo ƀing gơmơi hrăm nao rai, pơtruh, pơƀuh hyu rup hiam mơ̆ng plơi pla. Pô kâo čang rơmang ƀing thâo pơčeh phrâo tơlơi ba pơdah amăng plang mơnuih mơnam amra gir pơƀuh lu hloh dong gru hiam, tơlơi phiăn plơi pla hăng tơlơi ngui ngor, ngă yang hiam mơ̆ng kual lŏn anai”.

Ăt hăng video ba pơdah đĭ mơn, Rahlan H’Wĩ, plơi Kte prong A, să Phú Thiện, tơring čar Gia Lai, glăk bang hyu gru grua djuai ania Jarai amăng plang internet mơn. Hrăm giong Sang hră gưl prong Bơkjăp drơi jăn Đà Nẵng, H’Wĩ hor sĭ mơdrô gơnam online ƀơi Tiktok hăng Facebook. Hơdôm video gru grua tơlơi hơdip mơda ană plơi pla hơmâo ñu pơdar mă amăng plơi ñu wơ̆t hăng amăng sang anŏ, pơhưč hơdôm klăk wơ̆t arăng lăng. Mơ̆ng ngă yang phrâo kông, ƀhet amăng tơngia, krok bơngăt truh kơ añăm juăt ƀong kah hăng hla plum hna, akan kŏp, trong ñeč..., H’Wĩ ba gru grua hiam djuai ania Jarai pơdah brơi arăng lăng hăng rup sit biă. Phrâo anai, video čih pioh bruă amĭ ñu tơkŏng tơpai Jarai hơmâo lu mơnuih mut lăng. Hăng H’Wĩ, pơčeh tơlơi rơgơi pơdah amăng plang internet ƀu kơnong bruă bơwih ƀong, ĕp prăk đôč ôh, ăt jing bruă pơƀuh hyu gru grua hiam amăng plơi pla: “Kâo ba pơdah rup video amăng Tiktok, juăt pơƀuh glăi bruă bơwih ƀong, ĕp prăk či man pơdong sang brơi kơ amĭ ama kâo. Hơdôm tơlơi anun jing hơmâo lu mơnuih hor lăng, arăng bơni, pơtrut pơsur kâo ngă. Hơmâo nao jơnum KOL tơring čar Gia Lai jing tơlơi hok mơak biă, ăt jing bruă pơtrut pran jua prong biă. Amăng hrơi blan pơčeh phrâo tơlơi pơdah đĭ amăng plang mơnuih mơnam, kâo bơni biă kơ ayong amai adơi kiăng khăp, hor lăng hơdôm bruă kâo ngă. Sit hơmâo mơnuih lăng mơn mơ̆ng hơmâo kâo hrơi anai. Mơ̆ng mông jơnum anai, kâo ăt kiăng pơgôp pran jua či ba pơƀuh, bang hyu rup hiam mơ̆ng plơi pla gơmơi”.

Ƀu kơnong ƀing hlăk ai ba pơdah gru grua, tơlơi hơdip mơda đôč ôh, tơhan kông an ăt glăk mă yua plang internet či ba pơdah rup, djŏp tơlơi hơdip mơda jê̆ giăm hăng mơnuih ƀôn sang. Thiếu tá Lại Văn Đạt, mơnuih amăng Grup rơnuk rơnua, Kông an să Phú Thiện, jing sa amăng hơdôm KOL tơring čar Gia Lai hơmâo lu mơnuih thâo, hmư̆ hing hăng hơbô̆ bruă “Kông an glăi pơ plơi”. Amăng mông ngă bruă, ñu nao bưp neh met wa, ñu hrăm tơlơi Jarai či pơtô, pơblang glăi hăng tơlơi Jarai; laih dong jak iâu mơnuih ƀôn sang djru blơi 500 blah kơdung hră kơ ƀing čơđai sang hră tơnap tap amăng thun hrăm phrâo. Hơdôm tơlơi anun hơmâo Thiếu tá Lại Văn Đạt čih pioh, pơdah đĭ amăng plang mơnuih mơnam ngui, hơmâo hơdôm pluh rơbâo čô mơnuih lăng. Tui hăng ñu, bruă hrăm tơlơi Jarai, thâo hluh gru grua neh met wa jing djru bruă pôr pơthâo, iâu pơthưr ană plơi amuñ hloh, klă hloh: “Kâo hrăm mă pô hăng thâo mơn pơhiăp tơlơi Jarai, anun jing nao mă bruă kâo lăng amuñ, jê̆ giăm biă hăng ană plơi, thâo hluh ană plơi ñu kiăng anŏ hơget. Mơ̆ng anun, gơmơi hơmâo hơdră ngă bruă, pôr pơthâo iâu pơthưr neh met wa djơ̆ lăp hăng tơlơi glăk kiăng, anun hơmâo mơnuih ƀôn sang mơak biă, tŭ ư hăng bruă gơmơi pơtô pơblang jăng tơlơi Jarai ăt kah hăng djru ba mơnuih ƀôn sang”.

Mông jơnum KOL tơring čar Gia Lai thun 2026, hăng anăn “Dap Kơdư mut hrŏm ia rơsĭ mơtah - Bang hyu pran jua mă yua boh thâo mrô”, hơmâo pơphun amăng Thun čơkă tuai hyu ngui dêh čar 2026, kiăng pơtruh mơnuih mơnam, plơi pla, pơthâo nao rai tơlơi rơgơi, hăng pơƀuh hyu gru grua, čơkă tuai, ană mơnuih Gia Lai. Anun jing hrơi pơbưp mơ̆ng mơnuih hơmâo tơlơi pơmin dlăm, hơdôm tơlơi ră ruai hăng ană mơnuih glăk rim hrơi mơneč mă anŏ arăng hmư̆ hing mơ̆ng ƀing ñu či pơƀuh hyu tơlơi pơhing sit. Mơ̆ng anun, akŏ pơjing anih mă yua boh thâo mrô rơnuk rơnua, rơgơi, đăo kơnang sit./.